Мары (горад-дзяржава)

Магчыма вы шукаеце туркменскі горад Мары

Ма́ры — старажытны горад-дзяржава ў 3—2-м тыс. да н.э. на сярэднім Еўфраце (цяпер узгорак Таль-Харыры, Сірыя).

Узнік у пачатку 3-га тыс. да н.э. Першапачаткова быў населены хурытамі, пазней семітамі. Буйны цэнтр гандлю (пасрэднік паміж Месапатаміяй і дзяржавамі Міжземнамор’я і Малой Азіі) і рамяства (вырабы з бронзы, ткацтва).

Да 25 ст. да н.э. ваяваў з шумерскімі гарадамі. У 24—23 ст. да н.э. ў складзе дзяржавы з цэнтрам у горадзе Акад, у 22—21 ст. да н.э. — дзяржавы трэцяй дынастыі Ура. У канцы 21 ст. да н.э. самастойны горад, у пачатку 18 ст. да н.э. пад уладай Асірыі. У 1758 да н.э. зруйнаваны вавілонскім царом Хамурапі.

Знаходкі

У выніку раскопак (вядуцца з 1933 г.) выяўлены палац 18 ст. да н.э., храм багіні Іштар, асобныя гарадскія кварталы, дзяржаўны архіў клінапісных дакументаў (больш за 20 тыс. таблічак) і інш.

Літаратура

• Мары // Беларуская энцыклапедыя: У 18 т. Т. 10: Малайзія — Мугаджары / Рэдкал.: Г. П. Пашкоў і інш. — Мн. : БелЭн, 2000. — Т. 10. — С. 154. — 10 000 экз. — ISBN 985-11-0035-8. — ISBN 985-11-0169-9 (т. 10).

Спасылкі

• На Вікісховішчы ёсць медыяфайлы па тэме Мары (горад-дзяржава)