Суднамадэльны спорт у Беларусі
Суднамадэ́льны спорт[1] — адзін з тэхнічных відаў спорту, які мае развіццё ў Беларусі.
Развіццё беларускага суднамадэльнага спорту непарыўна звязана з развіццём суднамадэльнага спорту ў СССР. У жніўні 1949 года ў Маскве прайшлі першыя вочныя Усесаюзныя спаборніцтвы спартыўных мадэляў, у якіх прыняла ўдзел зборная каманда БССР. У гэтым жа годзе адбыўся Першы чэмпіянат БССР[1]. З 1950 года зборная каманда БССР — удзельнік чэмпіянатаў СССР[1]. У 1963 годзе былі праведзены Усесаюзныя спаборніцтвы ў Мінску, на воднай станцыі Мінскай марской школы ДТСААФ на Камсамольскім возеры[2]. У 1976 годзе беларуская каманда заняла 3-е месца на чэмпіянаце СССР у класе самаходных мадэлей і яхт і 4-е месца ў класе скорасцевых кордавых і радыёкіруемых мадэлей[1].
Ля вытокаў беларускага суднамадэлізму стаялі выдатныя арганізатары-выхавальнікі: Віктар Міхайлавіч Ермакоў (Мінскі гарадскі Палац піянераў), Анатоль Ігнатавіч Паўлаў (Віцебская марская школа), Валянцін Максімавіч Каўтуноў (Рэспубліканская станцыя юных тэхнікаў), Мікалай Аляксандравіч Булыга (Мінская марская школа)[2].
У склад зборнай каманды СССР па суднамадэльным спорце ў розны час уваходзілі і прадстаўнікі Беларускай ССР: Раман Міхайлавіч Шайкоў , Канстанцін Ігаравіч Шчука, Дзмітрый Ігаравічм Шчука, Юрый Віктаравіч Ермакоў, Андрэй Барысавіч Місякоў, Ігар Мікалаевіч Германенка, Дзмітрый Алегавіч Карандашоў, Сяргей Іванавіч Трусевіч, Віталь Мікалаевіч Пучкоўскі і інш.[2]
4 чэрвеня 1992 года ў Міністэрстве юстыцыі Рэспублікі Беларусь зарэгістравана самастойная «Беларуская рэспубліканская Федэрацыя суднамадэльнага спорту», з 1995 года — грамадскае аб’яднанне «Беларуская федэрацыя суднамадэльнага спорту»[2]. З 1993 года суднамадэлісты Беларусі, у складзе нацыянальных каманд, рэгулярна ўдзельнічаюць у чэмпіянатах свету і Еўропы, міжнародных спаборніцтвах, якія праводзіць Міжнародная арганізацыя суднамадэлізму і суднамадэльнага спорту (NAVIGA)[2]. Пры правядзенні спаборніцтваў па суднамадэльным спорце ўнутры краіны выкарыстоўваюцца правілы спаборніцтваў і спартыўная класіфікацыя мадэляў NAVIGA, дапоўненыя нацыянальнымі правіламі і класамі мадэляў[2][3].
Вядомы суднамадэліст і трэнер, неаднаразовы пераможца розных спаборніцтваў Дзмітрый Іванавіч Калмыкоў з’яўляецца суддзёй NAVIGA і ў 2015 годзе на Генеральнай Асамблеі NAVIGA быў абраны віцэ-прэзідэнтам гэтай міжнароднай арганізацыі[2].
Зноскі
- ↑ а б в г БелЭн 2002.
- ↑ а б в г д е ё Из истории спорта Архівавана 9 кастрычніка 2020. (руск.) // Сайт ДТСААФ
- ↑ Правила соревнований по судномодельному спорту. Стендовые модели «С» (руск.)
Літаратура правіць
- Суднамадэ́льны спорт // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 256. — 10 000 экз. — ISBN 985-11-0035-8. — ISBN 985-11-0251-2 (т. 15).
Спасылкі правіць
- Из истории спорта Архівавана 9 кастрычніка 2020. (руск.) // Сайт ДТСААФ
- Международная федерация судомодельного спорта, МФСС (ShipModel Sport International Federation, SMSIF) (руск.) // Сайт Галоўнага ўпраўлення спорту і турызму Мінскага гарвыканкама
- Персанальны сайт Дзмітрыя Калмыкова (руск.)
- Посвящая Витебской морской школе (руск.) // Віцебская абласная арганізацыйная структура ДТСААФ
- Чемпионы мира по судомодельному спорту Дмитрий Калмыков и Игнат Ярошенко: Судомоделированием можно заниматься с 1-го класса! Архівавана 21 лютага 2020. (руск.) // Тэлеканал СТБ