Тунэль Хельсінкі — Талін

Тунэль Хельсінкі — Талін — праект падводнага тунэля, які б злучыў сталіцы Фінляндыі і Эстоніі па дне Фінскага заліва.

Тунэль паміж Хельсінкамі і Талінам стане працягам Балтыйскай чыгункі.

Паводле папярэдніх высноў, працягласць тунэля ў залежнасці ад выбару трасы складзе не менш 60—80 км, з якіх 50—70 км пройдуць пад вадой, што зробіць яго найдаўжэйшым падводным тунэлем у свеце. На думку аўтараў праекту, для абслугоўвання тунэля спатрэбіцца будаўніцтва штучнага вострава плошчай 6 га, на якім неабходна будзе размясціць ветрагенератары для электразабеспячэння тунэля. Праектны тэрмін будаўніцтва — 10—15 гадоў.

Пачатковы кошт праекту вагаецца ад аднаго мільярда еўра (калі будаваць толькі грузавы тунэль) да некалькіх мільардаў (калі будзе вырашана будаваць пасажырскі тунэль). У выніку будзе значна павышаная як эканамічная інтэграцыя двух гарадоў, так і пасажыра- і тавараабарот паміж паўднёвай Фінляндыяй і балтыйскімі дзяржавамі. Акрамя таго, злучэнне тунэля з Балтыйскай чыгункай, што ўжо знаходзіцца ў стадыі будаўніцтва, звяжа чыгуначнымі лініямі Фінляндыю з астатняй Еўропай. У геапалітычным сэнсе гэта дасць магчымасць вандраваць па ўсім Еўрапейскім саюзе без неабходнасці перасячэння мяжы з Расіяй ці вымушанага выкарыстання паветранага або воднага транспарту.

Літаратура

• Usko Anttikoski. Fixed transport connections across the Baltic from Finland to Sweden and Estonia. Preliminary feasibility assessment. — 2007.(недаступная спасылка)
• Ilkka Vähäaho, Pekka Raudasmaa. Feasibility Study, Helsinki–Tallinn, Railway Tunnel // Geotechnical Division of the Real Estate Department of the City Of Helsinki. — 2008.
• Jaakko Blomberg, Gunnar Okk. Opportunities for Cooperation between Estonia and Finland 2008. — Prime Minister’s Office, Finland, 2008.

Спасылкі

• Папярэдні план тунэля Хельсінкі—Талін 1997 года
• Olli Keinänen. «From fantasy to vision: towards planning of Helsinki-Tallinn railway tunnel»(недаступная спасылка) City of Helsinki, International Relations, Finland, 2009.