Юзаф Адрыян Масальскі

Юзаф Адрыян Масальскі (каля 1726 — 6 чэрвеня 1765, Варшава) — дзяржаўны дзеяч Вялікага Княства Літоўскага.

Юзаф Адрыян Масальскі
Герб «Масальскі III»
Падскарбі надворны літоўскі 1754 — 6 чэрвеня 1765
Папярэднік	Аляксандр Міхал Сапега
Пераемнік	Антоні Тызенгаўз
Староста гарадзенскі 1748 — 1765
Папярэднік	Міхал Юзаф Масальскі
Пераемнік	Антоні Тызенгаўз
Нараджэнне	каля 1726
Смерць	6 чэрвеня 1765(1765-06-06) Варшава, Варшаўская зямля[d], Мазавецкае ваяводства, Велікапольская правінцыя, Карона Каралеўства Польскага, Рэч Паспалітая
Род	Масальскія
Бацька	Міхал Юзаф Масальскі
Маці	Францішка з Агінскіх[d]
Жонка	Антаніна з Радзівілаў[d]
Дзеці	Ксаверый Масальскі[d] і Алена Апалонія з Масальскіх[d]
Узнагароды	Ордэн Белага арла

Староста гарадзенскі (з 1748), бержніцкі, лаздзейскі (з 1756), прапойскі, вісліцкі, падскарбі надворны ВКЛ з 1754; падпалкоўнік пяцігорскі, генерал-маёр (1754).

Пасол на соймы 1744, 1750, 1752 (яго маршалак), 1756, 1758, 1760, дэпутат Трыбунала ВКЛ у 1748 (яго маршалак).

Кавалер ордэна Белага Арла (1761). Належаў да групоўкі Чартарыйскіх.

Лічыўся здольным палітыкам, які імкнуўся да рэфарміравання дзяржаўнага ладу Рэчы Паспалітай, але заўчасная смерць перарвала яго кар'еру.

Сям'я

Быў сынам вялікага літоўскага гетмана Міхала Юзафа Масальскага і Францішкі Агінскай, дачкі троцкага кашталяна Мікалая Францішка Агінскага. Меў братоў Ігнацыя Якуба, Яна Мікалая і Казіміра Адрыяна.

Ажаніўся ў 1745 з князёўнай Антанінай Радзівіл (1730 — 1764), дачкой крайчага ВКЛ Марціна Мікалая Радзівіла.

Пакінуў сына Ксаверыя (каля 1760 — 1787) і дачку Алену Апалонію (1763 — 1815), жонку князя дэ Лінье (de Ligne), а потым Вінцэнта Патоцкага.

Літаратура

• Масальскі Юзаф Адрыян // Вялікае княства Літоўскае: Энцыклапедыя. У 3 т. / Рэдкал.: Т. У. Бялова (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2010. — Т. 3: Дадатак. А — Я. — С. 342. — 696 с. — ISBN 978-985-11-0487-7 (т. 3), ISBN 985-11-0315-2.