Іван Фядотавіч Ермакоў

Іван Фядотавіч Ермакоў (24 лютага 1892, вёска Пруднікі, Гарадоцкі павет, Віцебская губерня, цяпер Гарадоцкі раён, Віцебская вобласць — ?) — беларускі партыйны і дзяржаўны дзеяч, педагог, рэктар БДУ (1931—1933).

Іван Фядотавіч Ермакоў
Дата нараджэння	24 лютага 1892(1892-02-24)
Месца нараджэння	Пруднікі, Гарадоцкі павет, Віцебская губерня, Расійская імперыя
Дата смерці	не раней за 1953
Грамадзянства	Расійская імперыя  БССР  СССР
Род дзейнасці	настаўнік
Месца працы	Гомельскі аграпедагагічны інстытут БДУ Аршанскі настаўніцкі інстытут
Альма-матар	Полацкі каледж
Партыя	КПСС

Біяграфія

Іван Ермакоў паходзіў з сялянскай сям’і. У 1911 г. скончыў Полацкую настаўніцкую семінарыю. Выкладаў у Пушчанскім народным вучылішчы (Гарадоцкі павет). Удзельнік Першай сусветнай (як радавы) і грамадзянскай (камісар стралковага палка) войнаў. У 1918 г. уступіў у ВКП(б). З пачатку 1920-х гадоў знаходзіўся на службовых пасадах у розных партыйных і савецкіх установах. У 1925 г. жыў у Віцебску. З 1926 г. — загадчык Мазырскага акруговага аддзела народнай асветы. Актыўна ўключыўся ў беларусізацыю.

З 1928 г. па прапанове наркама асветы Антона Баліцкага прызначаны загадчыкам Мінскага акруговага аддзела народнай асветы. З восені 1930 г. па прапанове новага наркама асветы А. Платуна — рэктарам Гомельскага аграпедагагічнага інстытута. Са снежня 1931 г. выконваў абавязкі рэктара (потым рэктар) БДУ. З лютага 1935 г. — сакратар Шклоўскага райкама ВКП(б). З чэрвеня 1937 г. — намеснік старшыні Дзяржплана БССР.

11 жніўня 1938 г. Ермакоў быў арыштаваны за «ўдзел у нацыянал-фашысцкай арганізацыі і незаконнае захоўванне зброі» (потым высветлілася, што на нашэнне пісталета «браўнінг» Ермакоў як сакратар райкама меў права). 15 лістапада 1939 г. пасля разгляду справы ў ваеннай пракуратуры БССР, потым у трыбунале БВА, яна была вернута на даследаванне ў НКУС, а 30 снежня 1939 г. Ермакоў быў вызвалены пад падпіску аб нявыездзе.

У 1940 прызначаны рэктарам Мінскага педагагічнага інстытута. Удзельнік Другой сусветнай вайны (як і падчас грамадзянскай, быў камісарам). Пасля дэмабілізацыі — рэктар Аршанскага настаўніцкага інстытута. У красавіку 1953 г., амаль цалкам страціўшы зрок, выйшаў на пенсію. Асабовая справа Ермакова № 4330-с (спынена 11.1.1940) захоўваецца ў архіве КДБ Беларусі.

Літаратура

• Яноўскі А., Зельскі А. Гісторыя Беларускага дзяржаўнага універсітэта ў біяграфіях яго рэктараў. — Мн., 2001. — С. 37—46.
• Актыўныя змагары за новы лад жыцця // Памяць: Гіст.-дакум. хроніка Шклоўс. р-на. — Мн., 1998. — С. 91.