Ірэна Міхайлаўна Рагалевіч-Дутко

Ірэна Міхайлаўна Рагале́віч-Дутко́ (1942, в. Літоўе, Жыткавіцкі раён, Гомельская вобласць — 16 ліпеня 2020, Брыджуотэр, Нью-Джэрсі) — беларуская мастачка ў эміграцыі.

Ірэна Міхайлаўна Рагалевіч-Дутко
Дата нараджэння	1942
Месца нараджэння	Лутоўе, Дзякавіцкі сельсавет, Жыткавіцкі раён, Палеская вобласць, БССР, СССР
Дата смерці	16 ліпеня 2020(2020-07-16)
Месца смерці	Брыджуотэр Таўншып[d], акруга Самерсет[d], Нью-Джэрсі, ЗША
Месца пахавання	Беларускія могілкі ў Саўт-Рыверы
Грамадзянства	ЗША
Бацька	Міхаіл Рагалевіч
Род дзейнасці	мастачка
Член у	Згуртаванне беларускіх мастакоў і ўмельцаў[d]

Біяграфія

Нарадзілася ў сям’і Міхаля і Яфіміі Рагалевічаў, у якой было сямёра дзяцей. Пляменніца Н. Кудасавай. З 1944 года разам з бацькамі жыла ў Германіі. З 1950 года ў ЗША, дзе скончыла мастацкую школу ў Ёрку, штат Пенсільванія.

Як дызайнер спецыялізуецца ў графіцы. Малявала таксама алеем, акварэллю. Аформіла шэраг выданняў Беларускага інстытута навукі і мастацтва ў Нью-Ёрку, брашур, каталогаў, календароў, праспектаў і інш. рэкламнай прадукцыі. Намалявала абразы для беларускай праваслаўнай царквы Св. Еўфрасінні Полацкай у Саўт-Рыверы, ікону Благавешчання для іканастаса царквы імя Жыровіцкай Маці Божай у Хайленд-Парку. Арганізатар і ўдзельнік традыцыйных мастацкіх выставак у г. Саўт-Рывер. Адказвала за мастацкую праграму беларускіх фестываляў у штаце Нью-Джэрсі (1976, 1977, 1979). Член кіраўніцтва Згуртавання беларускіх мастакоў і ўмельцаў у Саўт-Рыверы.

Разам з мужам Мікалаем Дутко яны забяспечылі вёрстку двухмоўнай кнігі Янкі Запрудніка «Беларускія фэстывалі й выстаўкі ў Нью-Джерсі. Палітычная інфармацыя моваю мастацтва (1948—2011 гг)».

Памерла 16 ліпеня 2020 года ў Брыджуотэры, штат Нью-Джэрсі. Пахаваная на беларускіх могілках царквы Св. Еўфрасінні Полацкай у Саўт-Рыверы.

Сям’я

У шлюбе з Мікалаем Дутко мела дачку Тамару, у якой двое дзяцей.

Літаратура

• Ляднёва А. С. Рагалевіч-Дутко Ірэна Міхайлаўна // Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — 576 с. — 10 000 экз. — ISBN 985-11-0035-8. — ISBN 985-11-0216-4 (т. 13).