Ізраіль Саламонавіч Бескін

Ізраіль Саламонавіч Бескін (25 лістапада 1895, Віцебск - 19 студзеня 1964, Іркуцк) — камандуючы артылерыяй 70-й арміі 2-га Беларускага фронту падчас Вялікай Айчыннай вайны, генерал-лейтэнант артылерыі (1944). Герой Савецкага Саюза (31.05.1945).

Вучыўся ў школе, працаваў на Віцебскім бровары. Пераехаўшы ў Харкаў спрабаваў паступіць у Харкаўскі ўніверсітэт, але вымушаны быў з-за недахопу сродкаў вярнуцца ў Віцебск. У 1914 годзе прызваны ў войска. У Чырвонай Арміі з 1918 года. Удзельнічаў у падаўленні паўстанняў ў Віцебскай і Смаленскай губернях падчас грамадзянскай вайны. У 1920 годзе скончыў Маскоўскія курсы цяжкай артылерыі РККА, у 1925 годзе Вышэйшую артылерыйскую школу. Удзельнічаў у вызваленні Хабараўска, Спаска, Валачаеўска, Уладзівастока ад японскіх акупантаў, у баях на КВЖД ў 1929 годзе. У 1936 годзе скончыў Ваенную акадэміі. імя Фрунзэ. Удзельнік савецка-фінляндскай вайны (1939-1940).

У час Вялікай Айчыннай вайны І. С. Бескін прымаў удзел у вызваленні Рэчыцы, Калінкавічаў, Гомеля, Бабруйска, фарсіраванні Дняпра, Сожа, Одэра. Вызначыўся ў 1945 годзе пры прарыве абароны суперніка на рацэ Одэр каля горада Шчэцін.

У 1950 годзе скончыў Вышэйшыя акадэмічныя курсы пры Ваеннай акадэміі Генеральнага штаба. Камандаваў артылерыяй Усходне-Сібірскай ваеннай акругі. З 1953 года ў адстаўцы. Жыў у горадзе Іркуцк.

Узнагароды

І. С. Бескін узнагароджаны 3 ордэнамі Леніна, 3 ордэнамі Чырвонай Зоркі, ордэнамі Суворава 1-й і 2-й ступені, ордэнам Кутузава 1-й ступені, медалямі.

Літаратура

• Беларуская энцыклапедыя: У 18 т. Т.3: Беларусы — Варанец / Рэдкал.: Г. П. Пашкоў і інш. — Мн.: БелЭн, 1996. — Т. 3. — 511 с. — 10 000 экз. — ISBN 985-11-0068-4 (т. 3)