Момант інерцыі

Мо́мант іне́рцыі – скалярная фізічная велічыня, якая характарызуе інертнасць цела ў вярчальным руху. Цела з большым момантам інерцыі больш марудна змяняе хуткасць свайго вярчэння пад адным і тым жа ўздзеяннем.

Паняцце моманту інерцыі для вярчальнага руху падобна да паняцця масы для паступальнага руху.

Момант інерцыі матэрыяльнага пункта вызначаецца наступным чынам:

$J=mr^{2}$,

дзе m – маса пункта, r – яго адлегласць ад восі вярчэння.

Для сістэмы, якая складаецца з мноства матэрыяльных пунктаў, момант інерцыі вызначаецца як сума момантаў інерцыі ўсіх яе пунктаў:

$J=\sum _{i}m_{i}r_{i}^{2}$

Для суцэльнага цела момант інерцыі вызначаецца як аб'ёмны інтэграл:

$J=\int \limits _{(V)}\rho r^{2}dV$,

дзе $\rho$ – шчыльнасць цела.