Інфармацыйнае агенцтва
Інфармацыйнае агенцтва — спецыялізаванае інфармацыйнае прадпрыемства (арганізацыя, служба, цэнтр), якое абслугоўвае СМІ. Яго асноўная функцыя — забяспечваць аператыўнай палітычнай, эканамічнай, сацыяльнай, культурнай інфармацыяй рэдакцыі газет, часопісаў, тэлебачання, радыёвяшчання, а таксама іншыя ўстановы, арганізацыі, прыватных асоб, якія з’яўляюцца падпісантамі на яго прадукцыю. Функцыянаванне агенцтва арыентавана на збор навін.
Апісанне правіць
Інфармацыйныя агенцтвы могуць ахопліваць вельмі шырокі спектр паслуг па зборы, стварэнні, прадстаўленні і апрацоўцы інфармацыі. Віды і сфера паслуг часцяком вызначаюцца памерамі агенцтва (колькасць карэспандэнтаў, рэдакцый, прадстаўніцтваў) і палітыкай кіраўніцтва. Часцей за ўсё агенцтва складаецца з сеткі рэдакцый і карэспандэнтаў па краіне і за мяжой.
Рэдакцыі могуць працаваць як незалежна, прадаючы свае паслугі на месцах, так і пад кіраўніцтвам галоўнай рэдакцыі, дзе збіраецца інфармацыя для больш шырокага кола спажыўцоў. Інфармацыя распаўсюджваецца як з дапамогай уласных структур (сайт, перыядычныя выданні, тэлевізійны канал і г.д.), так і пры дапамозе партнёраў. У структуру агенцтва могуць уваходзіць фотастудыі, архівы, аддзелы па стварэнні вэб- і аўдыёвізуальнай прадукцыі, аналітычныя аддзелы, PR-аддзелы і г. д., паслугамі якіх таксама могуць карыстацца кліенты інфармацыйнага агенцтва.