Барыс Данілюк
Барыс Данілюк (5 красавіка 1923 — 28 студзеня 2011) — беларускі грамадскі дзеяч у ЗША.
| Барыс Данілюк | |
|---|---|
| Род дзейнасці | інжынер, настаўнік |
| Дата нараджэння | 5 красавіка 1923 |
| Месца нараджэння | |
| Дата смерці | 28 студзеня 2011 (87 гадоў) |
| Месца смерці | |
| Месца пахавання | |
| Бацька | Хведар Данілюк |
| Альма-матар | |
Біяграфічныя звесткі правіць
Нарадзіўся ў вёсцы Старыя Дзявяткавічы на Слонімшчыне ў сям’і беларускага святара, удзельніка Слуцкага паўстання Хведара Данілюка (1877—1960).
З 1933 года вучыўся ў пачатковай школе ў Слоніме, а з восені 1935 і да канца 1939 — у польскіх гімназіях у Слоніме і ў Баранавічах. У 1940 пакінуў навуку ў дзесяцігодцы і пачаў дапамагаць бацьку на гаспадарцы.
Падчас нямецкай акупацыі працаваў сакратаром і школьным інспектарам у Слоніме, у Беларускай самапомачы, кіраваў мастацкай самадзейнасцю ў Слоніме, быў спартовым інструктарам СБМ, служыў перакладчыкам пры 48-м Беларускім батальёне, прымаў удзел у працы Другога Усебеларускага кангрэсу (1944). Спяваў у хоры, удзельнічаў у танцавальным, а таксама ў драматычным гуртках. У лістападзе 1943 ажаніўся з Марыяй Дземідовіч, у ліпені 1944 з сям’ёй пакінуў Беларусь.
Да 1950 года сям’я жыла ў французскай акупацыйнай зоне ў Германіі, а Барыс Данілюк вучыўся на інжынера-будаўніка ва ўніверсітэце ЮНРРА ў Мюнхене, быў сябрам Беларускага студэнцкага згуртавання. Браў удзел у З’ездзе беларускіх студэнтаў (кастрычнік, 1947) у Марбургу. Сябра рэдакцыйнай калегіі часопіса «Крывіцкі Сьветач». З 1948 — сябра Рады БНР у Остэргофене. Падтрымаў аднаўленне БАПЦ у чэрвені 1948.
Пасля пераезду ў ЗША Барыс Данілюк прымаў актыўны ўдзел у арганізацыі беларускага царкоўнага і грамадскага жыцця ў Амерыцы. На працягу доўгіх гадоў ён уваходзіў у Раду і Кансісторыю Беларускай аўтакефальнай праваслаўнай царквы, кіраваў царкоўным хорам у Кафедральным саборы святога Кірылы Тураўскага ў Нью-Ёрку, з’яўляўся рэдактарам і выдаўцом часопіса «Царкоўны Пасланец». У расколе БАПЦ у пачатку 1980-х узяў бок прыхільнікаў мітрапаліта Ізяслава. У апошнія гады жыцця той цяжка хварэў, і Барыс Данілюк выступаў ад яго імя.
Аўтар успамінаў (надрукаваны ў № 33 «Запісаў БІНІМ»).
Пахаваны на беларускіх могілках у Іст Брансвіку ў штаце Нью-Джэрсі.
Зноскі
Літаратура правіць
- Юрэвіч, Л. Шматгалосы эпісталярыум : гісторыя людзей і ідэй на эміграцыі ў ліставанні / Прадм. і рэд. Н. Гардзіенка. — Мінск: Кнігазбор, 2012. — 660 с. — (Бібліятэка Бацькаўшчыны ; кн. 20). — ISBN 978-985-7007-43-1.