Касцёл Святога апостала Лукі і кляштар дамініканцаў (Чашнікі)

Касцёл Святога апостала Лукі і кляштар дамініканцаў — колішні рымска-каталіцкі сакральны комплекс у горадзе Чашнікі Віцебскай вобласці.

Славутасць
Касцёл Святога апостала Лукі і кляштар дамініканцаў
Касцёл Святога апостала Лукі і кляштар дамініканцаў, 1913 год
54°51′42″ пн. ш. 29°09′29″ у. д.
Краіна	Беларусь
Горад	Чашнікі
Архітэктурны стыль	барока
Заснавальнік	Жыгімонт Адам Слушка
Першае згадванне	1674
Будаўніцтва	1779—1786 гады
Дата скасавання	XX стагоддзе
Стан	знішчаны
Медыяфайлы на Вікісховішчы

Гісторыя

У 1664 годзе харунжым Адамам Слушкам быў заснаваны дамініканскі кляштар і ў 1674 годзе быў узведзены касцёл.

Мураваны храм быў пабудаваны ў 1779—1786 гадах у стылі барока. Побач знаходзіўся кляштар дамініканцаў і бібліятэка. На вежах размяшчаліся гадзіннік і 3 званы, адлітыя ў Рызе.

У 1830 годзе ў кляштары былі прыёр, трое айцоў дамініканцаў і 8 чалавек абслугі. Разам з дамініканцамі ў Чашніках працавалі сёстры марыявіткі, якія мелі кляштар, дзе настаяцельніцай з’яўлялася сястра Эмілія Дзяўшовіч.

Пасля паўстання 1830—1831 гадоў кляштар дамініканцаў у Чашніках быў скасаваны, але касцёл заставаўся дзеючым парафіяльным. Кляштар сясцёр марыявітак існаваў кароткі час, ужо ў 1845 годзе ён быў ліквідаваны.

У 1868 годзе пасля паўстання 1863—1864 гадоў касцёл быў закрыты, а будынак перададзены праваслаўнай царкве i стаў Мікалаеўскім саборам.

У 1930 годзе па загадзе мясцовых уладаў вежы сабора да ўзроуню другога яруса знеслі i візуальна аб’ядналі з асноўным аб’ёмам будынка, які перарабілі пад дом культуры.

Будынак быў моцна пашкоджаны ў часы Другой сусветнай вайны. У пачатку 1960-х гадоў знеслі ўжо рэшткі сцен, з якіх мясцовае насельніцтва пасля вайны здабывала цэглу для гаспадарчых патрэб. Будаўніцтва побач новай школы толькі паскорыла прыняцце рашэння аб руйнаванні былога касцёла. На гэтым месцы цяпер знаходзіцца школьная спартыўная пляцоўка.

• 
• 
• 
• 

Спасылкі

• Касцёл Святога апостала Лукі і кляштар дамініканцаў (Чашнікі) на сайце Catholic.by (бел.)
• Касцёл Святога апостала Лукі і кляштар дамініканцаў (Чашнікі) на сайце Radzima.org