Кубак

Кубак, конаўка, кварта — пасудзіна невялікага аб'ёму (прыбл. 200 мл) цыліндрычнай, усечана-канічнай або бочкападобнай формы з фарфору, гліны, драўніны, металу, часам лубу, да якой звычайна апцыянальна далучана колцападобная «ручка» для трымання. Пасудзіна выкарыстоўваецца для непасрэднага піцця вады, квасу і іншых напояў.

На Беларусі гліняныя кубкі рабілі паліванымі і чорназадымленымі. Аздаблялі лінейна-хвалістым контррэльефным арнаментам, глянцаваным геаметрычным узорам, ангобнай размалёўкай, радзей ляпным дэкорам. На поўначы Беларусі для трываласці кубак апляталі бяростай. Унутраную паверхню медных і латунных кубкаў лудзілі.

Кубкі бываюць:

• Булённыя. Выкарыстоўваюцца для падачы булёнаў, супаў-пюрэ і запраўных супаў з дробна нарэзанымі прадуктамі. Умяшчальнасць: 350—400 см³. Выпускаюць з дзвюма (з процілеглых бакоў) і з адной ручкамі.
• Чайныя. Выкарыстоўваюцца для падачы чаю, кавы з малаком ці вяршкамі, кавы па-варшаўску, какава, шакаладу. Умяшчальнасць: 200—250 см³.
• Кававыя. Выкарыстоўваюцца для падачы чорнай кавы (умяшчальнасць: 75—100 см³) і кавы па-ўсходняму (умяшчальнасць: 50—70 см³).

У некаторых культурах з кубкаў прынята таксама есці, у многіх краінах Азіі распаўсюджаны кубак без ручкі — піяла.

У шматлікіх рэлігіях чашы (кубкі) той ці іншай формы і аб'ёму выкарыстоўваюцца як прадметы культу, напрыклад, пацір у хрысціянстве ці спяваючыя чашы ва ўсходніх рэлігіях.

У якасці меры аб'ёму

• еўрапейская (метрычная) — 250 см³
• амерыканская — 237—240 см³
• англійская — 284 см³
• японская — 200 см³ ці 1 го (180 см³)

Гл. таксама

• Шклянка
• Кружка
• Сподак

Спасылкі

• На Вікісховішчы ёсць медыяфайлы па тэме Кубак
• КУБАК, конаўка, кварта