Тэйлар Свіфт

Тэйлар Элісан Свіфт (англ.: Taylor Alison Swift; 13 снежня 1989) — амерыканская кантры і поп спявачка, аўтар песень, рэжысёр і актрыса.

Тэйлар Свіфт
англ.: Taylor Swift
Асноўная інфармацыя
Поўнае імя	Тэйлар Элісан Свіфт
Дата нараджэння	13 снежня 1989(1989-12-13) (34 гады)
Месца нараджэння	Уэст-Рэдынг[d], акруга Беркс[d], Пенсільванія, ЗША
Краіна	ЗША
Бацька	Скот Свіфт[d]
Маці	Андрэа Фінлі[d]
Альма-матар	Хендэрсанвільская вышэйшая школа[d] Ваёмісінгскі дзіцячы цэнтр/Старэйшая школа[d]
Музычная дзейнасць
Прафесіі	спявачка, актрыса
Гады актыўнасці	2003 — цяперашні час
Пеўчы голас	мецца-сапрана
Інструменты	акустычная гітара, банджа, піяніна, укулеле
Жанры	кантры, поп, альтэрнатыва
Супрацоўніцтва	Келі Піклер, The Civil Wars, B.o.B, Цім Макгро, Эд Шыран, Гары Лайтбодзі, Кендрык Ламар, Кельвін Харыс, Little Big Town, Зэйн Малік, Sugarland, Panic! At the Disco, The Chicks, Шон Мендэс, Bon Iver, The National, HAIM, Марэн Морыс, Кіт Урбан, Фібі Брыджэрс, Крыс Стэплатан, Big Red Machine
Лэйбл	Republic Records Big Machine Records (раней) RCA Records (раней)
Грамадская дзейнасць
Член у	Silence Breakers[d]
Узнагароды	Грэмі, American Music Awards, Эмі, BRIT Awards і Billboard Music Awards
Аўтограф
Афіцыйны сайт
Медыяфайлы на Вікісховішчы
Цытаты ў Вікіцытатніку

Дэбютны альбом Тэйлар «Taylor Swift» выйшаў у 2006 годзе і прынёс ёй першы поспех. Другі альбом «Fearless» быў выпушчаны ў 2008 годзе і стаў міжнародным прарывам. Папулярнасць сінглаў «Love Story» і «You Belong with Me» дапамагла «Fearless» заняць першае месца ў чарце «Billboard 200» і стаць самым прадаваным альбомам 2009 года ў ЗША. «Fearless» атрымаў чатыры прэміі «Грэмі», улічваючы галоўную намінацыю «Альбом года», у якой Свіфт стала самай маладой лаўрэаткай у гісторыі.

Выпушчаны ў 2010 годзе трэці альбом Тэйлар «Speak Now» дэбютаваў на першым месцы «Billboard 200», разышоўшыся накладам больш за мільён копій за першы тыдзень. Сінгл «Mean» стаў уладальнікам «Грэмі» ў дзвюх намінацыях.

У 2012 годзе адбыўся рэліз чацвёртага студыйнага альбома «Red», які дэбютаваў на першых месцах у Аўстраліі, Вялікабрытаніі, Ірландыі, Канадзе, Новай Зеландыі. «Red» таксама дэбютаваў з першага месца ў «Billboard 200» з тыднёвым накладам у 1,2 мільёна асобнікаў, што стала найвышэйшым паказчыкам за апошнія дзесяць гадоў. Сінглы «We Are Never Ever Getting Back Together» і «I Knew You Were Trouble» сталі сусветнымі хітамі.

У 2014 годзе выйшаў пяты студыйны альбом Тэйлар «1989», які прадставіў яе новы музычны стыль. Свіфт апісала пласцінку як «свой першы афіцыйны поп-альбом». Запіс дэбютаваў на першым месцы «Billboard 200» з 1 287 000 прададзеных копій у ЗША — гэта абсалютны рэкорд за апошнія 12 гадоў. Такім чынам, Свіфт стала адзіным выканаўцам, у якога тры альбома адразу дэбютавалі з мільённымі тыражамі. Сінглы «Shake It Off», «Blank Space» і «Bad Blood» сталі сусветнымі хітамі. Акрамя таго, «1989» перамог у трох намінацыях прэміі «Грэмі».

У 2017 годзе адбыўся рэліз шостага студыйнага альбома спявачкі, які атрымаў назву «Reputation». Пласцінка дэбютавала на першым месцы «Billboard 200» з 1 216 000 прададзеных копій у ЗША. Тэйлар пабіла свой жа рэкорд і стала першай спявачкай у гісторыі, чатыры альбома якой за тыдзень распрадаліся накладам у мільён копій і болей. Па выніках года «Reputation» стаў самым паспяховым альбомам. Лід-сінгл «Look What You Made Me Do» стаў міжнароднай сенсацыяй і атрымаў вялікую папулярнасць ва ўсім свеце.

У 2019 годзе адбыўся рэліз сёмага студыйнага альбома Тэйлар і першага на лэйбле «Republic» — «Lover». Пласцінка дэбютавала на першым месцы «Billboard 200». У падтрымку альбома выйшлі сінглы «ME!», «You Need to Calm Down», «Lover» і «The Man».

У 2020 годзе Свіфт прадставіла восьмы студыйны альбом «Folklore», паведаміўшы пра яго рэліз за дзень да прэм’еры. Гэта была эксперыментальная пласцінка, запісаная ў жанры альтэрнатывы. Спявачка стварыла яе за 3 месяцы, знаходзячыся на самаізаляцыі падчас пандэміі COVID-19. Альбом апынуўся для артысткі нечаканым поспехам: рэкордныя праслухоўванні і самыя высокія ацэнкі ад крытыкаў. «Folklore» прынёс Свіфт узнагароду «Альбом года» на прэміі «Грэмі». Яна стала першай жанчынай у гісторыі з трыма перамогамі ў гэтай ганаровай намінацыі. У канцы 2020 года Тэйлар нечакана выпусціла дзявятую пласцінку — «Evermore». Яна стала ідэйным і музычным працягам «Folklore». Запіс узначаліў «Billboard 200» і ўсталяваў рэкорд па продажах вінілавых пласцінак у ЗША за ўсю гісторыю.

У 2021 годзе Свіфт пачала перавыпускаць сваю музыку з паметкай «Taylor’s Version» (бел. «Версія Тэйлар»). Гэта стала контрмерай супраць змяненняў валодання майстар-запісамі яе першых шасці студыйных альбомаў. Перазапісаныя «Fearless» і «Red» атрымалі станоўчыя водгукі крытыкаў і сталі камерцыйна паспяховымі.

Тэйлар Свіфт стала найбольш паспяховым лічбавым выканаўцам у гісторыі музыкі, уладальніцай больш за 400 прэмій, у тым ліку 11 статуэтак «Грэмі», 34 «American Music Awards», 1 «Эмі», 2 «BRIT Awards» і 25 «Billboard Music Awards», а таксама ўваходзіць у спіс «Каралевы поп-музыкі» (англ.: Queens of Pop) часопіса «Rolling Stone».

Выданне «Forbes» змясціла Свіфт на другое месца ў спісе самых высокааплатных спявачак 2015 года, а ў 2016 годзе яе назвалі самай высокааплатнай знакамітасцю з прыбыткам у 170 мільёнаў долараў. Па выніках 2017 года Тэйлар стала самай паспяховай спявачкай у свеце. У тым жа годзе часопіс «Forbes» паведаміў, што Свіфт стала першым артыстам у гісторыі амерыканскага музычнага рынку, у якога тры розных альбома былі прызнаныя самымі прадаванымі па выніках года («Fearless», «1989» і «Reputation»). Па выніках 2020 года Тэйлар стала другім самым прадаваным выканаўцам у свеце паводле звестак IFPI. У сваю чаргу Billboard паведаміў, што Свіфт апынулася самым высокааплатным музыкам у ЗША. У 2021 годзе Свіфт зноў заняла другі радок у рэйтынгу самых прадаваных артыстаў свету ад IFPI. Таксама яна была аб’яўлена самай паспяховай спявачкай на Spotify. Billboard назваў Тэйлар найвялікшай поп-зоркай 2021 года.

6 снежня 2023 года Тэйлар Свіфт названа чалавекам года па версіі часопіса «Time». 4 лютага 2024 года спявачка ў рэкордны чацвёрты раз стала пераможцай цырымоніі «Грэмі» ў катэгорыі «Альбом года».

Біяграфія

Ранняе жыццё

Тэйлар Свіфт нарадзілася 13 снежня 1989 года ў горадзе Рэдынг, а вырасла ў горадзе Ваёмісінг, штат Пенсільванія, ЗША. Вялікі ўплыў на яе аказалі Шаная Твейн, Ліэн Раймс і яе бабуля, оперная спявачка Марджары Фінлі. У 10 гадоў Тэйлар ужо выступала ў родным горадзе на кірмашах, фестывалях і спартыўных мерапрыемствах. Яна праспявала дзяржаўны гімн на адкрыцці 76-х Філадэльфійскіх гульняў у 12 гадоў.

Тэйлар узяла ў рукі гітару ва ўзросце 10 гадоў і тады ж пачала пісаць песні. Ужо ў той час яна зразумела, што свае самыя патаемныя пачуцці можна выказаць з дапамогай музыкі.

Пераехаўшы ў адзін з прыгарадаў Нэшвіла, Тэйлар выступала ля вітрын кафэ са сваімі песнямі і аднойчы трапіла на вочы аднаму з ветэранаў музычнай індустрыі Скоту Барчэце, які нядаўна стварыў незалежны лэйбл Big Machine Records. З таго часу і пачалася кар’ера спявачкі.

2006—2007: Taylor Swift

У жніўні 2006 года выйшаў дэбютны сінгл Тэйлар Tim McGraw. Альбом Taylor Swift, рэліз якога адбыўся 4 кастрычніка 2006 года, прынёс ёй вядомасць і стаў для Свіфт сапраўдным поспехам. У кастрычніку 2007 года яна была прызнаная Міжнароднай Асацыяцыяй аўтараў песень Нэшвіла найлепшым выканаўцам і аўтарам года і стала самай маладой спявачкай, якая атрымала гэтую прэмію. Усе пяць сінглаў з альбома — Tim McGraw, Teardrops on My Guitar, Our Song, Picture To Burn і Should’ve Said No — атрымалі плацінавы статус у ЗША.

Калядны міні-альбом Свіфт Sounds of the Season: The Taylor Swift Holiday Collection выйшаў у свет 16 кастрычніка 2007 года.

2008—2009: Fearless

Тэйлар Свіфт на канцэрце ў Лос-Анджэлесе ў 2010 годзе падчас тура Fearless Tour.

У 2008 годзе быў выпушчаны міні-альбом Beautiful Eyes. Тэйлар атрымала намінацыю на Грэмі за 2008 год як «Найлепшы новы выканаўца», але саступіла ўзнагароду Эмі Уайнхаўс.

Другі студыйны альбом Свіфт Fearless з’явіўся ў ЗША 11 лістапада 2008 года. Альбом заняў першае месца ў чарце музычных альбомаў Billboard 200 і разышоўся тыражом у 592 000 асобнікаў за першы тыдзень, а па выніках 2009 быў назаны самым прадаваным альбомам года.

У 2008 годзе Тэйлар атрымала прэмію Young Hollywood Awards (Малады Галівуд) у катэгорыі «Будучая суперзорка», а ў 2009 годзе — узнагароду «Найлепшае жаночае відэа» на MTV Video Music Awards 2009 за свой кліп You Belong with Me. Акрамя таго, Свіфт была ўзнагароджана прэміяй «Hal David Starlight Award» ад імя «Залы Славы аўтараў песень» і была названая «Найлепшым аўтарам і выканаўцам года» Нэшвілскай асацыяцыяй аўтараў песень. Часопіс Billboard назваў Тэйлар найлепшым выканаўцам 2009 года.

На 52-й цырымоніі ўзнагароджання Грэмі Свіфт атрымала ўзнагароды «Найлепшая кантры-выканаўца», «Найлепшая кантры-песня» за сінгл White Horse, «Альбом года» і «Найлепшы кантры-альбом» за пласцінку Fearless.

2010—2011: Speak Now

Тэйлар Свіфт выпусціла свой трэці студыйны альбом, Speak Now, у кастрычніку 2010 года. Яна напісала ўсе 14 песень самастойна. У музычным плане альбом пашырыў межы кантры-поп-музыкі да альтэрнатыўнага рока і баблгам-поп-музыкі. Йон Караманіка з газеты The New York Times назваў новы альбом «музычна разнастайным і, магчыма, найлепшым за ўсю кар’еру спявачкі» (на той момант). Тэона Вэбер з газеты The Village Voice адзначыў, што альбом дазволіў даць сапраўдную ацэнку таленту Свіфт, «які з’яўляецца не канфесійным, а драматычным»: «Як і некаторыя аўтары кантры-песень да яе, яна стварае персанажаў і сітуацыі, беручы іх з жыцця, і знаходзіць магутныя спосабы іх апісання». Роб Шэфілд з часопіса Rolling Stone апісаў песні Свіфт як адны з самых інтэлектуальных у поп, рок ці кантры-музыцы: «Свіфт таленавіты прафесіянал Нэшвіла, які ведае ўсе прыёмы стварэння хітоў, але яна таксама гіперрамантык з меладраматычнымі ноткамі».

Тэйлар выступае ў рамках Speak Now World Tour, ліпень 2011.

Свіфт пачала шырокую прамоўцінг-кампанію дзеля распаўсюджвання новага альбома. Яна наведвала розныя ток-шоў і дзённыя тэле-шоў, давала бясплатныя міні-канцэрты ў незвычайных месцах, у тым ліку на выступу на адкрытым двухпавярховым аўтобусе на Галівудскім бульвары ў Лос-Анджэлесе і ў Зале вылету ў Міжнародным аэрапорце імя Джона Фіцджэральда Кэнэдзі ў Нью-Ёрку.

Альбомны лід-сінгл Mine выйшаў у жніўні 2010 года, а затым яшчэ 5 сінглаў былі выпушчаныя ў 2010—2011 гадах: Back to December, Mean, The Story of Us, Sparks Fly і Ours.

Speak Now з’яўляецца адным з самых камерцыйна паспяховых альбомаў: ён дэбютаваў на першым месцы ў Billboard 200 у ЗША, разышоўся тыражом у 1,047,000 копій за тыдзень і быў прададзены накладам больш за 5 мільёнаў копій ва ўсім свеце.

Тэйлар Свіфт гастралявала на працягу 2011 і ў пачатку 2012 года для падтрымкі Speak Now. За трынаццаць месяцаў яна дала 111 канцэртаў ва ўсім свеце: 7 — у Азіі, 12 — Еўропе, 80 — у Паўночнай Амерыцы і 20 — у Аўстраліі. За тур, які наведала больш за 1,6 мільёна прыхільнікаў спявачкі было сабрана больш за 123 мільёна долараў, што зрабіла Speak Now World Tour адным з самых касавых у гісторыі.

На 54-й цырымоніі ўзнагароджання Грэмі Тэйлар атрымала прэміі «Найлепшае сольнае кантры-выкананне» і «Найлепшая кантры-песня» (усе за песню Mean), а таксама была намінавана ў катэгорыі «Найлепшы кантры-альбом». Яна таксама выканала песню падчас цырымоніі. Пасля выступлення на Грэмі Клейр Саддет з часопіса Time адзначыла, што Свіфт «з падвоенай сілай вярнулася на сцэну», а Джэймі Дзіруэстар з часопіса USA Today заўважыў, што Свіфт засвоіла крытыку 2010 года і стала лепш і як кампазітар, і як жывы выканаўца.

У 2011 годзе Тэйлар Свіфт заняла 20 месца ў спісе самых сексуальных жанчын свету па версіі часопіса MAXIM.

2012—2013: Red

Свіфт на канцэрце ў Місуры ў сакавіку 2013 года падчас The Red Tour

Чацвёрты альбом спявачкі, які атрымаў назву Red, быў выпушчаны 22 кастрычніка 2012 года. Тэйлар напісала 9 з 16 песень альбома самастойна, а астатнія былі створаны разам з іншымі аўтарамі. Нягледзячы на музычныя эксперыменты з хартленд-рокам, энэрджы і данс-попам, стыль Тэйлар застаўся традыцыйным.

Лід-сінгл альбома, We Are Never Ever Getting Back Together, стаў для Свіфт яе першым чарттоперам у амерыканскім мультыжанравым хіт-парадзе US Billboard Hot 100. З альбома выйшла яшчэ шэсць сінглаў: Begin Again (для кантры-радыё), I Knew You Were Trouble, 22, Everything Has Changed, The Last Time і Red (для кантры-радыё). Два з іх — We Are Never Ever Getting Back Together і I Knew You Were Trouble — сталі хітамі ва ўсім свеце. Red дэбютаваў на № 1 у Billboard 200 з тыражом больш за 1,2 мільёна копій за першы тыдзень, што стала самым вялікім паказчыкам за апошнія дзесяць гадоў. Пасля гэтага Свіфт стала першай жанчынай з двума альбомамі з мільённымі накладамі ў дэбютны тыдзень. Да мая 2013 года тыраж Red перавысіў ужо 6 мільёнаў копій ва ўсім свеце.

Тур у падтрымку альбома пачаўся ў сакавіку 2013 года і ўключаў 86 канцэртаў у Паўночнай Амерыцы, Новай Зеландыі, Аўстраліі, Еўропе і Азіі. Эд Шыран удзельнічаў у турнэ па Паўночнай Амерыцы, дзе праспяваў Everything Has Changed разам са Свіфт. Сярод запрошаных гасцей, якія спявалі з Тэйлар дуэтам на розных канцэртах, былі Карлі Сайман, Tegan and Sara, Джэніфер Лопес, Люк Браян, Патрык Стамп (з гурта Fall Out Boy), Элі Голдзінг, Nelly, Сара Барэліс, Шэр Лойд, B.o.B, Гары Лайтбодзі, Train, Neon Trees, Flatts, Хантэр Хейз, Эмелі Санд і Сэм Сміт. Тур прыцягнуў больш за 1.7 мільёна фанатаў і сабраў больш за 150 мільёнаў даляраў.

У гэты перыяд Свіфт супрацоўнічала са многімі музыкамі. Напрыклад, яна выканала песню As Tears Go By разам з гуртам The Rolling Stones у Чыкага падчас іх тура 50 & Counting і праспявала песню Highway Don’t Care разам з Цімам Макгро і Кітам Урбанам на цырымоніі ACM Awards 2013 года.

21 кастрычніка 2013 года выйшла новая песня Тэйлар Свіфт — Sweeter Than Fiction (сааўтар — Джэк Антонаф). Песня была запісаная як саўндтрэк да фільма «Мары спраўджваюцца» (One Chance) і атрымала намінацыю на прэмію «Залаты глобус» за найлепшую песню да фільма.

Red не прынёс Тэйлар ні адной узнагароды Грэмі, хоць і атрымаў намінацыі ў чатырох катэгорыях. Песня We Are Never Ever Getting Back Together была намінаваная ў катэгорыі «Запіс года» на 55-й цырымоніі Грэмі, у той час як сам альбом Red быў намінаваны ў катэгорыі «Альбом года» на 56-й цырымоніі. Тое ж самае адбылося і на штогадовай цырымоніі Country Music Association, на якой альбом не атрымаў ні адной узнагароды з некалькіх намінацый. Аднак Свіфт атрымала спецыяльную ўзнагароду Pinnacle Award Асацыяцыі кантры-музыкі за «унікальныя» ўзроўні поспеху. Прэмію Тэйлар асабіста ўручалі такія кантры-зоркі, як Цім Макгро, Фэйт Хіл, Кіт Урбан, Раскал Флатс, Джордж Стрэйт і Брэд Пэйслі, у той час як Мік Джагер, Джулія Робертс, Рыз Уізерспун, Этэль Кенэдзі і Джасцін Тымберлейк запісалі відэазварот.

Свіфт выйграла тры ўзнагароды MTV Europe Music Awards у 2012 годзе, уключаючы «Найлепшае жаночае відэа» і «Найлепшае жывое выступленне». Песня I Knew You Were Trouble выйграла ўзнагароду ў катэгорыі «Найлепшае жаночае відэа» на цырымоніі 2013 MTV Video Music Awards. Акрамя таго, Тэйлар была названая найлепшай выканаўцай кантры на цырымоніі American Music Awards 2012 і выканаўцам года на цырымоніі 2013 года. Нэшвілская асацыяцыя аўтараў песень узнагародзіла Свіфт прэміяй «Найлепшы аўтар і выканаўца года» ужо ў 5-ы і 6-ы раз на цырымоніях у 2012 і 2013 гадах. 

2014—2016: 1989

Тэйлар у 2015 годзе падчас 1989 World Tour.

У кастрычніку 2014 года выйшаў пяты студыйны альбом спявачкі — 1989. Праца над ім праходзіла ў 2013—2014 гадах у супрацоўніцтве са шведскімі прадзюсарамі Максам Марцінам і Шалбэкам. Свіфт апісвала сваю будучую пласцінку як «свой першы афіцыйны поп-альбом», які прадэманструе яе новы музычны стыль і будзе адрознівацца ад ранніх работ у жанры кантры. Па гэтай прычыне Тэйлар рассталася з некаторымі членамі яе шматгадовага гурта. Адну песню Свіфт напісала сама, а астатнія 12 стварыла разам з некалькімі аўтарамі. Дыск быў станоўча ацэнены музычнай крытыкай (напрыклад, Rolling Stone) і ў першы ж тыдзень рэлізу быў прададзены ў колькасці 1 287 000 копій у ЗША — больш, чым любы іншы альбом за апошнія 12 гадоў. Гэта зрабіла Свіфт адзіным выканаўцам, у якога тры альбома адразу дэбютавалі з мільённымі тыражамі. Дыск стаў бэстсэлерам 2014 года з агульным гадавым тыражом 3,66 мільёна копій. Да лютага 2015 года наклад альбома 1989 склаў больш за 8,6 мільёна копій па ўсім свеце.

У падтрымку альбома былі выпушчаныя 7 сінглаў: Shake It Off, Blank Space, Style, Bad Blood, Wildest Dreams, Out of the Woods, New Romantics. Тры з іх — Shake It Off, Blank Space і Bad Blood — занялі першае месца ў амерыканскім мультыжанравым хіт-парадзе US Billboard Hot 100 і сталі сусветнымі хітамі. Відэакліпы на Shake It Off і Blank Space на YouTube набралі звыш за 1 000 000 000 (зараз — больш за 2 000 000 000) праглядаў, што зрабіла Тэйлар першай жанчынай у гісторыі, якая дасягнула такіх вынікаў.

У гэты перыяд Свіфт некалькі разоў выступала з іншым вядомымі музыкамі. Яна праспявала I Saw Her Standing There і Shake It Off разам з Полам Макартні на шоў Saturday Night Live 40th Anniversary Special і разам Кені Чэсні выканала яго песню Big Star падчас канцэртнага тура Чэсні Big Revival Tour у Нэшвіле. Яна таксама акампанавала Мадонне на гітары ў акустычным прадстаўленні на цырымоніі iHeartRadio Music Awards.

У 2015 годзе Свіфт стала самай маладой жанчынай, якую ўключылі ў спіс самых значных і ўплывовых персон прыгожага полу, які склаў часопіс Forbes (№ 64 — «100 самых моцных жанчын»). Таксама Тэйлар заняла першае месца ў спісе самых сексуальных жанчын па версіі часопіса MAXIM.

30 жніўня 2015 года на 32-й цырымоніі прэміі MTV Video Music Awards Свіфт выйграла ўзнагароды ў 4 намінацыях і выступіла з Нікі Мінаж, а падчас прэ-шоў адбылася прэзентацыя новага відэакліпа спявачкі Wildest Dreams.

7 снежня 2015 года Тэйлар была намінаваная на прэмію Грэмі ў 7 катэгорыях, у тым ліку: «Запіс года» (Blank Space), «Песня года» (Blank Space), «Альбом года» (1989), «Найлепшае сольнае поп-выступленне» (Blank Space), «Найлепшае поп-выступленне ў дуэце/гуртом» (Bad Blood), «Найлепшы вакальны поп-альбом» (1989), «Найлепшы музычны кліп» (Bad Blood). Спявачка атрымала перамогу ў трох з іх: «Альбом года» (Тэйлар стала першай жанчынай у гісторыі, якая двойчы атрымала ўзнагароду ў гэтай намінацыі), «Найлепшы музычны кліп» і «Найлепшы вакальны поп-альбом».

У маі 2016 года Тэйлар уручылі спецыяльную ўзнагароду — «Taylor Swift Award» на BMI Pop Awards. Гэта быў другі выпадак у гісторыі гэтай прэміі, калі артысту прысудзілі падобную ўзнагароду. У 1990 годзе яе ўпершыню атрымаў Майкл Джэксан.

У ноч з 22 на 23 кастрычніка Тэйлар выступіла на Формуле-1, дзе выканала 15 песень. За сваё выступленне яна атрымала больш за 20 мільёнаў долараў.

9 снежня адбылася нечаканая прэм’ера новай песні Свіфт I Don’t Wanna Live Forever, якая была запісаная разам з Зэйнам Малікам і стала саўндтрэкам да фільма «На пяцьдзясят адценняў цямней». Кмпазіцыя дэбютавала за першай пазіцыі сусветнага чарта ITunes, адначасова ўзначальваючы хіт-парады 75 краін. Акрамя таго, песня разышлася накладам у 80 000 копій за першы дзень. У галоўным амерыканскім чарце US Billboard Hot 100 сінгл дэбютаваў з 6 радка, а таксама ўзначаліў чарт Billboard Digital Sales, што грунтуецца на чыстых продажах, якія за першы тыдзень склалі 188 000 копій. 28 студзеня 2017 года адбылася прэм’ера відэакліпа на песню, рэжысёрам якога выступіў Грант Сінгер. Дзякуючы гэтаму 30 студзеня I Don’t Wanna Live Forever дасягнула топ-5 чарта US Billboard Hot 100, на наступным тыдні паднялася да 3 месца, а 21 лютага — да другога.

2017—2018: Reputation

Свіфт падчас Reputation Stadium Tour

У канцы жніўня 2017 года Тэйлар выдаліла ўсе запісы і фотаздымкі ў сацыяльных сетках, што выклікала бурнае абмеркаванне ў грамадстве і чуткі пра хуткі анонс новага матэрыялу спявачкі. 23 жніўня Свіфт паведаміла, што рэліз яе шостага студыйнага альбома Reputation адбудзецца 10 лістапада. На наступны дзень была прэзентаваная вокладка будучага альбома, а ў хуткім часе стала вядома, што на пласцінцы будзе 15 песень.

Адразу пасля рэлізу альбом быў даступны выключна для легальнага спампавання, і яго некалькі тыдняў нельга было праслухаць на стрымінгавых сэрвісах. У выніку Reputation узначаліў iTunes ЗША за 6 хвілін, тым самым усталяваўшы новы рэкорд. У хуткім часе альбом дасягнуў вяршыні чартаў яшчэ ў 106 краінах, улічваючы і Беларусь. Праз тое, што пласцінка выклікала велізарны ажыятаж, сервер iTunes некаторы час быў перагружаны, спрабуючы забяспечыць новым альбомам спявачкі больш за 800 000 чалавек, што прывяло да ўзнікнення тэхнічных непаладак. Праз тры дні пасля рэлізу Reputation атрымаў срэбную сертыфікацыю ў Вялікабрытаніі, а праз чатыры — плацінавую ў ЗША. Таксама за тыдзень альбом стаў залатым у Новай Зеландыі і плацінавым у Канадзе. У «Billboard 200» альбом дэбютаваў з вяршыні з продажамі ў 1 216 000 копій. Такім чынам Тэйлар стала першай спявачкай у гісторыі, 4 альбома якой за тыдзень распрадаліся накладам у 1 мільён копій і болей. У пачатку 2018 года наклад альбома ў ЗША перавысіў 3 мільёны копій.

Першы сінгл у падтрымку Reputation атрымаў назву Look What You Made Me Do і выйшаў 25 жніўня 2017 года. У гэты ж дзень на афіцыйным YouTube-канале выканаўцы выйшла лірык-відэа, а праз два дні на прэміі MTV Video Music Awards быў прэзентаваны афіцыйны кліп. 3 верасня адбылася прэм’ера першай кампазіцыі з трэкліста Reputation — …Ready for It?, якая стала прома-сінглам у падтрымку альбома; 24 кастрычніка песня стала паўнапраўным сінглам, а праз 3 дні выйшаў відэакліп. 14 лістапада песня End Game была адпраўленая на французскія радыёстанцыі, тым самым атрымаўшы статус сінгла; 12 студзеня 2018 года выйшаў відэакліп на песню. 1 сакавіка стала вядома, што трэк Delicate стане наступным сінглам у падтрымку альбома; прэм’ера відэакліпа адбылася 12 сакавіка на прэміі iHeartRadio Music Awards. 30 сакавіка спецыяльна для сэрвісу «Spotify» спявачка выпусціла альтэрнатыўны, вертыкальны, варыянт кліпа. На гэтым жа партале ў хуткім часе з’явілася лайв-версія Delicate і кавер на песню September гурта «Earth, Wind & Fire». 20 красавіка адбыўся рэліз трэка Babe амерыканскага кантры-гурта «Sugarland», які напісала Тэйлар. Акрамя таго, Свіфт з’явілася на кампазіцыі як бэк-вакалістка.

Прома-сінгламі сталі песні Gorgeous і Call It What You Want, якія выйшлі 20 кастрычніка і 3 лістапада 2017 года адпаведна. Акрамя таго, 27 лістапада трэк New Year’s Day зайграў на амерыканскім кантры-радыё. У пачатку снежня Gorgeous стала паўнапраўным сінглам на тэрыторыі Вялікабрытаніі.

Часопіс TIME назваў «Чалавекам года 2017» групу людзей, якія адважыліся расказаць пра сексуальныя дамаганні. Сярод іх апынулася і Свіфт, якая ў жніўні выйграла справу аб сексуальным дамаганні. У сваім артыкуле часопіс Forbes заявіў, што Тэйлар Свіфт стала першым артыстам у гісторыі амерыканскага музычнага рынку, у якога тры розных альбома былі прызнаныя самымі прадаванымі па выніках года (Fearless, 1989 і Reputation). А World Music Awards, у сваю чаргу, афіцыйна пацвердзіў, што Свіфт стала самай паспяховай спявачкай у свеце ў 2017 годзе.

8 мая 2018 года пачаўся першы ў кар’еры Тэйлар стадыённы тур «Reputation Stadium Tour». Да каманды Свіфт на час амерыканскай і еўрапейскай частак тура далучыліся спявачкі Каміла Кабэё і Charli XCX.

Тэйлар была прадстаўленая ў 6 катэгорыях на прэміі MTV Europe Music Awards 2017, улічваючы «Найлепшы відэакліп», але ніводнай узнагароды так і не выйграла. На 60-й цырымоніі прэміі Грэмі Тэйлар атрымала 2 намінацыі: «Найлепшая песня, напісаная для кіно, тэлебачання або іншага візуальнага прадстаўлення» (I Don’t Wanna Live Forever) і «Найлепшая кантры-песня» (як аўтар Better Man), але зноў засталася без узнагарод; на BRIT Awards — 2 намінацыі: «Найлепшая міжнародная выканаўца», «Брытанскі відэакліп года» (I Don’t Wanna Live Forever), і зноў пройгрыш; на iHeartRadio Music Awards — 4 намінацыі: паспяховая «Найлепшая выканаўца» і безвыніковыя «Найлепшы тэкст песні» (Look What You Made Me Do), «Найлепшы кліп» (Look What You Made Me Do), "Найлепшы фандом; на Billboard Music Awards — 5 намінацый: пераможныя «Найлепшая выканаўца», «Найлепшы альбом» (Reputation) і безвыніковыя «Найлепшы артыст», «Найлепшы артыст чарта Billboard 200» і «Найлепшы альбом чарта Billboard 200» (Reputation).

Reputation стаў апошнім альбомам Свіфт, запісаным на лэйбле Big Machine Records: 12-гадовы кантракт спявачкі з ім скончыўся ў лістападзе 2018 года.

2019—2020: Lover

Тэйлар Свіфт на American Music Awards 2019

26 красавіка 2019 года Свіфт выпусціла песню ME!, запісаную пры ўдзеле саліста гурта Panic! At The Disco Брэндана Уры. Незадоўга да гэтага яна пачала пакідаць у сацыяльных сетках намёкі на хуткае вяртанне з новай музыкай. ME! апынуўся лід-сінглам з будучай пласцінкі спявачкі. 13 чэрвеня 2019 года Тэйлар абвясціла ў прамым эфіры Instagram, што яе сёмы альбом будзе называцца Lover. Дыск быў запісаны за тры месяцы, праца над ім завяршылася ў лютым 2019 года. Рэліз другога сінгла You Need To Calm Down адбыўся 14 чэрвеня, а прэм’ера відэакліпа да яго — праз тры дні. У гэтай песні Тэйлар выказала падтрымку ЛГБТ-супольнасці і суправадзіла яе петыцыяй аб роўных правах, звернутай да Белага дома. 23 ліпеня ў iTunes стаў даступны трэк The Archer, які стаў промасінглам у падтрымку новай пласцінкі. 16 жніўня выйшла лірык-відэа на трэці сінгл з альбома — аднайменны Lover. Кліп на яго выйшаў 22 жніўня, за дзень да рэлізу альбома.

Lover усталяваў рэкорд па найбольшай колькасці папярэдніх замоў сярод жанчын у першы дзень на сэрвісе Apple Music, сабраўшы 178 600 заказаў у свеце на гэтай платформе. На 18 чэрвеня гэты лік павялічыўся да 222 400. Сетка Target заявіла, што гэта самы паспяховы альбом па колькасці папярэдніх замоў за ўсю гісторыю кампаніі. Агульныя папярэднія продажы альбома ва ўсім свеце склалі амаль мільён копій.

Прэм’ера Lover адбылася 23 жніўня 2019 года на новым для спявачкі лэйбле Republic Records. Стандартная версія альбома налічвала 18 трэкаў. Свіфт апісала альбом як рамантычны і распавяла пра сваё імкненне апісаць на ім любоў ва ўсіх яе праявах. Фота для вокладкі зрабіла Валерыя Роча. Акрамя асноўнай версіі, для пакупкі былі даступныя чатыры розныя дэлюкс-версіі Lover, якія адрозніваліся бонусным кантэнтам і прома-матэрыяламі.

Тэйлар Свіфт: «Гэты альбом — свята кахання, ва ўсёй яго складанасці, утульнасці і супярэчлівасці. Гэта першы альбом, які мой па-сапраўднаму. Мяне перапаўняе гонар. Я так усхваляваная, што ён выйшаў».

Lover атрымаў станоўчыя водгукі музычнай крытыкі і інтэрнэт-выданняў, сярод якіх: AllMusic, The Daily Telegraph, The Guardian, NME, Rolling Stone, Slant Magazine, Variety, Vendetta Sports Media.

Rolling Stone назваў альбом «усёпаглынальным шэдэўрам». У Vendetta Sports Media пласцінку апісалі як «прамое трапленне, таму што яна поўная музыкі, прывабнай і жаданай». У The New York Times рэліз назвалі «моцным» і «зробленым з добрым густам». Billboard рэзюмаваў альбом як «мудрагелісты, кранальны, хвалюючы», дадаўшы, што гэта «выбітная праца, якая заслугоўвае як стараннага аналізу ў навушніках, так і стадыённага праслухоўвання». Los Angeles Times высока ацаніла эмацыйную сталасць і мудрасць альбома, назваўшы яго «вельмі ўражлівым». Аўтарытэтнае Інтэрнэт-выданне Pitchfork напісала, што Lover — «яркі, вясёлы альбом з вялікай эмацыйнай сумленнасцю». Альбом таксама быў уключаны ў многія выніковыя гадавыя спісы найлепшых дыскаў.

Lover атрымаў узнагароды MTV Video Music Awards, People’s Choice Awards, American Music Awards, ARIA Music Awards, Japan Gold Disc Awards, RTHK International Pop Poll Awards, а таксама апынуўся ў ліку намінатнаў на Грэмі. З гэтым альбомам Тэйлар перамагла ў намінацыі «Поп-альбом года» на iHeart Radio Music Awards і стала самым паспяховым выканаўцам у гісторыі прэміі, атрымаўшы сваю 13-ю ўзнагароду. На Billboard Music Awards Свіфт атрымала 6 намінацый: «Выканаўца года», «Найлепшы жаночы выканаўца», «Найлепшы выканаўца ў альбомным чарце», «Найлепшы альбом», «Найлепшы выканаўца па продажах песень» і «За асаблівыя выдатныя дасягненні ў чартах».

У ЗША было прададзена прыкладна 450 000 копій альбома на працягу аднаго дня, а да канца тыдня ён разышоўся накладам у 750 000 адзінак. Гэта дазволіла яму ўзначаліць нацыянальны чарт. Па выніках года, пласцінка стала галоўным бэстсэлерам года ў краіне. У Канадзе Lover дэбютаваў на першым месцы альбомнага чарта з накладам 47 000 адзінак за першы тыдзень. У Вялікабрытаніі пласцінка стартавала з вяршыні хіт-парадзе з накладам у 53 000 адзінак. У Аўстраліі альбом таксама адразу трапіў на вяршыню мясцовага чарта. У Кітаі Lover стаў першым міжнародным дыскам з накладам больш за 1 000 000 адзінак за адзін тыдзень. Альбом Свіфт стаў самым прадаваным вялікім студыйным запісам 2019 года, патрапіўшы ў Кнігу рэкордаў Гінеса.

13 лістапада 2019 года адбылася прэм’ера рэмікса на сінгл Lover, запісанага пры ўдзеле канадскага спевака Шона Мендэса. 27 студзеня 2020 года песня The Man была адпраўлена на амерыканскія радыёстанцыі як чацвёрты і апошні сінгл з альбома. Праз месяц выйшаў кліп на песню, рэжысёрам якога выступіла сама спявачка.

Свіфт дала некалькі выступаў падчас прома-кампаніі альбома. Яна выканала ME! падчас цырымоніі Billboard Music Awards 2019, а затым у фінале 16 сезона амерыканскай і 8 сезона французскай версій шоў The Voice. Пазней з гэтай песняй Тэйлар з’явілася ў фінале 14 сезона конкурсу Germany’s Next Top Model і на The Graham Norton Show. Спявачка стала хэдлайнерам фестывалю Amazon Prime Day Concert 2019 у Нью-Ёрку, дзе выканала ME! і You Need to Calm Down, а таксама некалькі песень з папярэдніх альбомаў. Яна таксама адкрыла цырымонію MTV Video Music Awards 2019 з міксам з песень You Need To Calm Down і Lover. Трэкі London Boy, Lover, The Archer і You Need to Calm Down Тэйлар выканала на радыёстанцыі BBC Radio 1 у праграме Live Lounge ў верасні 2019. У наступным месяцы яна з’явілася на SNL з трэкамі Lover і False God. 11 кастрычніка яна выканала Lover, The Man, Death by a Thousand Cuts на канцэрце NPR Music у Вашынгтоне. 19 кастрычніка Свіфт выканала сінглы з альбома на дабрачынным мерапрыемстве We Can Survive ў Лос-Анджэлесе. У лістападзе яна выступіла на японскім і кітайскім тэлебачанні. 24 лістапада Свіфт выканала папуры са сваіх галоўных хітоў на цырымоніі American Music Awards 2019. У снежні спявачка з’явілася на калядных фестывалях у Лондане і Нью-Ёрку. 18 красавіка 2020 года Свіфт выканала песню Soon You’ll Get Better на онлайн-канцэрце One World: Together at Home, які збіраў сродкі для барацьбы з COVID-19.

9 верасня 2019 года Свіфт сыграла спецыяльны аднаразовы асабісты канцэрт City of Lover у Парыжы, дзе выканала ME!, The Archer, Death by a Thousand Cuts, Cornelia Street, The Man, Daylight, You Need to Calm Down і Lover, а разам з імі трэкі з папярэдніх альбомаў. Пазней канцэрт быў паказаны на тэлебачанні.

Тэйлар збіралася адправіцца ў фестывальны летні тур Lover Fest, аднак праз пандэмію COVID-19 планы былі адмененыя.

Па-за рамкамі альбома 6 снежня 2019 года спявачка выпусціла калядны сінгл Christmas Tree Farm, які ў той жа дзень узначаліў амерыканскі iTunes. 31 студзеня 2020 года пра Свіфт выйшаў дакументальны фільм «Міс Амерыкана» на Netflix, для якога яна запісала песню Only The Young. Яшчэ адзін саўндтрэк, Beautiful Ghosts, яна стварыла для фільма «Кошкі», дзе выканала другарадную ролю.

2020—2021: Folklore і Evermore

23 ліпеня 2020 года Свіфт абвясціла ў сацыяльных сетках, што заўтра выпускае свой восьмы студыйны альбом Folklore. Пласцінка была створаная на самаізаляцыі падчас пандэміі COVID-19. Тэйлар дыстанцыйна працавала разам з Ааранам Дэснерам з амерыканскага рок-гурта The National, Джэкам Антонафым і калектывам Bon Iver, які таксама з’явіўся на адной з кампазіцый у альбоме. Пласцінка вельмі адрозніваецца ад папярэдняй творчасці спявачкі: трэкі запісаныя ў жанры альтэрнатывы і маюць павольнае гучанне, а іх лірыка кранаецца не толькі асабістых перажыванняў Тэйлар, але і гісторый, якія яна прыдумала. Стандартнае выданне альбома складаецца з 16 трэкаў. Фізічная дэлюкс-версія ўключае адзін бонус-трэк The Lakes; рэліз гэтай песні адбыўся асобна, 18 жніўня. Усяго налічваецца восем дэлюкс-выданняў, кожнае з унікальным напаўненнем. Акрамя іх — 8 розных вінілаў, якія былі даступны толькі на працягу тыдня. Пазней Тэйлар патлумачыла, што ў яе прадстаўленні ўсе песні альбома складаюцца ў часткі ў залежнасці ад таго, як яны падыходзяць адна адной па тэме. 21 жніўня Свіфт выпусціла першую частку Folklore — «уцёкі ад рэчаіснасці», а праз тры дні выйшла другая частка «бяссонныя ночы». Трэцяя частка «вясковая хатка» з’явілася 27 жніўня, а заключная чацвёртая «я з’явіўся на тваёй вечарыне» — 21 верасня.

На ўсе песні з Folklore былі створаны лірык-відэа. У дзень прэм’еры альбома таксама адбыўся рэліз кліпа на трэк Cardigan, які стаў лід-сінглам з пласцінкі. Рэжысёрам выступіла сама спявачка. Сінгл апынуўся на першым месцы чарта Аўстраліі. У гэтай краіне Тэйлар усталявала гістарычны рэкорд: усе 16 песень з альбома Folklore дэбютавалі ў нацыянальным чарце краіны, што стала найлепшым вынікам у гісторыі. Акрамя таго, 5 трэкаў дасягнулі вяршыняў дзясяткі. У Новай Зеландыі Cardigan апынуўся на 2 радку. У Вялікабрытаніі песня дасягнула 6 пазіцыі; таксама ў хіт-парад краіны трапілі трэкі Exile (№ 8) The 1 (№ 10). Свіфт стала першай жанчынай у гісторыі каралеўства, якая дэбютавала адразу з 3 песнямі ў топ-10 нацыянальнага чарта. Аналагічны гістарычны рэкорд Тэйлар усталявала ў Ірландыі.

Як другі сінгл была абрана калабарацыя з Bon Iver — Exile. Трэк зайграў на альтэрнатыўным радыё 3 жніўня. А ў кантры-эфіры ў якасці сінгла з’явілася кампазіцыя Betty.

Тэйлар Свіфт: «Большасць рэчаў, якія я планавала на гэтае лета, у канчатковым выніку не адбылася, але ёсць сёе-тое, чаго я не планавала, але яно ўсё ж здарыцца. І гэта мой восьмы студыйны альбом, „folklore“. Сюрпрыз. Сёння апоўначы я выпушчу новы альбом з песень, у якія я ўклала ўсе свае капрызе, мары, страхі і разважанні».

Нечаканы рэліз незапланаванага альбома апынуўся для Свіфт вялікім поспехам. Яна ўсталявала мноства рэкордаў і атрымала станоўчыя водгукі ад крытыкаў. Пласцінка была праслухана 80 600 000 разоў за першыя суткі на Spotify. Гэта найлепшы вынік сярод жанчын і другі ў гісторыі сэрвісу. Тэйлар стала першай жанчынай у гісторыі, якая заняла ўвесь топ-16 Spotify ЗША, акупаваўшы яго з усімі сваімі песнямі з Folklore. Таксама ўсе песні ўвайшлі ў топ-25 сусветнага аддзялення Spotify. Акрамя таго, Свіфт стала самым паспяховым выканаўцам на Spotify за адны суткі ў 2020 годзе, набраўшы 96 800 000 праслухванняў. Трэк The 1 быў праслуханы 4 175 000 разоў на Spotify ЗША за першыя суткі, гэта найлепшы дэбют сярод спявачак за ўсю гісторыю. Акрамя таго, песня ўзначаліла сусветны чарт Apple Music. За адзін дзень Folklore пераадолеў парог у 100 000 000 праслухванняў на Spotify — хутчэй, чым які-небудзь іншы жаночы альбом у гісторыі сэрвісу. У канцы верасня пласцінка набрала ўжо мільярд стрымаў, і Тэйлар стала першай жанчынай у гісторыі Spotify, у якой 6 альбомаў пераадолелі дадзеную адзнаку праслухванняў на платформе.

У Кітаі было прададзена 706 690 копій альбома за першы дзень. Гэта найлепшы вынік сярод замежных выканаўцаў за ўсю гісторыю краіны. Усе 16 песень занялі топ-16 чарта Apple Music Кітая. Акрамя таго, у гэтай краіне сінгл Cardigan быў прададзены ў колькасці 1 000 000 копій усяго за тры дні. Па выніках сямі дзён пласцінка стала самай прадаванай у Кітаі за год.

Усе відэа ў падтрымку альбома на YouTube набралі звыш 44 000 000 праглядаў за першыя суткі. На гэтай жа пляцоўцы музычнае відэа на сінгл Cardigan атрымала звыш 15 400 000 праглядаў і 1 100 000 лайкаў за першыя суткі. На Apple Music за 24 гадзіны пласцінка сабрала 35 470 000 праслухоўванняў. Таксама яна стала самым паспяховым дэбютам альтэрнатыўнага альбома на Amazon Music.

Такім чынам, Тэйлар усталявала рэкорды найбуйнейшага жаночага дэбюту на Spotify, YouTube і Apple Music.

Сусветныя продажы альбома за першыя суткі перавысілі адзнаку ў 1 300 000 копій. За тры дні пласцінка разышлася накладам у 500 000 копій у ЗША, усталяваўшы тым самым рэкорд 2020 года. Альбом таксама ўзначаліў рэкордную ў гэтым годзе для жанчын колькасць чартаў Apple Music — 76 краін.

Па выніках тыдня Folklore дэбютаваў з вынікам у 337 426 690 праслухванняў на сусветным Spotify. Гэта найлепшы вынік за 2020 год і самы паспяховы старт альтэрнатыўнага альбома ў гісторыі сэрвісу. Сама Тэйлар за гэты час была праслуханая 433 000 000 разоў на сэрвісе, што стала найлепшым жаночым вынікам у гісторыі платформы. Акрамя таго, яна стала першай жанчынай, якая заняла топ-10 амерыканскага Spotify за тыдзень. Таксама Свіфт усталявала рэкорд у гісторыі азіяцкага Spotify. Яе альбом Folklore дэбютаваў з 20 003 421 праслухваннем на тэрыторыі Філіпін за першы тыдзень. Гэта не толькі найлепшы вынік у гісторыі краіны, але і найлепшы вынік сярод усіх азіяцкіх краін на сэрвісе за ўвесь час.

Усяго за адзін тыдзень альбом Folklore стаў адным з самых папулярных за год; яго вынік склаў больш 2 000 000 прададзеных копій.

Пласцінка дэбютавала з першага радка ў нацыянальных чартах Вялікабрытаніі, Аўстраліі, Новай Зеландыі, Канады, Нарвегіі, Бельгіі і іншых. Таксама Тэйлар стала першай выканаўцай за стагоддзе, чые 6 альбомаў узначалілі хіт-парад Ірлындыі. Folklore дэбютаваў з першага радка чарта ЗША Billboard 200 з накладам у 846 000 прададзеных копій; 615 000 з іх — чыстыя. Гэта найлепшы вынік з часоў папярэдняга альбома Свіфт Lover. Такім чынам, спявачка паўтарыла рэкорд The Beatles, у якіх 7 альбомаў былі прададзеныя тыражом ад 500 000 копій за першы тыдзень у ЗША. Пласцінка пратрымалася на вяршыні 8 тыдняў, што стала найлепшым вынікам за 2020 год сярод усіх выканаўцаў. Акрамя таго, гэта найлепшы вынік сярод альтэрнатыўных жаночых альбомаў за апошняе стагоддзе. Таксама Свіфт устанавіла новы гістарычны рэкорд, стаўшы першай жанчынай, якая за кар’еру правяла 47 тыдняў на вяршыні альбомнага чарта Billboard 200.

Усе 16 песень з альбома Folklore дэбютавалі ў Billboard Hot 100, прычым лід-сінгл Cardigan яго ўзначаліў, трэк The 1 апынуўся на 4 радку, а песня Exile заняла 6 месца. Тэйлар стала першым выканаўцам з часоў Лорд, які адначасова ўзначаліў хіт-парады Billboard Hot 100 і Hot Rock & Alternative Songs. Таксама яна стала першым чалавекам у гісторыі, які за адзін тыдзень дэбютаваў з першага радка ў Billboard Hot 100 (сінглавы чарт) і Billboard 200 (альбомны чарт). У гэты ж момант Тэйлар усталявала найлепшы жаночы вынік па колькасці песень, якія ўвайшлі ў чарт Billboard Hot 100 за ўсю яго гісторыю, — 113.

17 верасня Тэйлар выступіла з песняй Betty на Academy of Country Music Awards. На гэтай цырымоніі спявачка з’явілася ўпершыню за апошнія 7 гадоў.

Агульная ацэнка Folklore складае 89 балаў. Гэта найлепшы рэзультат у кар’еры спявачкі. Часопіс TIME назваў Свіфт найвялікшай поп-зоркай сучаснасці. У Rolling Stone Folklore назвалі «самым лепшым альбомам Свіфт на дадзены момант» і «дэбютным альбомам цалкам новай Свіфт», у якім яе «апавядальная сфера адкрылася з шырокім спектрам персанажаў для сямнаццаці песень без прахадных элементаў». Часопіс рэзюмаваў, што Свіфт «прыдумала мноства персанажаў для таго, каб захаваць сваю кампанію ў альбоме», дзе «ўступленне ў іх жыццё раскрывае яе глыбокі досціп і спачуванне». BBC вызначылі Folklore як «індзі-альбом Свіфт», які ўяўляе сабой «багаты пласт меланхоліі, ідэальна спалучаецца з часам». The Daily Telegraph вызначыў Folklore як «вытанчаную калекцыю з 16 даўнтэмпа-песень пра каханне, страты, памяць, мары, сяброўства і нашу нязменную патрэбу ў чалавечай сувязі», якія ўмацоўваюць «статус Свіфт як сур’ёзнага аўтара-выканаўцы песень». Пласцінку таксама высока ацанілі ў NME, The Guardian, The Independent і The Sydney Morning Herald. Брытанскае выданне Vogue уключыла рэліз Folklore у спіс найлепшых рэчаў, якія адбыліся за перыяд ізаляцыі.

На прэміі People Choice Awards 2020 Тэйлар атрымала тры намінацыі: «Спявачка года», «Альбом года» (Folklore), «Саўндтрэк года» (Only The Young) і перамагла ў апошняй. На Billboard Music Awards 2020 у артысткі было 6 намінацый, але ні адна з іх не аказалася трыумфам. На American Muisc Awards 2020 Тэйлар атрымала 4 намінацыі: галоўную «Артыст года», а таксама «Любімая выканаўца ў жанры поп/рок», «Любімае музычнае відэа» (Cardigan) і «Любімы альбом у жанры поп/рок» (Folklore). Свіфт перамагла ў першых трох і такім чынам стала самым паспяховым артыстам за ўсю гісторыю прэміі з 32 узнагародамі. Акрамя таго, падчас цырымоніі Тэйлар паведаміла, што пачала перазапісваць свае першыя 6 студыйных альбомаў.

На прэміі Грэмі Свіфт атрымала 6 намінацый: галоўныя «Альбом года» (Folklore) і «Песня года», а таксама «Найлепшы вакальны поп-альбом» (Folklore), «Найлепшае сумеснае поп-выкананне» (Exile), «Найлепшае сольнае поп-выкананне» (Cardigan) і «Найлепшая песня для візуальных медыя» (Beautiful Ghosts). У выніку Тэйлар узяла ўзнагароду за «Альбом года» і стала першай спявачкай з трыма перамогамі ў гэтай намінацыі.

13 лістапада Тэйлар разам з Полам Мак-Картні з’явілася на вокладцы часопіса Rolling Stone, прысвечанай спецыяльнаму выпуску «Muscians on Musicians». У гэтым выпуску артысты абмеркавалі свае падыходы да напісання кампазіцый, стварэння альбомаў і арганізацыі тураў.

25 лістапада на сэрвісе Disney+ спявачка прэзентавала дакументальны фільм аб стварэнні альбома Folklore.

Выданні TIME, Billboard, Insider, Los Angeles Times і іншыя назвала альбом Folklore найлепшым у 2020 годзе. BBC дадала пласцінку ў свой артыкул, прысвечаны найлепшым альбомам 2020 года, апісаўшы яе як «надзвычайную».

10 снежня Тэйлар Свіфт анансавала выхад новага альбома — Evermore. Рэліз праекта з 15 песень, сярод якіх апынуліся калабарацыі з HAIM, The National і Bon Iver, адбыўся на наступны дзень. Пласцінка стала ідэйным і музычным працягам Folklore. У дэлюкс-версію Evermore увайшлі дзве дадатковыя кампазіцыі.

Рэліз Evermore — гэта падарунак Тэйлар для фанатаў з нагоды яе дня нараджэння.

Тэйлар Свіфт: «З 13 гадоў я чакала таго моманту, калі мне споўніцца 31 год, таму што гэта мой шчаслівы лік. І я вырашыла здзівіць вас. Вы былі такімі клапатлівымі, падтрымлівалі мяне і былі ўважлівыя да мяне ў мае дні нараджэння, таму на гэты раз я вырашыла, што сама падару вам што-небудзь».

З выхадам альбома адбыўся і рэліз кліпа на трэк Willow, які быў абраны ў якасці лід-сінгла з Evermore. За гэта працу Тэйлар пасля атрымала 4 намінацыі на прэміі Video Music Awards: «Выканаўца года», «Найлепшае поп-відэа», «Найлепшая рэжысура», «Найлепшая мастацкая праца».

Evermore стаў паспяховым ва ўсім свеце. Ён набраў больш за 66 мільёнаў праслухоўванняў на глабальнай пляцоўцы Spotify за першы дзень. Гэта трэці найлепшы вынік сярод жаночых альбомаў у гісторыі. За першы тыдзень Evermore праслухалі больш за 260 мільёнаў разоў на тым жа сэрвісе. Гэта другі найлепшы вынік сярод выканаўцаў за 2020 год.

У выніку Evermore дэбютаваў з першага радка ў амерыканскім чарце Billboard 200. Наклад склаў 329 тысяч прададзеных асобнікаў на тэрыторыі ЗША без уліку продажаў ад CD-дыскаў, вінілавых пласцінак і касет. Лід-сінгл Willow заняў вяршыню Billboard Hot 100. Для Тэйлар ён стаў сёмым нумарам адзін у гэтым хіт-парадзе. Акрамя таго, усе 15 песень з Evermore увайшлі ў Billboard Hot 100. Альбом таксама ўсталяваў самы высокі паказчык па продажах вінілавых пласцінак у ЗША за ўсю гісторыю — 102 тысячы копій за тыдзень.

Evermore атрымаў станоўчыя ацэнкі ад музычных крытыкаў. Яго сярэдні бал на Metacritic складае 88 балаў. Таксама ён трапіў у намінацыю «Альбом года» на «Грэмі».

Па выніках 2020 года Тэйлар Свіфт атрымала ўзнагароду найлепшага аўтара песень ад Apple Music Awards і стала другім самым прадаваным выканаўцам у свеце паводле звестак IFPI. У сваю чаргу Billboard паведаміў, што Свіфт апынулася самым высокааплатным музыкам у ЗША.

з 2021 года: перазапісы

Fearless (Taylor’s Version)

11 лютага 2021 года Тэйлар Свіфт анансавала выхад альбома Fearless (Taylor’s Version). З гэтага пачаўся перыяд перазапісаў арыгінальных альбомаў спявачкі, на якія яна страціла правы праз канфлікт з менеджарам Скутэрам Браўнам і кіраўніцтвам свайго мінулага лэйбла. Акрамя перазапісаных старых песень, Тэйлар вырашыла дадаць у новую версію альбома нявыдадзеныя кампазіцыі, якія першапачаткова прызначаліся для яго. Такім чынам, у Fearless (Taylor’s Version) трапілі 26 трэкаў.

12 лютага выйшла адноўленая песня Love Story (Taylor’s Version). Яна стала лід-сінглам з будучага альбома. Кампазіцыя дэбютавала з 7 мільёнамі праслухоўванняў на Spotify за першы дзень. Гэта найлепшы паказчык у жанры кантры ў гісторыі.

19 лютага адбылася прэм’ера сумеснай песні гурта HAIM і Тэйлар Свіфт Gasoline.

15 сакавіка спявачка прысутнічала на прэміі «Грэмі» і выканала адразу 3 песні: Cardigan, August і Willow.

26 сакавіка Свіфт выпусціла другі сінгл з альбома Fearless (Taylor’s Version). Ім стала раней не выдадзеная песня You All Over Me, запісаная пры ўдзеле Марэн Морыс. 7 красавіка выйшла яшчэ адна новая песня — Mr. Perfectly Fine.

9 красавіка выйшаў у свет першы перазапісаны альбом Тэйлар Свіфт — Fearless (Taylor’s Version). Ён набраў больш за 50 мільёнаў праслухоўванняў на Spotify за першыя суткі. Гэта найлепшы вынік для кантры-альбомаў у гісторыі платформы.

Альбом узначаліў нацыянальны чарт Вялікабрытаніі, перасягнуўшы вынік арыгінала. Свіфт пабіла рэкорд The Beatles, які трымаўся 54 гады: 3 яе розныя пласцінкі ўзначалілі хіт-парад Злучанага Каралеўства за 259 дзён, адпаведны рэкорд The Beatles складаў 364 дні. Fearless (Taylor’s Version) стартаваў з вяршыні амерыканскага чарта Billboard 200. Яго наклад ў краіне за першы тыдзень склаў 291 тысячу копій, што стала рэкордам у 2021 годзе на той момант.

За поспехі ў чартах Тэйлар Свіфт атрымала 4 намінацыі на Billboard Music Awards: «Выканаўца года», «Найлепшы выканаўца ў чарце Billboard 200», «Спявачка года», «Найлепшы альбом у чарце Billboard 200» (Folklore). У першых дзвюх катэгорыях яна перамагла. Пазней Свіфт была ўручана ўзнагарода «Сусветнай іконы» на BRIT Awards. Яна стала першай жанчынай і самым маладым лаўрэатам гэтай унікальнай прэміі.

Red (Taylor’s Version)

18 чэрвеня 2021 года Тэйлар Свіфт анансавала выхад другога перазапісанага альбома Red (Taylor’s Version). Яго прэм’ера была прызначана на 19 лістапада, аднак пазней яе перанеслі на тыдзень раней.

У альбом увайшлі 30 кампазіцый, улічваючы 8 нявыдадзеных песень, дзесяціхвілінную версію All Too Well і калабарацыі з Эдам Шыранам, Фібі Брыджэрс, а таксама Крысам Стэплатанам. Да рэлізу пласцінкі не выйшла ні аднаго сінгла.

2 ліпеня адбылася прэм’ера сумеснай песні гурта Big Red Machine і Тэйлар — Renegade. На альбоме калектыву апынуўся яшчэ адзін трэк, у запісе якога прыняла ўдзел Свіфт, — Birch.

24 ліпеня адбылася прэм’ера арыгінальнай версіі песні The Lakes з альбома Folklore з аркестравай аранжыроўкай. Рэліз быў прымеркаваны да гадавіны пласцінкі. 17 верасня Тэйлар раптам прадставіла перазапісаны трэк Wildest Dreams з альбома 1989. Яна няпланава выпусціла ўласную версію песні, таму што яна набыла папулярнасць у TikTok.

Red (Taylor’s Version) выйшаў на ўсіх лічбавых пляцоўках 12 лістапада 2021 года. Перазапіс набыў камерцыйны поспех ва ўсім свеце. Альбом дэбютаваў з вынікам у 90 мільёнаў праслухванняў на Spotify за першыя суткі. Гэта найлепшы дэбют жаночага альбома на платформе за ўвесь час. Раней рэкорд належаў альбому Свіфт Folklore.

Red (Taylor’s Version) узначаліў хіт-парад Billboard 200, прадаўшыся ў колькасці 605 тысяч копій за тыдзень. Таксама альбом пабіў рэкорд па чыстых продажах за тыдзень у 2021 годзе і па продажах вінілу за ўвесь час. Такім чынам, Тэйлар стала першым артыстам, восем альбомаў якога прадалі паўмільёна копій за тыдзень у ЗША. Пласцінка таксама ўзышла на вяршыні чартаў Аўстраліі, Канады, Вялікабрытаніі, Новай Зеландыі і Ірландыі.

Red (Taylor’s Version) атрымаў усеагульнае прызнанне крытыкаў. На агрэгатары Metacritic ён набраў 91 бал, што стала найлепшым вынікам у кар’еры спявачкі.

12 лістапада выйшаў кароткаметражны фільм Тэйлар Свіфт All Too Well. Ён стаў візуалізацыяй аднайменнай песні. Галоўныя ролі ў карціне выканалі Сэйдзі Сінк і Дылан О’Браен.

Дзесяціхвілінная версія кампазіцыі All Too Well узначаліла глабальны чарт Spotify, набраўшы больш за 6 з паловай мільёнаў праслухоўванняў праз платформу за першыя суткі. У выніку песня ўзначаліла чарт Billboard Hot 100. Яна ўстанавіла новы рэкорд як самая працяглая кампазіцыя на вяршыні рэйтынгу (10 хвілін і 13 секунд). Трэк таксама быў прызнаны адным з найлепшых у 2021 годзе такімі выданнямі, як Daily Mail і Glamour.

15 лістапада адбылася прэм’ера музычнага відэа I Bet You Think About Me. Рэжысёрам кліпа выступіла актрыса Блэйк Лайвлі.

Па выніках 2021 года Тэйлар Свіфт заняла другі радок у рэйтынгу самых прадаваных артыстаў свету ад IFPI. Таксама яна была аб’яўлена самай паспяховай спявачкай на Spotify. Акрамя таго, Свіфт стала самай папулярнай спявачкай, а дзесяціхвіліннае All Too Well — самай папулярнай песняй на партале Genius па выніках 2021 года. Billboard назваў Тэйлар Свіфт найвялікшай поп-зоркай 2021 года. Выданне пастанавіла: «Тэйлар Свіфт перапісала правілы індустрыі і правяла адзін з самых уражлівых гадоў у сваёй легендарнай поп-кар’еры, нават не выпусціўшы зусім новага альбома».

11 лютага 2022 года Тэйлар з’явілася на рэміксе песні Эда Шырана The Joker And The Queen. Трэк заняў 2 месца ў чарце Вялікабрытаніі.

Midnights

21 кастрычніка 2022 года выйшаў дзясяты студыйны альбом спявачкі Midnights. У ім яна эксперыментавала з электронікай і стылем чыл-аўт. Крытыкі Rolling Stone назвалі альбом «імгненнай класікай». У камерцыйным плане Billboard назваў альбом блокбастэрам, а CNBC назваў яго самым вялікім поспехам Свіфт. Пабіўшы рэкорды ва ўсіх фарматах спажывання музыкі, Midnights і яго вядучы сінгл Anti-Hero сталі альбомам і песняй з найбольшай колькасцю трансляцый за адзін дзень у Spotify са 185 мільёнамі^{[што гэта?]} і 17,4 мільёнамі прайграванняў. Альбом дэбютаваў на вяршыні Billboard 200 з 1,57 мільёнам адзінак і стаў пятым альбомам Свіфт, які адкрыўся з больш за мільёнам прададзеных копій. Яна зраўнялася з Барбрай Стрэйзанд па колькасці альбомаў нумар адзін сярод жанчын (11) і стала першай выканаўцай у гісторыі, якая манапалізавала ўвесь топ-10 Hot 100 з «Anti-Hero», «Lavender Haze», «Maroon» і «Снег на пляжы» з удзелам Ланы дэль Рэй у першай чацвёрцы. Тэйлар Свіфт адправіцца ў Eras Tour у 2023 годзе; ён пабіў рэкорд па колькасці білетаў на канцэрт, калі-небудзь прададзеных за адзін дзень. Тым не менш, Ticketmaster быў шырока асуджаны за тое, што кіраваў продажам тураў, што выклікала ўрадавыя расследаванні ў дачыненні да кампаніі.

Асабістае жыццё

Сям’я

Малодшы брат Свіфт, Осцін, скончыў Універсітэт Нотр-Дам. У снежні 2014 года ў маці Свіфт дыягнаставалі рак.

Тэйлар — хросная маці малодшага сына (нарадзіўся 16.07.2015) рэжысёра Кайла Ньюмана і актрысы Джэймі Кінг.

Рэзідэнцыі

Для сваіх бацькоў Свіфт набыла чатырохспальны асабняк, размешчаны ў Бэле Мідзе, штат Тэнэсі. Галоўнай рэзідэнцыяй самой Свіфт з’яўляецца пентхаус, размешчаны ў Трайбэке, у ваколіцах Нью-Ёрк Сіці. Таксама ёй належаць трохспальны катэдж у Каліфорніі, пентхаус, размешчаны ў Нэшвіле, Тэнэсі, васьміспальневы дом, які знаходзіцца ў Уотч-Хілі, Род-Айлендзе.

Блізкія зносіны

З ліпеня па кастрычнік 2008 года спявачка сустракалася з удзельнікам гурта Jonas Brothers Джо Джонасам.

У 2009 годзе з кастрычніка па снежань Тэйлар сустракалася з Тэйларам Лотнерам, вядомым па фільме «Змярканне». Разам яны зняліся ў рамантычнай камедыі «Дзень Святога Валянціна». Калі яны рассталіся, Тэйлар прысвяціла яму песню Back to December.

У 2010 раскрыўся раман Тэйлар Свіфт з Джэйкам Джыленхалам.

З ліпеня па верасень 2012 года спявачка была ў адносінах з Конарам Кенэдзі.

З кастрычніка 2012 па студзень 2013 года Тэйлар сустракалася з удзельнікам гурта One Direction Гары Стайлсам.

З 2015 года Тэйлар сустракалася з дыджэем Кельвінам Харысам. Першыя чуткі пра раман з’явіліся ў сакавіку, калі пара стала часта з’яўляцца на публіцы разам, трымаючыся за рукі. Таксама яны пабывалі на адным з канцэртаў разам і, па словах відавочцаў, ні на крок не адыходзіліся адзін ад аднаго. У маі пачалі хадзіць чуткі пра тое, што пара ўжо падумвае пра вяселле, але афіцыйнага пацверджання ад Тэйлар або Кельвіна не было. У ліпені пачала распаўсюджвацца інфармацыя пра заручыны пары. Тэйлар і Кельвін сталі самай высокааплатнай парай у 2015 годзе. У маі 2016 года пара рассталася.

У маі 2016 года Тэйлар пазнаёмілася з брытанскім акцёрам Томам Хідлстанам. У чэрвені з’явіліся першыя сумесныя здымкі пары з адпачынку на Род-Айлендзе. У верасні было абвешчана, што Тэйлар і Том рассталіся.

У маі 2017 года распаўсюдзіліся чуткі пра раман Свіфт з пачынаючым брытансім акцёрам Джо Элвінам. 1 чэрвеня пару заўважылі ў аэрапорце, а праз некалькі дзён — на балконе ў доме Тэйлар. Неўзабаве інфармацыя пра іх раман пацвердзілася.

Інцыдэнт на MTV VMA 2009 і яго наступствы

На цырымоніі ўзнагароджання MTV Video Music Awards 2009 Тэйлар з кліпам на You Belong With Me перамагла катэгорый «Найлепшае жаночае відэа», адной з галоўных намінацый прэміі. Яе выступленне з падзячнай прамовай перапыніў рэпер Канье Уэст. Ён выбег на сцэну, адабраў мікрафон у Тэйлар і сказаў, што перамогу заслугоўвала відэа Беёнсэ Single Ladies (Put a Ring on It). Гэтая выхадка была негатыўна ўспрынята аўдыторыяй. Затым Уэст вярнуў мікрафон збянтэжанай і цалкам засмучанай Свіфт, якая не здолела завяршыць сваю прамову. За свае дзеянні Канье быў выправаджаны з цырымоніі.

З тых часоў паміж выканаўцамі усталявалася працяглая варожасць, якая суправаджаецца рознымі скандаламі. Сярод самых гучных — выпадак 2016 года. Тады Уэст у сваёй песні Famous назваў Тэйлар «сукай, якую ён зрабіў знакамітай» і ў кліпе на трэк выкарыстаў аголеную васковую фігруру спявачкі. Спявачка адразу ж выказала сваё абурэнне, што выклікала шырокі грамадскі рэзананс. Пасля гэтага жонка рэпера Кім Кардаш’ян апублікавала незаконна запісаную тэлефонную размову Канье і Тэйлар, у якім Свіфт нібыта дазваляе Уэсту абражаць сябе ў песні. Пазней было даказана, што запіс быў змантаваны.

Адсылкі да Уэста і сутычак з ім ёсць у альбомах Тэйлар Speak Now, Reputation, Lover і Folklore

Справа аб сексуальным дамаганні

2 чэрвеня 2013 года падчас сустрэчы Тэйлар з фанатамі радыё-дыджэй Дэвід Мюлер задраў Свіфт спадніцу і схапіў яе за ягадзіцы. Пасля гэтага ахова вывела мужчыну з залы, а праз некалькі дзён кіраўніцтва радыё звольніла яго.

Праз два гады, у верасні 2015 года, Дэвід Мюлер падаў на Тэйлар у суд. У пазове гаварылася, што Мюлер не чапаў спявачку і яна зблытала яго з іншым чалавекам. Мужчына абвінавачваў Тэйлар у паклёпе, наўмысным умяшанні ў кантракт і дзелавыя адносіны. Ён патрабаваў ад Свіфт грашовую кампенсацыю за страту працы (па некаторых дадзеных, сума складала каля 3 мільёнаў долараў).

Праз месяц Тэйлар падала на яго сустрэчны пазоў аб сексуальным дамаганні. Спявачка сцвярджала, што дакладна ведае, што вінаватым быў менавіта Мюлер. У адпаведнасці з мясцовым заканадаўствам, пакаранне за сексуальнае дамаганне можа скласці да двух гадоў пазбаўлення волі, аднак справа Свіфт і Мюлера не з’яўлялася крымінальнай. Свіфт таксама паабяцала, што калі яна выйграе справу, то ўсе выйграныя грошы пойдуць у дабрачынныя арганізацыі, якія абараняюць правы жанчын, якія пацярпелі праз сексуальныя дамаганні.

Тэйлар Свіфт: «Прама перад тым момантам, калі трэба было сфатаграфавацца, ён залез сваёй рукой да мяне пад сукенку і схапіў мяне за ягадзіцы. Я спрабавала адысці, але ён працягваў трымаць сваю руку. Ён зрабіў гэта спецыяльна, я ўпэўненая ў гэтым. Памятаю, што ніколі яшчэ не адчувала сябе настолькі сумнай, расчараванай і абражанай. Сустрэча з фанатамі павінна быць тым месцам, дзе ты дзякуеш людзям за тое, што яны прыйшлі на твой канцэрт. Я была проста агаломшаная».

Першапачаткова мужчына сцвярджаў, што ўвогуле не дакранаўся да Свіфт, а потым змяніў свае паказанні і заявіў, што, магчыма, дакрануўся да яе выпадкова.

У чэрвені 2017 года суд часткова адхіліў пазоў Дэвіда Мюлера супраць Тэйлар. Аднагадовы тэрмін даўніны для пазову аб паклёпе ўжо даўно скончыўся да таго часу, калі Мюлер падаў яго ў 2015 годзе. Суддзя таксама пастанавіў, што астатняя частка пазову Мюлера супраць Тэйлар будзе разглядацца далей.

Судовае разбіральніцтва пачалося 7 жніўня 2017 года і павінна было скончыцца праз дзесяць дзён. Але ўжо 15 жніўня прысяжныя прызналі Мюлера вінаватым і адхілілі ўсе яго пазовы.

Страчаныя правы на музыку

Дагавор Свіфт з лэйблам Big Machine Records, на якім яна пачала кар’еру, скончыўся ў лістападзе 2018 года. Спявачка перайшла на Republic Records, які належыць адной з найбуйнейшых кампаній у індустрыі Universal Music Group, і заключыла кантракт, які не толькі замацаваў за ёй правы на ўсе будучыя запісы, але і абавязаў Universal дзяліцца даходамі ад продажу акцый Spotify з усімі сваімі артыстамі. Гэта стала працягам барацьбы Тэйлар супраць абясцэньвання працы музыкаў.

Высветлілася, што Свіфт, падпісваючы кантракт у падлеткавым узросце, аддала правы на майстарынг-запісы прадзюсару. Пасля заканчэння дагавора ён супраць яе волі прадаў іх старонняму чалавеку. Ім апынуўся медыямагнат Скутэр Браўн. Ён супрацоўнічаў, акрамя іншага, з Канье Уэстам — даўнім апанентам Свіфт. Абвінавачванні Тэйлар у адрас Браўна і былых партнёраў сталі адной з галоўных тэм, якія абмяркоўваліся ў заходніх СМІ, што пішуць пра шоў-бізнэс.

Кампанія Скутэра Браўна выкупіла за 300 мільёнаў долараў лэйбл Big Machine Records, на якім Тэйлар Свіфт выпусціла першыя шэсць альбомаў. Пасля здзелкі права на майстарынг-копіі шасці альбомаў Свіфт перайшлі да лэйбла Браўна, з якім у выканаўцы склаліся напружаныя адносіны. У сваім блогу на Tumblr яна распавяла, што даведалася аб пераходзе правоў на яе запісы са СМІ, а таксама паскардзілася на цкаванне з боку Браўна. У сваёй публікацыі Свіфт згадала і былога менеджэра, уладальніка Big Machine Records Скота Барчэту. Спявачка адзначыла, што спрабавала выкупіць правы на сваю музыку, але лэйбл прапанаваў ёй вярнуцца назад і «зарабляць» па альбоме за раз — па адным старым за кожны новы. Свіфт адмовілася.

Тэйлар Свіфт: «На працягу многіх гадоў я прасіла, умольвала, каб мне далі магчымасць валодаць правамі на сваю музыку. Замест гэтага мне прапанавалі падпісаць новы кантракт з Big Machine Records, паводле якога я б „зарабляла“ па аднаму старому альбому за кожны запісаны новы. Мне прыйшлося сысці, таму што я ведала, што як толькі кантракт будзе падпісаны, Скот Барчэта прадасць лэйбл, тым самым прадаўшы мяне і маё мінулае. Мне давялося зрабіць пакутлівы выбар, пакінуўшы ўсё, што было ззаду: музыку, якую я напісала на падлозе сваёй спальні, кліпы, якія я прыдумала і аплачвала з грошай, заробленых выступамі ў барах, клубах, а ў наступстве на арэнах і стадыёнах. Цяпер Скутэр зняславіў працу майго жыцця, якую я сама ніколі не мела магчымасці набыць. Па сутнасці, мая музычная спадчына будзе знаходзіцца ў руках чалавека, які першапачаткова спрабаваў яго разбурыць. Для мяне гэта горшы варыянт развіцця падзей. Вось, што адбываецца, калі ты заключаеш кантракт у пятнаццаць гадоў з кімсьці, для каго такое паняцце, як „вернасць“, існуе толькі ў рамках дамовы».

Першапачаткова меркавалася, што Свіфт не зможа больш выконваць свае песні і зарабляць на іх іншым продажы. Аднак юрысты спявачкі знайшлі шчыліну ў дамове: сітуацыю выратавалі нюансы аўтарскага права ЗША. У кантракце, які Тэйлар падпісала пятнаццацігадовай дзяўчынкай, гаворка ішла не аб усіх аўтарскіх правах, а толькі аб правах на майстарынгі — арыгінальныя запісы, з якіх робяць копіі альбомаў. Такім чынам, у лэйбла апынуліся правы на запісаны матэрыял як суцэльны прадукт, а правы на арыгінальную лірыку і аранжыроўку засталіся за Свіфт, бо яна іх аднаасобны аўтар. У сувязі з гэтым яна не будзе атрымліваць адлічэнні за продаж стандартных запісаў, але зможа свабодна выконваць свае песні. Таксама яна зможа запісаць іх зноўку, абясцэніўшы тым самым тыя версіі, якія ў яе адабралі. Менавіта гэтым яна плануе заняцца: спявачка ўжо анансавала перавыпуск сваіх першых альбомаў у змененай форме. Гэтым разам правы на музыку застануцца за ёй.

Заява Свіфт, па выразе часопіса Rolling Stone, справакавала «поп-музычную сусветную вайну». У падтрымку Тэйлар выказаліся спявачкі Холзі, Кеша, Скай Ферэйра і іншыя; Адэль, Рыяна і Майлі Сайрус адпісаліся ад Скутэра Браўна ў Instagram.

17 лістапада 2020 года стала вядома, што Скутэр Браўн прадаў кампаніі Shamrock увесь музычны каталог спявачкі. На прэміі American Music Awards 2020 яна паведаміла, што пачала перазапісваць свае старыя песні, каб супрацьстаяць дзеянням Браўна.

Ацэнкі творчасці

У 2010 годзе спявачка стала лаўрэатам прэміі маладых талентаў імя Хэла Дэвіда. Гэту ўзнагароду атрымліваюць таленавітыя аўтары песень, якія знаходзяцца на вяршыні сваёй кар’еры і аказваюць значны ўплыў на музычную індустрыю дзякуючы сваім песням.

Па заяве iHeart Radio, Тэйлар — другая самая ўплывовая жанчына, якая змяніла музычную індустрыю.

У спісе часопіса Forbes «Самыя маладыя жанчыны Амерыкі, якія стварылі сваю кар’еру самі» Свіфт заняла першы радок. Часопіс Variety у артыкуле «500 самых уплывовых лідараў шоў-бізнесу» адзначыў, што ў Тэйлар ёсць неперасяжная асаблівасць смела супрацьстаяць іншым гігантам індустрыі.

Па выніках другога дзесяцігоддзя XXI стагоддзя, Свіфт была прызнана многімі выданнямі і крытыкамі як адна з найлепшых і найбольш уплывовых артыстах гэтага перыяду. Сярод яе ўзнагарод і статусаў:

• American Music Awards: артыст дзесяцігоддзя;
• Billboard Women In Music: жанчына дзесяцігоддзя;
• YouGov: самы паважаны выканаўца ў свеце;
• YouGov: топ-10 самых паважаных жанчын у свеце;
• Forbes: самая легендарная кантры-выканаўца гэтага стагоддзя;
• Грэмі: тытан поп-музыкі;
• TIME: самая ўплывовая артыстка;
• The Guardian: каралева поп-музыкі;
• Rolling Stone: апошняя са старой школы, хто рухае светам музыкі;
• Refinery29: ключавая жанчына ў гэтым дзесяцігоддзі, якая змяніла правілы гульні музычнай індустрыі;
• Brandwatch: самая ўплывовая жанчынай у Твітэры за 2020 год.
• BRIT Awards: сусветная ікона.

Часопіс Rolling Stone назваў Red найлепшым кантры-альбомам 2010-х гадоў, а выданне «UPROXX» выбрала яго найлепшым жаночым альбомам гэтага дзесяцігоддзя ў агульным. Billboard, у сваю чаргу, назваў Speak Now найлепшым жаночым кантры-альбомам 2010-х гадоў.

Выданне Billboard апублікавала спіс са 100 выканаўцаў з найвялікшымі відэа-працамі за ўвесь час, у якім была прадстаўлена і Тэйлар. Асабліва адзначылі кліпы на You Belong With Me і Delicate: «Музычныя кліпы Тэйлар Свіфт вельмі падобныя на марозіва. Напрыклад, у White Horse класічны ванільны смак, а …Ready For It? — гэта шакаладнае марозіва з кавалачкамі арэхаў унутры. Вы заўсёды зможаце знайсці сабе падыходны відэакліп Тэйлар, у залежнасці ад таго, які смак вам падабаецца і якія эмоцыі вы хочаце спазнаць».

Відэакліп Тэйлар на песню Wildest Dreams з яе студыйнага альбома 1989 быў негатыўна ацэнены некаторымі СМІ, якія абвінавачвалі спявачку ў каланіялізме і расізме. Паводле меркавання Ларэн Дука з уплывовага выдання Huffington Post, відэа рамантызуе эпоху каланіялізму. Ніка Лэнг з партала Daily Dot сцвярджае, што відэакліп спрабуе ўзнавіць класічны галівудскі раман, але ўяўляе сабой класічны галівудскі расізм. Відэакліп на Delicate некаторыя абвінавачвалі ў плагіяце рэкламы «KENZO».

Дыскаграфія

Студыйныя альбомы

Спіс альбомаў з указаннем пазіцыі ў чарце і сертыфікацыі

Назва	Дэталі	Вышэйшая пазіцыя									Сертыфікацыя
		US	AUS	CAN	GER	IRL	NZ	JP	SWE	UK
Taylor Swift	Дата выхаду: 24 кастрычніка 2006. Лэйбл: Big Machine. Фармат: CD, лічбавая дыстрыбуцыя.	5	33	14	—	—	—	53	—	81	US: 7× плацінавы AUS: плацінавы CAN: 2× плацінавы UK: залаты
Fearless	Дата выхаду: 11 лістапада 2008. Лэйбл: Big Machine. Фармат: CD, лічбавая дыстрыбуцыя.	1	2	1	12	7	1	8	12	5	US: брыльянтавы AUS: 7× плацінавы CAN: 4× плацінавы IRL: 2× плацінавы NZ: 3× плацінавы UK: 2× плацінавы JP: залаты
Speak Now	Дата выхаду: 25 кастрычніка 2010. Лэйбл: Big Machine. Фармат: LP, CD, лічбавая дыстрыбуцыя.	1	1	1	15	6	1	6	18	6	US: 6× плацінавы AUS: 2× плацінавы CAN: 4× плацінавы IRL: залаты NZ: плацінавы UK: залаты JP: залаты
Red	Дата выхаду: 22 кастрычніка 2012 Лэйбл: Big Machine. Фармат: CD, лічбавая дыстрыбуцыя.	1	1	1	5	1	1	3	8	1	US: 7× плацінавы AUS: 4× плацінавы CAN: 4× плацінавы IRL: плацінавы NZ: 2× плацінавы UK: 2× плацінавы JP: плацінавы SWE: залаты FR: залаты
1989	Дата выхаду: 27 кастрычніка 2014. Лэйбл: Big Machine. Фармат: CD, лічбавая дыстрыбуцыя.	1	1	1	4	1	1	3	23	1	US: 9× плацінавы AUS: 9× плацінавы CAN: 6x плацінавы NZ: 3x плацінавы UK: 4x плацінавы JP: плацінавы FR: плацінавы SWE: залаты
Reputation	Дата выхаду: 10 лістапада 2017. Лэйбл: Big Machine. Фармат: CD, лічбавая дыстрыбуцыя, стрымінг.	1	1	1	2	1	1	3	2	1	US: 3x плацінавы AUS: 3× плацінавы CAN: плацінавы UK: плацінавы NZ: 3x плацінавы SWE: залаты JP: залаты
Lover	Дата выхаду: 23 жніўня 2019. Лэйбл: Republic. Фармат: CD, LP, лічбавая дыстрыбуцыя, касеты, стрымінг.	1	1	1	2	1	1	3	1	1	US: 2x плацінавы AUS: 2× плацінавы UK: плацінавы NZ: плацінавы
Folklore	Дата выхаду: 24 ліпеня 2020. Лэйбл: Republic. Фармат: CD, LP, лічбавая дыстрыбуцыя, касеты, стрымінг.	1	1	1	8	1	1	8	3	1	US: плацінавы AUS: плацінавы UK: плацінавы NZ: плацінавы
Evermore	Дата выхаду: 11 снежня 2020. Лэйбл: Republic. Фармат: CD, LP, лічбавая дыстрыбуцыя, касеты, стрымінг.	1	1	1	5	2	1	16	3	1	AUS: залаты UK: залаты CAN: залаты NZ: плацінавы
Прочырк «—» азначае адсутнасць у чарце.

Перазапісы

Спіс перазапісаных альбомаў з указаннем пазіцыі ў чарце і сертыфікацыі

Назва	Дэталі	Вышэйшая пазіцыя									Сертыфікацыя
		US	AUS	CAN	GER	IRL	NZ	JP	SWE	UK
Fearless (Taylor’s Version)	Дата выхаду: 9 красавіка 2021. Лэйбл: Republic. Фармат: CD, LP, лічбавая дыстрыбуцыя, касеты, стрымінг.	1	1	1	2	1	1	13	17	1	NZ: залаты UK: сярэбраны
Red (Taylor’s Version)	Дата выхаду: 12 лістапада 2021. Лэйбл: Republic. Фармат: CD, LP, лічбавая дыстрыбуцыя, касеты, стрымінг.	1	1	1	8	1	1	15	8	1	NZ: залаты UK: залаты

Відэаграфія

Год	Кліп	Рэжысёр	Альбом
2006	Tim McGraw	Трэй Фанджой	Taylor Swift
2007	Teardrops on My Guitar
	Our Song
2008	I’m Only Me When I’m with You	Тэйлар Свіфт
	Picture to Burn	Трэй Фанджой
	Beautiful Eyes	Тод Кэсіці	Fearless
	Change	Шон Робінс
	Love Story	Трэй Фанджой
2009	White Horse
	Crazier	Пітэр Чэлсам
	You Belong with Me	Раман Уайт
	The Best Day	Тэйлар Свіфт
	Fifteen	Раман Уайт
	Best Days of Your Life (разам з Келлі Піклер)		Kellie Pickler (альбом Келлі Піклер)
2010	Fearless	Тод Кэсіці	Fearless
	Mine	Тэйлар Свіфт Раман Уайт	Speak Now
2011	Back to December	Ёан Лімойн
	Mean	Дэклан Уайтблум
	The Story of Us	Нубл Джонс
	Sparks Fly	Крысціан Ламб
	Ours	Дэклан Уайтблум
2012	Safe & Sound (разам з The Civil Wars)	Філіп Андэлман	The Hunger Games (альбом саўндтрэкаў да фільма «Галодныя гульні»)
	Both of Us (разам з B.o.B)	Джэйк Нэва	Strange Clouds (альбом B.o.B)
	We Are Never Ever Getting Back Together	Дэклан Уайтблум	Red
	Begin Again	Філіп Андэлман
	I Knew You Were Trouble	Энтані Мэндлер
2013	22
	Highway Don’t Care (разам з Цімам Макгро)	Шэйн Дрэйк	Two Lanes of Freedom (альбом Ціма Макгро)
	Everything Has Changed (разам з Эдам Шыранам)	Філіп Андэлман Джыліс Данінг	Red
	Red	Кенні Джэксан
	The Last Time (разам з Гары Лайтбодзі)	Тэры Рычардсан
2014	Shake It Off	Марк Романек	1989
	Blank Space	Джосэф Кан
2015	Style	Кайл Ньюман
	Bad Blood (разам з Кендрыкам Ламарам)	Джосэф Кан
	Wildest Dreams
2016	Out of the Woods
	New Romantics	Джосэф Акерлунд
2017	I Don’t Wanna Live Forever (разам з Зэйнам Малікам)	Грант Сінгер	Fifty Shades Darker:OMPC (альбом саўндтрэкаў да фільма «На пяцьдзясят адценняў цямней»)
	Look What You Made Me Do	Джосэф Кан	Reputation
	…Ready for It?
2018	End Game (разам з Эдам Шыранам і Future)
	Delicate
	Delicate (вертыкальная версія)	Тэйлар Свіфт
	Babe (разам з Sugarland)	Энтані Мэндлер	Bigger (альбом Sugarland)
2019	ME! (разам з Брэнданам Уры)	Тэйлар Свіфт Дэйв Мэерс	Lover
	You Need to Calm Down	Тэйлар Свіфт Дру Кірсч
	Lover	Тэйлар Свіфт Дру Кірсч
	Christmas Tree Farm	Тэйлар Свіфт	—
2020	The Man	Тэйлар Свіфт	Lover
	Cardigan	Тэйлар Свіфт	Folklore
	Willow	Тэйлар Свіфт	Evermore
2021	The Best Day (Taylor’s Version)	Тэйлар Свіфт	Fearless (Taylor’s Version)
	Renegade (разам з Big Red Machine)	Майкл Браўн	How Long Do You Think It’s Gonna Last? (альбом Big Red Machine)
	All Too Well: The Short Film	Тэйлар Свіфт	Red (Taylor’s Version)
	I Bet You Think About Me	Блэйк Лайвлі	Red (Taylor’s Version)
2022	The Joker and the Queen (разам з Эдам Шыранам)	Эміль Нава	= (альбом Эда Шырана)

Туры

• Fearless Tour (2009—2010)
• Speak Now World Tour (2011—2012)
• Red Tour (2013—2014)
• The 1989 World Tour (2015)
• reputation Stadium Tour (2018)
• Lover Fest (2020) — адменены
• The Eras Tour (2023—2024)

Фільмаграфія

Год	Беларуская назва	Арыгінальная назва	Роля
2009	C.S.I.: Месца злачынства	CSI: Crime Scene Investigation	Хейлі Джонс
2009	Ханна Мантана: Кіно	Hannah Montana: The Movie	Тэйлар Свіфт
2010	Дзень Святога Валянціна	Valentine’s Day	Феліцыя
2012	Лоракс	Dr. Seuss’ The Lorax	Одры
2013	Новенькая	New Girl	Элейн
2014	Прысвечаны	The Giver	Размары
2019	Кошкі	Cats	Бамбалурына
2019	Міс Амерыкана	Miss Americana	Тэйлар Свіфт
2020	Folklore: праслухоўванні ў студыі Long Pond	Folklore: The Long Pond Studio Sessions	Тэйлар Свіфт

Спасылкі

• На Вікісховішчы ёсць медыяфайлы па тэме Тэйлар Свіфт
• Афіцыйны сайт спявачкі