Эшлі Коўл

Э́шлі Коўл (англ.: Ashley Cole; нар. 20 снежня 1980, Стэпні, Лондан, Англія) — англійскі футбаліст (левы абаронца) і трэнер. Ігрок нацыянальнай зборнай Англіі (2001—2014), разам з якой шмат разоў удзельнічаў на чэмпіянатах свету і Еўропы. Вядомы, перш за ўсё, дзякуючы выступам за лонданскія «Арсенал» і «Чэлсі».

Эшлі Коўл
Агульная інфармацыя
Нарадзіўся	20 снежня 1980(1980-12-20)[…] (43 гады) Стэпні[d], Таўэр-Хэмлетс[d], графства Вялікі Лондан, Вялікі Лондан, Англія, Вялікабрытанія
Грамадзянства	Англія
Рост	176 см
Вага	103 кг
Пазіцыя	левы абаронца
Інфармацыя пра клуб
Клуб	Чэлсі
Пасада	трэнер
Маладзёжныя клубы
1997—1998 Арсенал
Клубная кар’ера
1998—2006 Арсенал 156 (8) 1999—2000 →  Крыстал Пэлас 14 (1) 2006—2014 Чэлсі 229 (7) 2014—2015 Рома 11 (0) 2016—2018 Лос-Анджэлес Гэлаксі 86 (3) 2019 Дэрбі Каўнці 9 (0)
Нацыянальная зборная
1999 Англія (да 20) 2 (0) 2002 Англія (да 21) 4 (1) 2001—2014 Англія 107 (0)
Трэнерская кар’ера
2019—2022 Чэлсі акадэмія 2021—2022 Англія (да 21) трэнер 2022—2023 Эвертан трэнер 2023— Чэлсі трэнер
Медыяфайлы на Вікісховішчы

У цяперашні час працуе трэнерам у клубе «Чэлсі».

Клубная кар’ера

З юнацкага ўзросту гуляў у «Арсенале». Пачынаў у якасці нападніка, першы матч за асноўную каманду згуляў 30 лістапада 1999 года супраць «Мідлсбра». Заключыў прафесійны кантракт 25 лютага 2000 года. Для атрымання гульнявой практыкі быў аддадзены ў арэнду ў клуб «Крыстал Пэлас», дзе згуляў 14 матчаў і забіў 1 гол і дапамог клубу захаваць месца ў лізе. Пасля траўмы асноўнага левага абаронцы «Арсенала» Сілвінью ўвосень 2000 года быў пастаўлены на яго месца. Паказваючы выдатную гульню, выцесніў бразільца з асноўнага складу.

У 2005 годзе Коўл быў абвінавачаны ў тым, што дамаўляецца аб пераходзе ў іншы клуб без апавяшчэння кіраўніцтва «Арсенала». Камісія Прэм’ер-лігі прызнала яго віну і 2 чэрвеня 2005 года аштрафавала на £100 000 за сустрэчу ў адной з лонданскіх гасцініц з Жазэ Маўрынью. Пададзеная ў жніўні апеляцыя была адхілена, але памер штрафу паменшылі да £75 000. Таксама за гэты інцыдэнт былі аштрафаваны клуб «Чэлсі» і сам Жазэ Маўрынью на сумы ў £300 000 і £200 000 (паменшаная да £75 000) адпаведна.

Нягледзячы на жаданне пакінуць «Арсенал», Коўл падпісаў новы кантракт 18 ліпеня 2005 года з зарплатай каля £70 000 у тыдзень. 31 жніўня 2006 годзе перайшоў у «Чэлсі» ў абмен на абаронцу Вільяма Галаса з даплатай у £5 млн.

7 ліпеня 2014 года Коўл падпісаў двухгадовы кантракт з «Ромай». Аднак замацавацца ў аснове рымскага клуба не здолеў. Улетку 2015 года галоўны трэнер рымлян Рудзі Гарсія абвясціў, што больш не разлічвае на Коўла, і той не быў уключаны ў заяўку на сезон, але застаўся ў клубе. 19 студзеня 2016 года Коўл афіцыйна разарваў кантракт з «Ромай».

27 студзеня 2016 года было абвешчана аб пераходзе Коўла ў амерыканскі клуб «Лос-Анджэлес Гэлаксі». У студзені 2019 года вярнуўся ў Англію, стаўшы іграком клуба «Дэрбі Каўнці», які ўзначальваў былы партнёр Коўла па «Чэлсі» Фрэнк Лэмпард. Пакінуў каманду па заканчэнні сезона 2018/19.

У жніўні 2019 года абвясціў аб завяршэнні кар’еры.

Трэнерская кар’ера

З 2019 года стаў працаваць трэнерам у клубнай акадэміі лонданскага «Чэлсі». У ліпені 2021 года ўвайшоў у трэнерскі штаб моладзевай зборнай Англіі з захаваннем пасады ў «Чэлсі». У лютым 2022 года стаў памочнікам новага галоўнага трэнера «Эвертана» Фрэнка Лэмпарда. Быў звольнены разам з Лэмпардам у студзені 2023 года.

У красавіку 2023 года ўвайшоў у трэнерскі штаб Лэмпарда ў «Чэлсі».

Дасягненні

«Арсенал»:

• Чэмпіён Англіі (2): 2002, 2004
• Уладальнік Кубка Англіі (3): 2002, 2003, 2005
• Уладальнік Суперкубка Англіі (2): 2002, 2004

«Чэлсі»:

• Чэмпіён Англіі: 2010
• Уладальнік Кубка Англіі (4): 2007, 2009, 2010, 2012
• Уладальнік Кубка Футбольнай лігі: 2007
• Уладальнік Суперкубка Англіі: 2009
• Пераможца Лігі чэмпіёнаў: 2012
• Пераможца Лігі Еўропы: 2013

Спасылкі

• На Вікісховішчы ёсць медыяфайлы па тэме Эшлі Коўл