Александрыйскае міжледавікоўе

Александрыйскае міжледавікоўе (ад назвы в. Александрыя ў Шклоўскім раёне Магілёўскай вобласці), ліхвінскае міжледавікоўе, міндэль—рыскае міжледавікоўе - міжледавіковая эпоха пачатку сярэдняга антрапагену (320—460 тыс. г. назад). Наступіла пасля бярэзінскага зледзянення і папярэднічала максімальнаму на Беларусі дняпроўскаму зледзяненню. Доўжылася 140 тыс. гадоў.

Адклады александрыйскага міжледавікоўя залягаюць на глыбіні ад 5—10 м на паўднёвым захадзе і захадзе рэспублікі да 50—80 м у сярэдняй і паўночнай частках; з'яўляюцца гарызонтам, які падзяляе антрапагенавую тоўшчу на 2 роўныя па магутнасці часткі. Ёсць у пахаваных рачных далінах, азёрных і балотных катлавінах, ледавіковых лагчынах. Прадстаўлены азёрнымі (супескі, суглінкі, дыятаміты, сапрапеліты, мергелі, алеўрыты), балотнымі (торф, гумусавыя супескі), алювіяльнымі (пяскі з лінзамі торфу, суглінку, супеску) утварэннямі.

Вылучаецца значнай працягласцю, субатлантычным умерана цёплым кліматам, найбольшым падабенствам да пліяцэну па палеагеаграфічных умовах.

Літаратура

• Александрыйскае міжледавікоўе // Беларуская энцыклапедыя: У 18 т. Т. 1: А — Аршын / Рэдкал.: Г. П. Пашкоў і інш. — Мн. : БелЭн, 1996. — Т. 1. — 552 с. — 10 000 экз. — ISBN 985-11-0035-8. — ISBN 985-11-0036-6 (т. 1).