Аляксей Іванавіч Шуба

Аляксей Іванавіч Шу́ба (25 лютага 1912—26 снежня 1971) — дзеяч медыцыны, адзін з арганізатараў лячэбна-прафілактычнай дапамогі ў БССР. Герой Сацыялістычнай працы (1969). Заслужаны ўрач БССР (1948). Удзельнік савецка-фінляндскай і Вялікай Айчыннай войнаў.

Аляксей Іванавіч Шуба
Дата нараджэння	25 лютага 1912(1912-02-25)
Месца нараджэння	Падарэссе, Бабруйскі павет, Мінская губерня, Расійская імперыя
Дата смерці	26 снежня 1971(1971-12-26) (59 гадоў)
Месца смерці	Мінск, БССР, СССР
Месца пахавання	Усходнія могілкі
Грамадзянства	СССР
Род дзейнасці	урач, медыцынскі адміністратар
Альма-матар	Беларускі медыцынскі інстытут (1939)
Партыя	КПСС
Узнагароды

Біяграфія

А. І. Шуба нарадзіўся ў вёсцы Падарэссе (зараз у Старадарожскім раёне Мінскай вобласці Беларусі). Быў батраком, працаваў у калгасе. У 1930 годзе быў абраны старшынёй калгаса, у 1934 годзе скончыў рабфак у Бабруйску. У 1939 годзе скончыў Мінскі медыцынскі інстытут і працаваў галоўным урачом раённай бальніцы ў Старых Дарогах. З восені 1939 года на службе ў Чырвонай Арміі — начальнік санітарнай службы стралковага палка. Удзельнік Удзельнік савецка-фінляндскай вайны. У пачатку Вялікай Айчыннай вайны, у верасні 1941 г. трапіў у палон, адкуль збег і застаўся ў тыле ворага на радзіме. Са снежня 1941 года арганізатар і кіраўнік Старадарожскай падпольнай партыйна-камсамольскай арганізацыі і першай партызанскай групы ў раёне. З 1942 года — камандзір партызанскага атрада «Народныя мсціўцы», у сакавіку 1943 — ліпені 1944 — камандзір 100-й партызанскай брыгады «Смерць фашызму» імя С. М. Кірава. Пасля вызвалення Старадарожскага раёна ад захопнікаў А. І. Шуба займаўся аднаўленнем медыцынскіх устаноў, у т.л. паліклінікі і бальніцы ў Старых Дарогах. З 1944 г. на пасадзе загадчыка аддзела аховы здароўя Выканкама Мінскага гарадскога Савета дэпутатаў. З 1950 года ў Мінскім медыцынскім інстытуце. З лютага 1952 г. А. І. Шуба на пасадзе галоўнага ўрача 1-й гарадской клінічнай бальніцы Мінска.

Памёр А. І. Шуба 26 лютага 1971 г. Пахаваны на Усходніх могілках у Мінску.

Узнагароды

• Медаль «Серп і Молат»
• 2 Ордэны Леніна
• Медаль «За баявыя заслугі»
• Ордэн Чырвонага Сцяга
• Медалі «Партызану Вялікай Айчыннай вайны» 1-й і 2-й ступені
• Ордэн Працоўнага Чырвонага Сцяга
• медалі

Памяць

Імя А. І. Шубы занесена ў Кнігу Народнай Славы Старадарожскага раёна. Яго імем названыя школа ў вёсцы Падарэссе Старадарожскага раёна і вуліца ў аграгарадку Асавец Любанскага раёна Мінскай вобласці. 8 ліпеня 2010 г. на будынку галоўнага корпуса 1-й клінічнай бальніцы Мінска адкрыта мемарыяльная дошка.

Літаратура

• Беларуская энцыклапедыя: У 18 т. Т. 17: Хвінявічы — Шчытні / Рэдкал.: Г. П. Пашкоў і інш. — Мн. : БелЭн, 2003. — Т. 17. — 512 с. — 10 000 экз. — ISBN 985-11-0035-8. — ISBN 985-11-0279-2 (т. 17). — С. 479.

Спасылкі

• Герои Стародорожчины Архівавана 4 верасня 2016. // Афіцыйны сайт Старадарожскага раённага выканаўчага камітэта
• Поклонимся великим тем годам… // Газета Министерства обороны Республики Беларусь "Белорусская военная газета. «Во славу Родины» Архівавана 21 красавіка 2018. (руск.)
• Шуба навечно // Учреждение Администрации Президента Республики Беларусь Редакция газеты «Советская Белоруссия» (руск.)
• Имя в белорусской медицинской науке // Государственное учреждение «Республиканская научная медицинская библиотека» Архівавана 21 красавіка 2018. (руск.)
• Аляксей Іванавіч Шуба на сайце «Героі краіны»