Астрынскія

Астрынскія — род татарскіх царэвічаў у ВКЛ, адгалінаванне крымскай дынастыі Гірэяў. Паходзілі ад царэвіча Дэўлеш-салтана, які ў 1491 трапіў на службу да Вялікага князя ВКЛ і караля польскага Казіміра IV. Род Астрынскіх некаторы час быў найбольш уплывовым татарскім родам у ВКЛ. Да сярэдзіны 16 ст. Астрынскія не ўваходзілі ў склад татарскіх харугваў, не падпарадкоўваліся татарскім харунжым, мелі права (як князі і паны) з'яўляцца ca сваім атрадам непасрэдна да гетмана.

Прадстаўнікі роду

Сын Дэўлеш-салтана Азубек-салтан (Азюбек, Узубек, ? — пасля 1540) упершыню згаданы ў 1507 г. 3 1514 г. ён і яго нашчадкі ў актах ВКЛ называюцца царэвічамі Астрынскімі (ад маёнтка Астрына, цяпер Гродзенская вобласць). Азубек-салтан удзельнічаў у цырымоніі абвяшчэння Жыгімонта II Аўгуста вялікім князем ВКЛ (1529), на Берасцейскім сойме 1533, выступаў арбітрам у спрэчках літоўскіх служылых татараў. Меў сыноў Багатыр-салтана, Джаная і Чынгіса. У 2-й палове 16 ст. царэвічы Астрынскія паступова страцілі свае землеўладанні. Іх род згас на дзецях Чынгіса.

Літаратура

• Беларуская энцыклапедыя: У 18 т. Т. 2: Аршыца — Беларусцы / Рэдкал.: Г. П. Пашкоў і інш. — Мн. : БелЭн, 1996. — Т. 2. — 480 с. — 10 000 экз. — ISBN 985-11-0035-8. — ISBN 985-11-0061-7 (т. 2).