Валовічы

Валовічы (польск.: Wołłowiczowie, руск.: Воловичи) — вялікалітоўскі шляхецкі род гербу «Багорыя», прадстаўнікі якога ў 16-18 ст. займалі высокія дзяржаўныя пасады.

Валовічы
Герб «Вадвіч»
Краіна паходжання	Вялікае Княства Літоўскае
Тытул	Графы
Прызнаныя ў	Расійская імперыя
Першы з роду	Грынька Валовіч

Напачатку вызнавалі праваслаўе, у 16 ст. сярод іх шмат прыхільнікаў кальвінізму, з канца 16 ст. перайшлі ў каталіцтва.

Родапачынальнік — Грынька Валовіч, які ў 1-й палове XIV ст. жыў у Гарадзенскім павеце. Яго ўнук -- Грынька Ходкавіч, меў 7 сыноў, ад якіх пайшлі галіны роду.

У 1798—1900 гадах адна з галін мела графскі тытул (згасла). У 19 ст. было 4 галіны Валовічаў.

У 19 ст. — пачатку 20 ст. валодалі маёнткамі ў Гродзенскай, Магілёўскай, Мінскай і Ковенскай губернях.

Найбольш вядомыя прадстаўнікі роду

• Рыгор Маркавіч Валовіч — у 1562 прызначаны на месца праваслаўнага полацкага архіепіскапа, але памёр да пасвячэння
• Астафій Багданавіч Валовіч — вялікалітоўскі дзяржаўны дзеяч, канцлер
• Уладзіслаў Валовіч — ваявода віцебскі, польны гетман літоўскі
• Марцыян Дамінік Валовіч — актыўны ўдзельнік антысапежынскага руху на Літве ў 1700-х, вялікі маршалак літоўскі
• Міхал Валовіч — удзельнік паўстання 1830-1831

Радавод

Грынька Валовіч (да 1429 — паміж 1481—1486), канюшы гаспадарскі

1. Ходка (Хведар; ?—?)
   1. Грынька (? — пасля 1503), гараднічы гарадзенскі
      1. Багдан (? — 14 красавіка 1539), войскі гарадзенскі
         1. Астафій (каля 1520—1587), канцлер вялікі літоўскі
         2. Рыгор (? — 1577), ваявода смаленскі
            1. Пётр (? — 1624), чашнік літоўскі
            2. Раман, староста рагачоўскі
            3. Раіна, жонка Багдана Агінскага
      2. Іван (? — пасля 1547), канюшы троцкі
         1. Іван (? — 1582), маршалак гарадзенскі
            1. Геранім (? — 1636), падканцлер вялікі літоўскі, староста жамойцкі
            2. Яўстах (? — 1630), біскуп віленскі
            3. Андрэй (каля 1570—1614), харужы літоўскі
            4. Павел (1576—1630), падскарбі надворны літоўскі
               1. Казімір Яўстах (? — 1659), стольнік літоўскі
      3. Лукаш (? — ?), ключнік гарадзенскі
      4. Міхаіл
         1. Барыс
            1. Пётр, падкаморы троцкі
               1. Уладзіслаў (? — 1668), гетман польны літоўскі
      5. Марк
         1. Рыгор (? — 1562), полацкі праваслаўны архіепіскап
      6. Рыгор (? — пачатак 1586), староста слонімскі, кашталян новагародскі
         1. Міхал (? — каля 1583), староста слонімскі
            1. Самуэль (? — 1626), кашталян новагародскі
               1. Аляксандр, харужы віленскі
               2. Геранім
                  1. Марцыян, пісар земскі віленскі
                     1. Ян Казімір (? — 1707), абозны літоўскі
                     2. Вінцэнт Станіслаў (? — 1698), вялікі сакратар духоўны літоўскі
                     3. Дамінік, староста абельскі
                        1. Марцыян Дамінік (? — 1712), вялікі маршалак літоўскі
                        2. Вінцэнт Пётр (1670—1737), рэферэндар літоўскі

Літаратура

• Unus pro omnibus: Валовічы ў гісторыі Вялікага княства Літоўскага XV—XVIII стст. / Склад. А. Янушкевіч. Навук. рэд. А. Шаланда. — Мн.: Медысонт, 2014.
• Беларуская энцыклапедыя: У 18 т. Т.3: Беларусы — Варанец / Рэдкал.: Г. П. Пашкоў і інш — Мн.: БелЭн, 1996. — Т. 3. — 511 с. — 10 000 экз. — ISBN 985-11-0068-4 (т. 3).
• Валовічы герба «Багорыя» / А. І. Шаланда [і інш.]; навук. рэд. А. І. Шаланда ; Нац. акад. навук Беларусі, Ін-т гісторыі. — Мн.: Беларуская навука, 2019. — 293 с. : іл. — (Беларусь праз прызму рэгіянальнай гісторыі). — ISBN 978-985-08-2400-4.

Спасылкі

• На Вікісховішчы ёсць медыяфайлы па тэме Валовічы