Генадзь Васілевіч Навіцкі

Гена́дзь Васі́левіч Наві́цкі (2 студзеня 1949, Магілёў) — беларускі дзяржаўны дзеяч, прэм’ер-міністр Рэспублікі Беларусь (2001—2003), старшыня Савета Рэспублікі Нацыянальнага сходу Рэспублікі Беларусь (2003—2008).

Генадзь Навіцкі
Старшыня Савета Рэспублікі НС РБ 3-га склікання 28 ліпеня 2003 — 27 верасня 2008
Прэзідэнт	Аляксандр Лукашэнка
Кіраўнік урада	Сяргей Сідорскі
Папярэднік	Аляксандр Вайтовіч
Пераемнік	Барыс Батура
Прэм'ер-міністр Рэспублікі Беларусь 10 кастрычніка 2001 — 10 ліпеня 2003
Прэзідэнт	Аляксандр Лукашэнка
Папярэднік	Уладзімір Ярмошын
Пераемнік	Сяргей Сідорскі
Нараджэнне	2 студзеня 1949(1949-01-02) (75 гадоў) Магілёў, Магілёўская вобласць, БССР, СССР
Партыя	КПСС
Адукацыя	БПІ (1971) Акадэмія грамадскіх навук пры ЦК КПСС (1988)
Прафесія	інжынер-будаўнік
Дзейнасць	інжынер-праектыроўшчык будаўнічых канструкцый, палітык
Узнагароды	Ганаровая грамата Савета Міністраў Рэспублікі Беларусь (24 снежня 1998) Ганаровая грамата Нацыянальнага сходу Рэспублікі Беларусь

Біяграфія

Нарадзіўся 2 студзеня 1949 года ў Магілёве.

У 1971 годзе скончыў Беларускі політэхнічны інстытут па спецыяльнасці «Інжынер-будаўнік». Пасля сканчэння БПІ працаваў майстрам, начальнікам участка будаўнічага ўпраўлення 56-га будаўнічага трэсту Магілёва. З 1974 па 1977 — галоўны інжынер будаўнічага ўпраўлення 92-га будаўнічага трэсту Магілёва.

З 1977 па 1981 год — інструктар аддзела будаўніцтва Магілёўскага абкама КПБ. З 1981 па 1985 год — галоўны інжынер Магілёўскага Аблміжкалгасбуда. З 1985 па 1988 год — загадчык аддзела будаўніцтва Магілёўскага абкама КПБ. У 1988 годзе скончыў Акадэмію грамадскіх навук пры ЦК КПСС. З 1988 па 1994 год — старшыня праўлення Магілёўскага аблсельбуда. Падчас выбарчай кампаніі 1994 года збіраў подпісы за Аляксандра Лукашэнку.

З 1994 па 1997 год — Міністр архітэктуры і будаўніцтва Рэспублікі Беларусь. З 1997 па 2001 год — Намеснік Прэм’ер-міністра Рэспублікі Беларусь. 6 кастрычніка 2000 года прызначаны прадстаўніком дзяржавы ў ААТ «Беларускі банк развіцця». 1 кастрычніка 2001 года прызначаны выконваючым абавязкі Прэм’ер-міністра Рэспублікі Беларусь (на месца Уладзіміра Ярмошына).

10 кастрычніка 2001 года прызначаны Прэм’ер-міністрам Рэспублікі Беларусь, 10 ліпеня 2003 года вызвалены з пасады.

28 ліпеня 2003 года аднагалосна абраны старшынёй Савета Рэспублікі Нацыянальнага сходу Рэспублікі Беларусь другога склікання.

15 лістапада 2004 года пераабраны старшынёй Савета Рэспублікі. 27 верасня 2008 года сышоў у адстаўку з паста старшыні Савета Рэспублікі.

Сям’я

Жанаты. Мае двух сыноў.

Узнагароды

• Ганаровая грамата Савета Міністраў Рэспублікі Беларусь (1998),
• падзяка Прэзідэнта Рэспублікі Беларусь,
• ордэн «Садружнасць» (МПА СНД),
• юбілейны медаль «90 год Узброеных Сіл Рэспублікі Беларусь»,
• юбілейны медаль «65 год вызвалення Рэспублікі Беларусь ад нямецка-фашысцкіх захопнікаў»,
• юбілейны медаль «65 год Перамогі ў Вялікай Айчыннай вайне 1941—1945 гг.»,
• памятны медаль «За супрацоўніцтва» (Саюзная дзяржава),
• залаты медаль «МПА СНД. 20 гадоў»,
• ганаровая грамата Нацыянальнага сходу Рэспублікі Беларусь,
• ганаровая грамата Міжпарламенцкай Асамблеі Еўразійскай эканамічнай супольнасці,
• ганаровая грамата Савета Міжпарламенцкай Асамблеі дзяржаў — удзельніц Садружнасці Незалежных Дзяржаў.

Спасылкі

• Біяграфія Архівавана 18 лютага 2007. на сайце Савета Рэспублікі Архівавана 8 красавіка 2015.
• Біяграфія на cайце Агенцтва Федэральных даследаванняў
• Профіль на праекце «Хто ёсць хто ў РБ» Архівавана 18 жніўня 2011. (руск.)