Домік Пятра I (Полацк)

Домік Пятра I — помнік архітэктуры барока ў Полацку, размешчаны па адрасе вул. Ніжне-Пакроўская, 33; функцыянуе як стацыянарная выстаўка «Прагулка па Ніжне-Пакроўскай».

Жылы дом
Домік Пятра I
55°29′04″ пн. ш. 28°46′14″ у. д.
Краіна	Беларусь
Горад	Полацк
Архітэктурны стыль	барока
Дата пабудовы	1692 год
Вядомыя жыхары	Пётр I
Статус	Гісторыка-культурная каштоўнасць Беларусі, шыфр 212Г000619
Медыяфайлы на Вікісховішчы

Гісторыя

Пабудаваны ў цэнтры горада як жылы (на мяжы XVIII—XIX стагоддзяў перабудаваны). У гэтым доме ў 1705 годзе жыў Пётр I. Аднапавярховы (з паўпадвальным паверхам) будынак мае ў плане форму няправільнага прамавугольніка (19х8,5 м).

Падчас Вялікай Айчыннай вайны дом значна пацярпеў. У 1949 годзе будынак адрамантаваны: адноўлены разбураныя часткі сцен зроблены дах, фасады атынкаваны з цягай карнізаў і аконных абрамленняў, насцелены новыя падлога і столь, запоўнены дзвярныя і аконныя праёмы. Будынак быў прыстасаваны пад дзіцячую бібліятэку. Захаваліся і ўяўляюць пэўную каштоўнасць драўляныя дзверы разной работы.

У 1998 годзе ў быдынку адкрылася стацыянарная выстаўка «Прагулка па Ніжне-Пакроўскай».

Архітэктура

Сцены цагляныя, атынкаваныя звонку і ўнутры. Асноўныя памяшканні паўпадвала перакрыты цыліндрычнымі скляпеннямі, астатнія крыжовымі. Пакоі першага паверха маюць пазнейшыя плоскія перакрыцці. З боку ракі на фасадзе дзевяць акон, на бакавым — тры. Уваход зроблены з боку задняга фасада. Зараз уваход ссунуты ў бок вугла. Раней унутры існавала яшчэ адна папярочная сцяна, аб чым сведчыць план паўпадвала, і дом меў скляпеністыя перакрыцці.

Літаратура

• Архітэктура Беларусі: Энцыклапедычны даведнік / Беларус. Энцыкл.; Рэкал.: А. А. Воінаў і інш. — Мн.: БелЭн, 1993. — 620 с. — 10 000 экз. — ISBN 5-85700-078-5.
• Збор помнікаў гісторыі і культуры Беларусі / АН БССР. Ін-т мастацтвазнаўства, этнаграфіі і фальклору; Рэд. кал.: С. В. Марцэлеў (гал. рэд.) і інш. — Мн.: БелСЭ, [1984—1988].

Спасылкі

• Домік Пятра I (Полацк) на сайце Глобус Беларусі (руск.)