Жолудзь (Пухавіцкі раён)

Жо́лудзь (трансліт.: Žoludź, руск.: Жолудь; таксама Жонудзь, або Жанудзь) — былая вёска ў Пухавіцкім раёне Мінскай вобласці, на рацэ Пціч. Пасёлак Жолудзь уваходзіў у склад Рудзенскага пассавета.

Вёска Жолудзь Краіна Беларусь Вобласць Мінская Раён Пухавіцкі Сельсавет Рудзенскі Каардынаты 53°30′57″ пн. ш. 27°52′22″ у. д. Водныя аб’екты Пціч Жолудзь на карце Беларусі ±

Гісторыя

У XIX стагоддзі фальварак у Ігуменскім павеце Мінскай губерні, уласнасць Янішэўскіх. Адносіўся да маёнтка Цітва. Пасля 1861 года ў Цітвянскай воласці Ігуменскага павета. Па смерці Людвіга Ануфрыевіча Янішэўскага і падзелу яго ўласнасці паміж сынамі, Жолудзь з даменам Ануфраў атрымаў Ігнацый Янішэўскі. У 1889 годзе дваранін рыма-каталіцкага веравызнання Ігнацый Людвігавіч Янішэўскі валодаў фальваркам Жолудзь, меў 210 дзесяцін зямлі. У канцы XIX стагоддзя мясцовасць была каналізавана ад ракі Цітаўкі да Свіслачы, таксама быў створаны канал ад Жолудзя да Пцічы.

З канца лютага 1918 года тэрыторыя акупаваная войскамі Германскай імперыі. 25 сакавіка 1918 года згодна з Трэцяй Устаўной граматай абвешчана часткай Беларускай Народнай Рэспублікі. У снежні 1918 года занята Чырвонай Арміяй, з 1 студзеня 1919 года ў адпаведнасці з пастановай І з’езда КП(б) Беларусі яна ўвайшла ў склад Савецкай Беларусі, з 27 лютага 1919 года — у ЛітБел ССР. У час польска-савецкай вайны ў жніўні 1919 — ліпені 1920 гадоў пад акупацыяй Польшчы (Мінская акруга ГУУЗ).

З 31 ліпеня 1920 года ў Беларускай ССР. Маёнтак нацыяналізаваны, населены пункт займеў статус пасёлка.

У Другую сусветную вайну з канца чэрвеня 1941 года пад акупацыяй Германіі. У сакавіку 1944 года пасёлак спалены, былі забіты 5 жыхароў. Пасля вайны пасёлак не быў адноўлены.

Насельніцтва

• 1908 год — 2 двары, 9 жыхароў
• 1921 год — 5 двароў, 30 жыхароў, усе палякі
• 1926 год — 16 двароў, 70 жыхароў
• 1940 год — 15 двароў, 73 жыхары

Літаратура

• Памяць: Пухавіцкі раён: Гісторыка-дакументальныя хронікі гарадоў і раёнаў Беларусі / Укл. А. А. Прановіч; Рэдкал.: А. М. Карлюкевіч і інш.. — Мінск: Беларусь, 2003. — 749 с. — ISBN 985-01-0251-9.
• Jelski A. Żołądź // Słownik geograficzny Królestwa Polskiego i innych krajów słowiańskich. Tom XIV: Worowo — Żyżyn (польск.). — Warszawa, 1895. — S. 815.
• Ярмоловичъ В. С. Списокъ населенныхъ мѣстъ Минской губерніи. — Минскъ: Изданіе Минскаго Губернскаго Статистическаго Комитета, 1909. — 231 с.
• Список населенных мест Б.С.С.Р. (б. Минской губернии) / Центральное Статистическое Бюро Б.С.С.Р.. — Минск: Белтрестпечать, 1924.