Касцёл Святых Апосталаў Пятра і Паўла (Лагішын)

Петрапаўлаўскі касцёл — помнік архітэктуры неаготыкі ў г. п. Лагішыне Пінскага раёна Брэсцкай вобласці. Адносіцца да Пінскага дэканата Пінскай дыяцэзіі. Помнік архітэктуры ў неагатычным стылі, пабудаваны ў 1909 годзе. Уключаны ў Дзяржаўны спіс гісторыка-культурных каштоўнасцей Рэспублікі Беларусь (код 113Г000568).

Каталіцкі храм
Касцёл Святых Апосталаў Пятра і Паўла
52°20′17″ пн. ш. 25°59′11″ у. д.
Краіна	Беларусь
Гарадскі пасёлак	Лагішын
Канфесія	Каталіцызм
Епархія	Пінская дыяцэзія
Архітэктурны стыль	неаготыка
Будаўніцтва	1907—1909 гады
Статус	Гісторыка-культурная каштоўнасць Беларусі, шыфр 113Г000568
Стан	дзейнічае
Медыяфайлы на Вікісховішчы

Гісторыя

Першы каталіцкі храм у Лагішыне быў пабудаваны ў 1634 годзе па фундацыі Альбрэхта Станіслава Радзівіла, які тым часам быў уладальнікам мястэчка. Пасля паўстання 1863 года храм быў адабраны ў каталікоў царскімі ўладамі і перададзены праваслаўным. У 1893 годзе царква была разабрана і перанесена на могілкі, дзе згарэла чатырма гадамі пазней. У каталікоў Лагішына свайго храма не было да пачатку XX стагоддзя. Пасля аб'яўлення «маніфеста аб верацярпімасці» ў 1905 годзе каталікі атрымалі магчымасць пабудаваць новы касцёл. Будаўніцтва вялося з 1907 па 1909 год, неагатычны цагляны храм быў асвечаны ў 1913 годзе ў імя апосталаў Пятра і Паўла.

Архітэктура

Храм — мураваны, прамавугольны ў плане; да яго асноўнага аб'ёму па падоўжнай восі далучаны 4-ярусная шатровая званіца і 5-гранная апсіда. Сцены расчлянёны стральчатымі вокнамі-біфорыумамі і 2-ступеньчатымі контрфорсамі ў прасценках. Асіметрыю ў агульную кампазіцыю ўносяць прыбудовы да апсіды сакрысціі і гранёнай вежы да званіцы. Уваход вырашаны стральчатым парталам з вімпергам. Дэкаратыўна-мастацкі акцэнт інтэр'ера — драўляны алтар, антаблемент якога фланкіруюць пазалочаныя анёлы. У касцёле знаходзіцца абраз Маці Божай Лагішынскай.

Літаратура

• Кулагін, А. М. Лагішынскі Петрапаўлаўскі касцёл / А. М. Кулагін // Беларуская энцыклапедыя: У 18 тамах. Том 9: Кулібін — Малаіта / Беларуская энцыклапедыя; Рэдкалегія: Г. П. Пашкоў (галоўны рэдактар) і іншае. — Мн.: Беларуская энцыклапедыя, 1999. — С. 90.

Спасылкі

• Касцёл Святых Апосталаў Пятра і Паўла (Лагішын) на сайце Radzima.org
• Касцёл Святых Апосталаў Пятра і Паўла (Лагішын) на сайце Глобус Беларусі (руск.)
• Касцёл Святых Апосталаў Пятра і Паўла (Лагішын) на сайце Catholic.by (бел.)
• «Архітэктура Беларусі. Энцыклапедычны даведнік». Мінск, «Беларуская Энцыклапедыя імя Петруся Броўкі», 1993 год. ISBN 5-85700-078-5.