Стральба кулявая

Стральба́ кулява́я — адзін з відаў стралковага спорту. У дадзеным відзе спорту стральба ажыццяўляецца з пнеўматычных (4,5 мм), малакаліберных (5,6 мм) і буйнакаліберных (7,62 мм для вінтовак і 7,62—9,65 мм для пісталетаў) вінтовак і пісталетаў куляй.

Падзяляецца на стральбу з пісталета, вінтоўкі, стральбу з вінтоўкі па рухомай мішэні. Спаборніцтвы праводзяцца на дыстанцыях 10, 25, 50, 100 і 300 метраў. Кулявая стральба ўваходзіць у біятлон (з малакалібернай вінтоўкі), марское мнагабор’е. Стральба з пісталета ўваходзіць у пяцібор’е і ваенна-прыкладныя мнагабор’і.

Першыя спаборніцтвы па стральбе з вінтоўкі адбыліся ў 1824 годзе ў Швейцарыі. У праграму Алімпійскіх гульняў уваходзяць з 1896 года. Чэмпіянаты свету праводзяцца з 1897 года. Чэмпіянаты Беларусі праводзяцца з 1924 года.

Беларускія спартсмены

• Ігар Міхайлавіч Басінскі
• Ламара Барысаўна Бейдзіна
• Аляксандр Васільевіч Газаў
• Сяргей Анатольевіч Мартынаў
• Лаліта Вадзімаўна Яўглеўская

Літаратура

• Стральба́ кулява́я // Беларуская энцыклапедыя: У 18 т. Т. 15: Следавікі — Трыо / Рэдкал.: Г. П. Пашкоў і інш. — Мн. : БелЭн, 2002. — Т. 15. — С. 197. — 10 000 экз. — ISBN 985-11-0035-8. — ISBN 985-11-0251-2 (т. 15).