Людміла Іванаўна Рабушка

Людміла Іванаўна Рабушка (нар. 15 чэрвеня 1951, Мінск) — беларуская артыстка балета, тэатразнаўца. Заслужаная артыстка БССР (1982).

Людміла Іванаўна Рабушка
Дата нараджэння	15 чэрвеня 1951(1951-06-15) (72 гады)
Месца нараджэння	Мінск, БССР, СССР
Адукацыя	Беларускае дзяржаўнае харэаграфічнае вучылішча (1969) Беларускі дзяржаўны тэатральна-мастацкі інстытут (1977)
Прафесія	балерына, тэатразнавец
Тэатр	Нацыянальны акадэмічны Вялікі тэатр оперы і балета Рэспублікі Беларусь Беларускі дзяржаўны акадэмічны музычны тэатр
Член у	БСТД
Узнагароды

Біяграфія

У 1969 годзе скончыла Беларускае харэаграфічнае вучылішча, у 1977 годзе скончыла Беларускі тэатральна-мастацкі інстытут.

З 1969 года ў Дзяржаўным тэатры оперы і балета Беларусі, з 1970 года — у Беларускім дзяржаўным музычным тэатры (вядучая салістка балета, з 1990 года — загадчык літаратурнай часткі).

Член Беларускага саюза тэатральных дзеячаў з 1979 года.

Творчасць

Стварыла на сцэне разнапланавыя харэаграфічныя вобразы, адзначаныя высокім выканаўчым майстэрствам і акцёрскай выразнасцю. У рэпертуары класічныя і характарныя партыі: Аўрора і танец Фіялкі ў класічных дывертысментах («Халопка» М. Стрэльнікава, «Фіялка Манмартра» І. Кальмана), вальс і полька («Пяе Жаваранак» Ю. Семянякі), румба («Пацалунак Чаніты» Ю. Мілюціна), адажыо (мюзікл «Сірано» С. Пажлакова), Паненка («Паненка і хуліган» на музыку Дз. Шастаковіча), Ева, вальс («Ноч у Венецыі», «Лятучая мыш» І. Штрауса), усходні танец («Фраскіта» Ф. Легара), Марго («Дзяніс Давыдаў» А. Мдывані), Балерына («Стойкі алавяны салдацік» С. Баневіча) і інш.

Аўтар артыкулаў пра тэатральнае мастацтва Беларусі, у т.л. пра Беларускі музычны тэатр.

Літаратура

• Беларуская энцыклапедыя: У 18 т. Т. 13: Праміле — Рэлаксін / Рэдкал.: Г. П. Пашкоў і інш. — Мн. : БелЭн, 2001. — Т. 13. — 576 с. — 10 000 экз. — ISBN 985-11-0035-8. — ISBN 985-11-0216-4 (т. 13).
• Людміла Іванаўна Рабушка // Тэатральная Беларусь: энцыклапедыя : у 2 т. / рэдкал.: Г. П. Пашкоў [і інш.]. — Мн.: Беларуская Энцыклапедыя, 2003. — Т. 2. — 571 с. — 4 000 экз. — ISBN 985-11-0259-8.