Могилёвские епархиальные ведомости

«Могилёвские епархиальные ведомости» — штотыднёвае выданне Магілёўскай праваслаўнай духоўнай кансісторыі. Выдаваліся ў Магілёве ў 1883—1917 гг. на рускай мове. Прызначаліся для Магілёўскай праваслаўнай епархіі.

«Магілёўскія епархіяльныя ведамасці»
Арыгінальная назва	«руск.: Могилёвские епархиальные ведомости»
Тып	Газета
Выдавец	Магілёўская праваслаўная духоўная кансісторыя
Заснавана	1883
Спыненне публікацый	1917
Мова	руская
Галоўны офіс	Магілёў
Медыяфайлы на Вікісховішчы

Апісанне

Мелі неафіцыйны і афіцыйны аддзелы. У афіцыйным аддзеле друкаваліся пастановы і распараджэнні ўрада і мясцовых улад па царкоўных справах, рашэнні і справаздачы Сінода, аб’явы і распараджэнні кансісторыі. У неафіцыйнай частцы змяшчаліся матэрыялы царкоўна-гістарычнага характару: пра дзейнасць брацтваў (артыкул Ф. Жудро аб Магілёўскім Богаяўленскім брацтве, 1889—1890), царкоўна-прыходскіх школах і іншых навучальных установах (аб Магілёўскім жаночым духоўным вучылішчы, 1884, № 20, чытаннях па гісторыі Магілёўскай епархіі пры Магілёўскай духоўнай семінарыі, 1884, № 35 — 36), гістарычныя нарысы пра асобныя манастыры (Чонкаўска-Макар’еўскі адзінаверскі, 1889, № 22 — 23, Тупічэўскі Св.-Духаўскі, 1889, № 14 — 16), успаміны пра магілёўскіх епіскапаў і інш. Змяшчалі матэрыялы ў дапамогу святарам: як праводзіць гутаркі са стараверамі, як весці барацьбу супраць забабонаў і інш.

У кожным нумары змяшчаўся летапіс бягучых падзей, што тычыліся розных бакоў грамадскага жыцця. Рэдактары: Д. Ціхаміраў, І. Пятніцкі, П. Сахараў, А. Малевіч.

У 1991 годзе выпуск ведамасцяў адноўлены.

Літаратура

• Грыгор’ева, В. «Могилевские епархиальные ведомости» / Валянціна Грыгор’ева // Энцыклапедыя гісторыі Беларусі. Т. 5. — С. 219—220.
• Могилевские Епархиальные Ведомости // Энциклопедический словарь Брокгауза и Ефрона: В 86 томах (82 т. и 4 доп.) (руск.). — СПб., 1890—1907.

Спасылкі

• Могилевские епархиальные ведомости на сайце Ortho-Rus.ru Архівавана 3 лютага 2014. (руск.)