Мсціслаўскі дзяржаўны будаўнічы каледж

Мсціслаўскі дзяржаўны будаўнічы каледж (МДБК) — сярэдняя спецыяльная навучальная ўстанова ў г. Мсціславе Магілёўскай вобласці. Базавым прадпрыемствам з’яўляецца «Магілёўаблсельбуд». За 1966—2016 гг. падрыхтавана больш за 15 тысяч чалавек. Галоўны корпус размешчы па адрасе вул. Савецкая, 10.

Мсціслаўскі дзяржаўны будаўнічы каледж  (МДБК)
Будынак каледжа
Дата заснавання	1966
Тып	прафесійна-тэхнічны каледж[d]
Размяшчэнне	Мсціслаў
Адрас	Магілёўская вобласць, г. Мсціслаў, вул. Савецкая, 10
www.mgsptk.mogilev.by

Гісторыя

Будынак павятовага вучылішча

Будынак адміністрацыйнага корпуса быў пабудаваны ў 1830 годзе для дзяржаўных устаноў. Пасля спусташальных пажараў 1858 і 1863 гг., у 1880 годзе абгарэлы будынак па хадайніцтве губернскага начальства «саступлены» гораду для прыстасавання пад гарадское вучылішча. У 1912 годзе гарадское вучылішча было ператворана ў вышэйшае пачатковае. У 1918 годзе на базе вучылішча адкрываецца 1-я Савецкая яўрэйская школа (7 гадоў навучання), якая ў 1933 годзе перайменавана ў агульнаадукацыйную школу № 5, а ў 1946 годзе ў 3-ю сярэднюю школу.

У кастрычніку 1966 года адкрыта ГПТВ-92, якое рыхтавала кваліфікаваных будаўнікоў. Першым дырэктарам прызначаны Леў Якаўлевіч Гайбергер. Прыём ажыццяўляўся на базе 8 класаў на спецыяльнасці: муляр, тынкоўшчык-маляр-плітачнік, цясляр. Першы выпуск склаў 130 чалавек.

З 1974 года ў вучылішчы пачынаюць рыхтаваць кадры з сярэдняй адукацыяй. У 1980 годзе ўзнагароджана Ганаровай граматай Вярхоўнага Савета БССР. З 2000 года навучэнцы могуць атрымаць сярэднюю спецыяльную адукацыю.

30 красавіка 1998 года Мсціслаўскае ПТВ-92 будаўнікоў ператворана ў Мсціслаўскае вышэйшае прафесійнае вучылішча будаўнічага профіля. 1 верасня 2002 года ў Мсціслаўскі будаўнічы прафесійна-тэхнічны каледж, перайменаваны 13 лютага 2004 года ў Мсціслаўскі дзяржаўны будаўнічы прафесійна-тэхнічны каледж (МДБПТК).

У 2016 годзе ператвораны ў Мсціслаўскі дзяржаўны будаўнічы каледж.

Інфраструктура

Будынак былой земскай управы

Каледж размяшчаецца ў 5 навучальных карпусах, у якіх маецца 30 навучальных кабінетаў, 9 лабараторый, 16 майстэрняў. Акрамя таго, маецца інтэрнат на 400 месцаў, 2 актавыя залы, спартыўны комплекс, аўтадром, сталовая, 3 буфеты, музей і інш.

Спецыяльнасці

Аддзяленне тэхнічнай эксплуатацыі аўтамабіляў

Прафесійна-тэхнічная адукацыя:

• «Тэхнічная эксплуатацыя пад’ёмна-транспартных сродкаў» (кваліфікацыя «Машыніст крана аўтамабільнага»)
• «Вытворчасць будаўніча-мантажных і рамонтных работ» (кваліфікацыя «Стропальшчык»)
• «Эксплуатацыя і рамонт аўтамабіляў» (кваліфікацыі «Вадзіцель аўтамабіля катэгорыі „С“»)

Сярэдняя спецыяльная адукацыя:

• «Тэхнічная эксплуатацыя аўтамабіляў» (кваліфікацыя «Тэхнік-механік»)

Аддзяленне прамысловага і грамадзянскага будаўніцтва

Прафесійна-тэхнічная адукацыя:

• «Апрацоўчыя будаўнічыя работы» (кваліфікацыя «Тынкоўшчык»)
• «Вытворчасць будаўніча-мантажных і рамонтных работ» (кваліфікацыя «Муляр»)
• «Эксплуатацыя электронна-вылічальных машын» (кваліфікацыя «Аператар электронна-вылічальных машын»)
• «Рэстаўрацыйна-аднаўленчыя работы» (кваліфікацыя «Рэстаўратар дэкаратыўна-мастацкіх афарбовак»)

Сярэдняя спецыяльная адукацыя:

• «Прамысловае і грамадзянскае будаўніцтва» (кваліфікацыя «Тэхнік-будаўнік»)

Спасылкі

• Афіцыйны сайт Архівавана 27 кастрычніка 2017.