Мухавец

Мухаве́ц, Бе́лы Мухаве́ц — рака ў Брэсцкай вобласці, правы прыток Буга. Даўжыня 112,6 км. Вадазбор 6600 км². Сярэдні нахіл воднай паверхні 0,2 ‰.

Мухавец
Характарыстыка
Даўжыня	112,6 км
Басейн	6 600 км²
Расход вады	33,6 м³/с
Вадацёк
Выток	Пружаны
• Каардынаты	52°33′49,20″ пн. ш. 24°27′08,10″ у. д.
Вусце	Буг
• Каардынаты	52°04′52,70″ пн. ш. 23°39′08,20″ у. д.
Ухіл ракі	0,2 м/км
Размяшчэнне
Водная сістэма	Буг → Нараў → Вісла → Гданьская бухта
Краіна	Беларусь
Рэгіён	Брэсцкая вобласць
выток вусце
— выток, — вусце
Медыяфайлы на Вікісховішчы

Агульнае

Пачынаецца ў сутоках рэк Муха і Вец у горадзе Пружаны, вусце ў межах горада Брэста. Цячэ па Прыбужскай раўніне (вярхоўе) і Брэсцкім Палессі. Уваходзіць у Дняпроўска-Бугскі водны шлях. Суднаходства ад горада Кобрын (за 64 км ад вусця) да Брэсцкага рачнога порта, ніжэй якога размешчана глухая грэбля, працягласць навігацыйнага перыяду 230—240 сутак.

Сярэднегадавы расход вады каля Брэста 34,9 м³/с, найбольшы 269 м³/с (1979), найменшы 3,4 м³/с (1971—1972). Найвышэйшы ўзровень разводдзя ў сярэдзіне сакавіка, сярэдняя вышыня над межанным узроўнем 1,5—2,4 м, найбольшая 2—3,8 м (1951, 1958). Замярзае ў сярэдзіне снежня, лёд трымаецца да 2-й паловы сакавіка.

Даліна ў верхнім цячэнні невыразная, шырыня яе ў сярэднім цячэнні 400—600 м, ніжэй 1,5—2 км. Схілы ўмерана стромкія, вышынёй 4—8 м (у ніжнім цячэнні 3—6 м), адкрытыя, месцамі разараныя або пад лесам. Пойма двухбаковая, нізкая, парэзаная старыцамі і меліярацыйнымі каналамі, месцамі забалочаная. Да вёскі Шэбрын Брэсцкага раёна шырыня яе 200—400 м, ніжэй 1—1,5 км; у разводдзе і пры паводках затапляецца на глыбіню 0,2—0,8 м у вярхоўі і да 1—2 м у ніжнім цячэнні.

Рэчышча каналізаванае на ўсім працягу. У верхнім цячэнні рака называецца канал Мухавец. Ад Кобрына да Брэста рака зарэгуляваная; шырыня ў межань у верхнім цячэнні 4—8 м, ніжэй упадзення Дняпроўска-Бугскага канала 20—35 м, у вусці 60—70 м. Берагі вышынёй 0,5—2 м, абрывістыя, ніжэй упадзення Рыты разбураюцца, на суднаходным участку абвалаваныя.

У басейне ракі азёры Арэхава, Церабовічы (Валынская вобласць), Ажыннік (Брэсцкая вобласць) і інш.

Асноўныя прытокі

Справа: Дахлоўка, Мінянка, Лепясоўка, Шэўня, Палахва, Жабінка.

Злева: Шопск, Студзянка (Пудрычыца), Дняпроўска-Бугскі канал, Кобрынка, Трасцяніца, Асіпоўка, Рыта, Каменка.

На рацэ

Гарады: Брэст (порт), Пружаны, Жабінка, Кобрын.

Помнікі гісторыі: Брэсцкая крэпасць.

Літаратура

• Ресурсы поверхностных вод СССР. Описание рек и озёр и расчёты основных характеристик их режима. Т. 5. Белоруссия и Верхнее Поднепровье. Ч. 1–2. – Л., 1971.
• Природа Белоруссии: Попул. энцикл. / БелСЭ; Редкол.: И. П. Шамякин (гл. ред.) и др. — Мн.: БелСЭ, 1986. — 599 с., 40 л. ил. (руск.)
• Блакітная кніга Беларусі : Энцыклапедыя / рэдкал.: Н. А. Дзісько і інш. — Мн.: БелЭн, 1994. — 415 с. — 10 000 экз. — ISBN 5-85700-133-1.

Спасылкі

• На Вікісховішчы ёсць медыяфайлы па тэме Мухавец
• Анатоль Гладышчук, Муха + Вец
• А. Гладышчук, Мой родны кут Архівавана 28 верасня 2007. (дакументацыя веласіпеднай экспедыцыі ад вусця да вытокаў ракі Мухавец)