Міхаіл Паўлавіч Сакалоўскі

Міхаіл Паўлавіч Сакало́ўскі (руск.: Михаил Павлович Соколовский; 19 лістапада 1887 — 18 мая 1977) — вучоны, хірург, доктар медыцынскіх навук (1922), прафесар (1922).

Міхаіл Паўлавіч Сакалоўскі
Дата нараджэння	19 лістапада 1887(1887-11-19)
Месца нараджэння	Ржэў, Ржэўскі павет[d], Цвярская губерня, Расійская імперыя
Дата смерці	18 мая 1977(1977-05-18) (89 гадоў)
Месца смерці	Адэса, Адэская вобласць, УССР, СССР
Месца пахавання	Адэса
Грамадзянства	Расійская імперыя  СССР
Род дзейнасці	навуковец
Навуковая сфера	хірургія
Месца працы	Саратаўскі дзяржаўны ўніверсітэт імя М. Г. Чарнышэўскага Смаленскі дзяржаўны ўніверсітэт БДМУ Варонежскі дзяржаўны медыцынскі ўніверсітэт імя М. Н. Бурдэнкі[d] Адэскі нацыянальны медыцынскі ўніверсітэт
Навуковая ступень	доктар медыцынскіх навук (1922)
Навуковае званне	прафесар
Альма-матар	МДУ
Навуковы кіраўнік	Аляксандр Аляксандравіч Багамолец

Біяграфія

Нарадзіўся ў Ржэве. У 1911 годзе скончыў медыцынскі факультэт Маскоўскага ўніверсітэта. У 1911—1913 гадах працаваў асістэнтам кафедры паталагічнай фізіялогіі Саратаўскага ўніверсітэта, у 1913—1914 гадах асістэнтам хірургічнай клінікі. У час Першай сусветнай і Грамадзянскай войнаў у 1915—1918 гадах на Заходнім фронце — хірург ваенных шпіталяў. У 1918—1922 гадах зноў у Саратаўскім універсітэце на пасадзе асістэнта хірургічнай клінікі. У 1922 годзе прафесар хірургічнай клінікі Смаленскага ўніверсітэта.

З 1922 года М. П. Сакалоўскі ў Беларускім дзяржаўным універсітэце. Арганізатар і дырэктар хірургічнай клінікі медыцынскага факультэта, у 1922—1924 гадах загадчык кафедры агульнай хірургіі, у 1922—1929 гадах кафедры аперацыйнай хірургіі і тапаграфічнай анатоміі. Адначасова ў 1922—1923 гадах дэкан медыцынскага факультэта. У 1923—1936 гадах загадваў кафедрай шпітальнай хірургіі медыцынскага факультэта Беларускага дзяржаўнага ўніверсітэта і Мінскага медыцынскага інстытута і адначасова ў 1926—1927 гадах кафедрай стаматалогіі.

У 1936—1941 гадах М. П. Сакалоўскі ў Варонежскім і Адэскім медыцынскіх інстытутах, загадчык кафедры агульнай хірургіі. У час Вялікай Айчыннай вайны — галоўны хірург-кансультант упраўлення эвакашпіталяў Варонежскай і Ульянаўскай абласцей. У 1945—1968 гадах загадчык кафедры факультэцкай хірургіі Адэскага медыцынскага інстытута (з 1965 года — навуковы кансультант).

Памёр і пахаваны ў Адэсе.

Навуковая і грамадская дзейнасць

Аўтар больш за 100 навуковых прац па пытаннях агульнай і прыватнай хірургіі. Прапанаваў новы спосаб апрацоўкі нерваў пры ампутацыі ніжніх канечнасцей, новыя хірургічныя падыходы пры аперацыйным лячэнні слановасці канечнасцей. Працаваў над праблемамі дыягностыкі і хірургічнага лячэння язвавай хваробы страўніка і дванаццаціперснай кішкі. Распрацаваў метад лячэння вадзянкі галаўнога мозгу, разам з Ю. М. Іргерам прапанаваў методыку дрэнажавання страўнічкаў галаўнога мозгу. Аўтар першага падручніка на беларускай мове па аператыўнай хірургіі для студэнтаў медыцынскіх вышэйшых навучальных устаноў, выдадзенага ў Мінску ў 1932 годзе.

Двойчы абіраўся членам праўлення Усесаюзнага навуковага таварыства хірургаў. Прымаў удзел у арганізацыі і правядзенні Першага з’езду хірургаў Беларусі ў 1929 годзе. Быў старшынёй навуковых таварыстваў хірургаў БССР, Малдаўскай ССР (1930—1936).

Сярод апублікаваных прац:

• Кароткі падручнік па аперацыйнай хірургіі. — Мн., 1932;
• Коллоидно-осмотическое давление сыворотки при хирургических заболеваниях // Вести хирургии им. И. И. Грекова, 1934, Т. 34, кн. 100.

Літаратура

• Сакалоўскі Міхаіл Паўлавіч // Беларуская энцыклапедыя: У 18 т. Т. 14: Рэле — Слаявіна / Рэдкал.: Г. П. Пашкоў і інш. — Мн. : БелЭн, 2002. — Т. 14. — С. 87. — 10 000 экз. — ISBN 985-11-0035-8. — ISBN 985-11-0238-5 (т. 14).

Спасылкі

• Соколовский Михаил Павлович (07(19).11.1897—18.05.1977) Архівавана 25 мая 2021. (руск.) // Сайт БДМУ
• 12-я международная научно-практическая конференция по истории медицины и фармации : сборник материалов / Ред. колл.: Э. А. Вальчук (отв. ред.), Е. М. Тищенко (отв. ред.) и др. — Гродно : ГрГМУ, 2012. — 364 с. Архівавана 25 мая 2021. (руск.) — ISBN 978-985-558-072-1