Наталля Георгіеўна Калінічэнка

Наталля Георгіеўна Калінічэнка (11 лютага 1917, с. Уграіды, Краснапільскі раён, Сумская вобласць, Украіна — 11 кастрычніка 2007, г. Гомель) — беларускі архітэктар.

Наталля Георгіеўна Калінічэнка
Дата нараджэння	11 лютага 1917(1917-02-11)
Месца нараджэння	Уграіды, Пакроўская воласць[d], Ахтырскі павет[d], Харкаўская губерня, Расійская імперыя
Дата смерці	11 кастрычніка 2007(2007-10-11) (90 гадоў)
Месца смерці	Гомель, Гомельская вобласць, Беларусь
Грамадзянства	Беларусь
Альма-матар	Харкаўскі інстытут інжынераў камунальнага будаўніцтва (1941)
Месца працы	Гомельскі філіял інстытута «Белдзяржпраект»[d]
Член у	Саюз архітэктараў СССР Беларускі саюз архітэктараў
Працаваў у гарадах	Гомель

Біяграфія

Скончыла ў 1941 годзе Харкаўскі інстытут інжынераў камунальнага будаўніцтва. Інжынер-праектыроўшчык (1944—1947), начальнік праектна-каштарыснага бюро гаржылупраўлення г. Біла Цэрква (1947—1948), архітэктар (1948—1950), старэйшы архітэктар (1950—1955), галоўны архітэктар праектаў (1955—1969), кіраўнік архітэктурна-канструктарскага аддзела (1969—1972) Гомельскага філіяла «Белдзяржпраекта».

Член Саюза архітэктараў СССР з 1956 года. У 1960-х гадах — старшыня Гомельскага аддзялення Саюза архітэктараў БССР; член упраўлення Саюза архітэктараў БССР (адно скліканне); дэлегат V з’езду Саюза архітэктараў СССР, на якім была членам мандатнай камісіі (1970).

Творчасць

Аўтар праектаў аднаўлення і рэканструкцыі шэрагу буйных аб’ектаў жылога, навучальнага і лячэбнага прызначэння г. Гомеля. Асноўныя працы: 30-кватэрны жылы дом Дзяржбанка па вул. Першамайскай (1949-1952), 20-кватэрны жылы дом Дзяржплана па вул. Арцёма (1955-1957), комплекс дамоў упраўлення хлебапрадуктаў па вул. Працоўнай (1952-54), 28-кватэрны жылы дом Мясарыбзбыту па вул. Савецкай (1954-58), 32-кватэрны дом маслазавода па вул. Савецкай (1960-63), рэканструкцыя і прыбудова музвучылішча па вул. Савецкай (1962-65), навучальны, лабараторны і спартыўны карпусы дарожна-будаўнічага тэхнікума на пл. Працы і па вул. Кірава (1955-1958, 1968-1972, у аўтарскім калектыве), рэканструкцыя і прыбудова будынка ваенкамата па вул. Садовай (1963-65), 28-кватэрны жылы дом фабрыкі «Спартак» па вул. Камсамольскай (1958-60), прафілакторый Беларускай чыгункі па вул. Катоўскага (1967-72), праект забудовы дамоў па вул. Галавацкага (1965-69) і інш.

Узнагароды

Узнагароджана Ганаровай граматай раённага камітэта Кампартыі Беларусі і выканкама Савета дэпутатаў працоўных Цэнтральнага раёна г. Гомеля (1967); Граматамі Саюза архітэктараў СССР (1967), Гомельскага абласнога камітэта Кампартыі Беларусі і абласнога Савета дэпутатаў працоўных (1969), Саюза архітэктараў БССР (1969); Ганаровымі граматамі Гомельскага філіяла «Белдзяржпраекта» (1970, 1987).

Літаратура

• Калиниченко Наталия Георгиевна // Кто есть Кто в Республике Беларусь. Архитекторы Беларуси. / Редакционный совет: И. В. Чекалов (пред.) и др. — Минск: Энциклопедикс, 2014. — 140 с. — ISBN 978-985-7090-29-7. (руск.)
• Калиниченко Наталия Георгиевна // Архитекторы Советской Белоруссии: Биогр. справочник / Союз архитекторов БССР; Сост. В. И. Аникин и др. — Мн.: Беларусь, 1991. — 262 с. — ISBN 5-338-00611-1. (руск.)