Родры ап Мервін

Ро́дры ап Ме́рвін, таксама Родры Вялікі (вал.: Rhodri ap Merfyn, Rhodri Mawr; каля 820—878) — валійскі кіраўнік з дынастыі Гвінеда, які валадарыў на большыя частцы тэрыторыі Уэльса. Ён першы з валійскіх кіраўнікоў, які атрымаў тытул «Вялікі», у ірландскіх «Аналах Ульстэра» завецца «каралём брытаў».

Родры ап Мервін
вал.: Rhodri ap Merfyn
Кароль Гвінеда 844 — 878
Папярэднік	Мервін ап Гурыяд
Пераемнік	Анараўд ап Родры
Кароль Повіса 855 — 878
Папярэднік	Кінген ап Кадэл
Пераемнік	Мервін ап Родры
Кіраўнік Сейсілуга 872 — 878
Папярэднік	Гуган ап Меўрыг
Пераемнік	Кадэл ап Родры
Нараджэнне	каля 820 востраў Мэн
Смерць	878 Англсі, Isle of Anglesey[d], Уэльс
Род	House of Gwynedd[d]
Бацька	Мервін ап Гурыяд[d]
Маці	Nest ferch Cadell[d]
Жонка	Ангарад верх Мейрыг[d]
Дзеці	Гурыяд ап Родры Анараўд ап Родры Кадэл ап Родры Мервін ап Родры Тудвал ап Родры Мейрыг ап Родры Родры ап Родры Гвідэліг ап Родры Айдан ап Родры
Веравызнанне	Хрысціянства
Медыяфайлы на Вікісховішчы

Біяграфія

Карта ўладанняў Родры ап Мервіна ва Уэльсе.

Родры быў сынам кіраўніка Гвінеда Мервіна Врыха (Вяснушкаватага) і Нест, дачкі Кадэла з каралеўскага дому Повіса. Пасля смерці свайго бацькі ў 844 годзе Родры атрымаў па спадчыне трон Гвінеда. Калі дзядзька Родры, кіраўнік Повіса Кінген ап Кадэл памёр у паломніцтве ў Рым у 855 годзе, Родры ўзышоў і на трон гэтага каралеўства. У 872 годзе загінуў кароль Сейсілуга Гуган і Родры, які быў мужам Ангхарад, сястры Гугана, далучыў Сейсілуг да сваіх уладанняў. Такім чынам, ён стаў кіраўніком большай часткі Уэльса.

На працягу свайго кіравання Родры быў вымушаны адбіваць напады англасаксаў, а таксама супрацьстаяць ўзрастаючаму ціску вікінгаў, якія ў 854 годзе разарылі востраў Англсі. У 856 годзе ён перамог армію скандынаваў пад кіраўніцтвам нейкага Горма ці Хорма. Пра перамогу «Рорыка» над нарманамі распавядаецца, у прыватнасці, у двух вершах Седулія Скота, прыдворнага паэта франкскага караля Карла Лысага.

У 877 годзе Родры зноў ваяваў з вікінгамі на Англсі, але пацярпеў паражэнне і быў вымушаны бегчы ў Ірландыю. У наступным годзе Родры і яго сын Гурыяд былі забіты: паведамляецца, што іх праціўнікамі былі англасаксы пад кіраўніцтвам Альфрэда Вялікага. Калі праз некалькі гадоў Анараўд ап Родры атрымаў перамогу над войскамі Мерсіі, у аналах гэта падзея была адзначана як «помста Бога за Родры».

Сын Родры Кадэл заваяваў Дывед, які пазней, пры ўнуку Родры Хівеле, быў злучаны з Сейсілугам у каралеўства Дэхейбарт.

Літаратура

• Nora K. Chadwick. Celtic Britain. London: Thames and Hudson, 1963
• John Edward Lloyd. A history of Wales: from the earliest times to the Edwardian conquest. London: Longmans, Green & Co., 1911

Спасылкі

• Кароткі жыццяпіс (англ.)
• Родры Архівавана 22 мая 2012.