Ромеры

Ромеры (польск.: Römerowie, ням.: Römern, Roemern) — вялікалітоўскі шляхецкі род нямецкага паходжання.

Ромер
Апісанне герба: гл. тэкст
Частка радаводу кнігі	Віленская, Санкт-Пецярбургская
Часткі радаводу кнігі	VI і II
Падданства	курфюрства Саксонія, Рэч Паспалітая, Расійская імперыя
Медыяфайлы на Вікісховішчы

Гісторыя

Род Ромераў, згодна падання, выводзіўся ад рымскага консула Юстуса Севярынаса, які ў 983 г. вымушаны быў пакінуць Рым і асеў у Германіі, дзе атрымаў прозвішча «Römer» — «рымлянін». Яго нашчадкі жылі ў Саксоніі, а Берэнд Ромер у 1223 г. са світай князя Альберта Саксонскага прыбыў у Лівонію і стаў рыцарам ордэна.

Капліца Ромераў у касцёле Найсвяцейшай Дзевы Марыі ў Троках. А. Ромер

Калі Рэч Паспалітая ў 1630 г. вымушана была аддаць Інфлянты Швецыі, Стэфан Ромер перасяліўся на Літву, бо як пісаў яго сын Матэуш «лічыў лепш ўсё страціць, а вернасць Рэчы Паспалітай захаваць». Сыны і ўнукі Стэфана служылі ў войску.

Сям’я Ромераў, Эдвард Ян Ромер, 1829

У 1700 годзе ў касцёле Найсвяцейшай Дзевы Марыі ў Троках, у ваколіцах якіх Ромеры валодалі маёнткамі, была дабудавана сямейная капліца.

Іншая галіна роду перасялілася ў канцы XVIII ст. з Саксоніі ў Расію; з яе Мікалай Фёдаравіч Ромер (1804—1889) — сапраўдны тайны саветнік, сенатар і член Апякунскага Савета ўстаноў Грамадскага Догляду.

Род Ромераў унесены ў дваранскі матрыкул Курляндскай губерні, у VI частку радаводнай кнігі Віленскай губерні і ў II частку радаводнай кнігі СПб. губерні.

Апісанне герба

У чырвоным полі два скрыжаваных сярэбраных кія пілігрыма, кожны з дзвюма кнопкамі на ручцы. У нашлемніку такія ж кіі, якія сканчаюцца трыма страусінымі пёрамі. Намёт чырвоны падкладзены срэбрам.

Найбольш вядомыя

1. Міхал Ромер (1778—1853), грамадска-палітычны дзеяч.
2. Эдвард Ян Ромер (1806—1878), грамадскі дзеяч, літаратар, перакладчык i мастак.
3. Альфрэд Ізідор Ромер (1832—1897), жывапісец, скульптар, медальер, мастацтвазнавец, этнограф. Сын Эдварда Яна Ромера.
4. Эдвард Матэй Ромер (1848—1900), мастак. Сын Эдварда Яна Ромера.
5. Міхал Піус Ромер (1880—1945), польскі і літоўскі навуковец, грамадска-палітычны дзеяч; адзін з галоўных ідэолагаў ліберальна-дэмакратычнага крыла краёўцаў.

Спасылкі

• На Вікісховішчы ёсць медыяфайлы па тэме Ромеры
• Генеалагічнае дрэва на Geni
• Род:Рёмеры на Радаводзе

• Ромеры
• The Artists of the Römer Family Архівавана 8 жніўня 2014. (англ.)
• Römeriai (літ.)
• Romer właściwie Römer herbu własnego (t. 11 s. 380—385) Архівавана 8 жніўня 2014. (польск.)