Свята-Троіцкая царква (Ельск)

Свята-Троіцкая царква — праваслаўная царква ў Ельску. Помнік драўлянага дойлідства.

Праваслаўны храм
Свята-Троіцкая царква
51°48′12,23″ пн. ш. 29°09′07,15″ у. д.
Краіна	Беларусь
Горад	Ельск
Канфесія	Беларуская праваслаўная царква
Епархія	Тураўская епархія
Архітэктурны стыль	Беларускае народнае дойлідства
Будаўніцтва	1769—1780 гады
Сайт	troitca.cerkov.ru
Медыяфайлы на Вікісховішчы

Гісторыя

Пабудавана ў 1769—1780 гг. у г. Ельск (вул. Ленінская, 3). Мае рысы стылю класіцызму. У 1870—1871 гг. да бабінцу прыбудаваная званіца (васьмярык на двух чацверыках), завершаная высокім шатром.

Архітэктура

Пяцізрубны крыжова-купальны храм. Цэнтральны васьмігранны зруб (даўжыня 23 м, шырыня 14 м, вышыня 11,8 м) завершаны масіўным светлавым васьмерыком з купальным пакрыццём. Прамавугольны бабінец, гранёныя алтарныя і бакавыя зрубы накрытыя пакатымі двухсхільнымі дахамі з вальмамі на тарцах. Сцены вертыкальна ашаляваныя дошкамі з нашчыльнікамі і прарэзаныя вокнамі з паўцыркульнымі завяршэннямі.

Інтэр’ер

У інтэр’еры дамінуе двухсветлавая прастора сяродкрыжжа, перакрытая гранёным шатровым скляпеннем. У яе шырокімі прасветамі адкрываюцца бакавыя памяшканні. Над бабінцам размешчаны хоры. Апсіда вылучана драўляным іканастасам.

У 1939—1941 гг. царква была зачынена, зараз дзейнічае. Помнік рэспубліканскага значэння.

Літаратура

• Ельская Троіцкая царква // Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — 576 с. — 10 000 экз. — ISBN 985-11-0035-8. — ISBN 985-11-0106-0 (т. 6).
• Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.
• Праваслаўныя храмы Беларусі: энцыклапедычны даведнік / А. М. Кулагін; [рэдакцыйны савет: Г. П. Пашкоў, Л. В. Календа]. — Мінск: Беларуская Энцыклапедыя, 2007. — 653 с. 2000 экз. ISBN 978-985-11-0389-4.

Спасылкі

• Свята-Троіцкая царква (Ельск) на сайце Праваслаўная архітэктура Беларусі (бел.)
• Свята-Троіцкая царква (Ельск) на сайце Radzima.org
• Свята-Троіцкая царква (Ельск) на сайце Глобус Беларусі (руск.)