Сядзібна-паркавы комплекс Бішэўскіх (Лынтупы)

Сядзібна-паркавы комплекс Бішэўскіх — помнік сядзібна-паркавай архітэктуры пачатку XX ст. Створаная на паўднёва-заходняй ускраіне г. п. Лынтупы Пастаўскага раёна, фарміравалася ў канцы XVIII—XX стст. Першапачаткова належала Гільзенам. Сучасны выгляд набыла пры ўладальніку Ю. Бішэўскім.

Сядзібна-паркавы комплекс
Сядзібна-паркавы комплекс Бішэўскіх
55°03′08″ пн. ш. 26°18′25″ у. д.
Краіна	Беларусь
Гарадскі пасёлак	Лынтупы
Архітэктурны стыль	неарэнесанс
Архітэктар	Тадэвуш Раствароўскі
Заснавальнік	Юзаф Бішэўскі
Дата заснавання	1907
Будынкі
сядзібны дом • партэр • мураваны арачны мост • капліца • службовы флігель • бровар • вежа-вяндлярня • службовы будынак • гаспадарчыя пабудовы
Статус	Гісторыка-культурная каштоўнасць Беларусі, шыфр 213Г000874
Медыяфайлы на Вікісховішчы

Занесена ў Дзяржаўны спіс гісторыка-культурных каштоўнасцей Рэспублікі Беларусь як аб'ект гісторыка-культурнай спадчыны рэгіянальнага значэння.

Архітэктура

Сядзіба

Ансамбль сядзібы падзяляецца на дзве зоны. Парадная зона перад палацам уключае партэр, мураваны арачны мост, капліцу, службовы флігель і бровар. За палацам і ставам размешчаная выцягнутая па папярочнай восі гаспадарчая зона. Цэнтр ансамбля — двухпавярховы мураваны палац (1907 г.) неарэнесанснай архітэктуры. У асіметрычнай аб'ёмна-прасторавай кампазіцыі дамінуе трох'ярусная чацверыковая вежа. Насычаная архітэктарская пластыка ўключае канеліраваныя калоны, пілястры, анты, рустоўку, ракавіны, атык з балюстрадай і інш. Планіроўка калідорная.

Парк

Вежа ў старым парку

Парк пейзажна-рэгулярнага тыпу (плошча 6 га). Насаджэнні згрупаваны па перыметры чатырох ставоў і каналаў паміж імі на р. Лынтупка. Галоўны прамавугольны выцягнуты па папярочнай восі стаў выдзелены каля дома гранітнай набярэжнай са сходамі (набярэжная мела дэкаратыўную скульптуру). У парку растуць Acer saccharinum, елка блакітная (Picea pungens), Juglans cinerea, лістоўніца еўрапейская (Larix decidua), піхта сібірская (Abies sibirica) і інш. Сярод гаспадарчых пабудоў вылучаецца вежа-вяндлярня з машыкулямі і вокнамі-байніцамі ў рэтраспектыўна-замкавым стылі.

Літаратура

• Архітэктура Беларусі: Энцыклапедычны даведнік. — Мн.: БелЭн, 1993. — 620 с. — ISBN 5-85700-078-5.

Спасылкі

• Сядзібна-паркавы комплекс Бішэўскіх (Лынтупы) на сайце Radzima.org
• Сядзібна-паркавы комплекс Бішэўскіх (Лынтупы) на сайце Глобус Беларусі (руск.)
• Сядзібна-паркавы комплекс Бішэўскіх (Лынтупы) на сайце «Архіварта»