Тарпа́н (Equus ferus ferus) — дзікі конь.
Адрозніваюць 2 падвіды: тарпан стэпавы і тарпан лясны. Вышыня ў карку тарпана стэпавага да 137 см, тарпан лясны драбнейшы. Склад цела дужы, масць шэрая. Уздоўж спіны чорная паласа, грыва і хвост чорныя.
Былі пашыраны ў Еўропе і Заходнім Казахстане. Тарпан стэпавы вынішчаны ў XVIII—XIX ст. Тарпан лясны — на пачатку XIX ст. У 1930-х г. у Германіі і Польшчы працавалі над узнаўленнем тарпана ляснога. У 1962 і 1968 з Польшчы на Беларусь завезена 5 асобін у Белавежскую пушчу.
Як свойская жывёла прыручаны 5—6 тыс. гадоў назад. Магчыма дзікі продак некаторых парод свойскіх коней. Так, лічыцца, што ад тарпанаў паходзяць палескія коні.
