Тэадэн
Тэ́адэн (стар.-англ.: Théoden) — персанаж рамана Дж. Р. Р. Толкіна «Уладар Пярсцёнкаў», сямнаццаты кароль Рохана. Пры першым сваім з’яўленні ў сюжэце рамана паўстае нямоглым старым, які знаходзіцца пад уплывам свайго дарадцы Грымы Чарвявуста, які дзейнічае ў інтарэсах варожа настроенага да Рохана чараўніка Сарумана. Аднак дзякуючы Гэндальфу Тэадэн быў ацэлены і зноў узначаліў вершнікаў Рохана, атрымаўшы перамогу над войскам Сарумана ў бітве пры Хорнбургу. Загінуў у бітве на Пеленарскіх палях, прыйшоўшы на чале шасцітысячнага войска на дапамогу абложанай войскамі Мордара гондарскай крэпасці Мінас Тырыт.
| Раса | Чалавек |
|---|---|
| Пол | М |
| Месца пражывання | Эдарас |
| Бацька | Тэнгель |
| Дзеці | Тэадрэд |
Тэадэн увасабляе распаўсюджаны ў старажытнаанглійскай літаратуры і асабліва шануемы Толкінам гераічны ідэал мужнасці перад абліччам немінучай паразы[1]. Яго гібель на Пеленарскіх палях «у арэоле смутку і славы» параўноўваюць з роляй караля готаў Тэадорыха ў бітве на Каталаўнскіх палях 451 года.
Зноскі
- ↑ Solopova 2009, pp. 28–29.
Літаратура правіць
- E. Solopova. Languages, Myths and History: An Introduction to the Linguistic and Literary Background of J.R.R. Tolkien's Fiction. — New York City: North Landing Books, 2009. — 107 p. — ISBN 0-9816607-1-1.