Уладзімір Віктаравіч Шкатэлаў

Уладзімір Віктаравіч Шкатэ́лаў (руск.: Владимир Викторович Шкателов; 7 (19) мая 1861 — 7 кастрычніка 1940) — вучоны ў галіне лесахіміі і хімічнай тэхналогіі, доктар хімічных навук (1889), прафесар (1883), акадэмік Акадэміі навук БССР (1929), Заслужаны дзеяч навукі БССР (1938).

Уладзімір Віктаравіч Шкатэлаў
Дата нараджэння	7 (19) мая 1861
Месца нараджэння	Санкт-Пецярбург, Расійская імперыя
Дата смерці	7 кастрычніка 1940(1940-10-07) (79 гадоў)
Месца смерці	Мінск, Мінская вобласць, БССР, СССР
Месца пахавання	Вайсковыя могілкі
Грамадзянства	Расійская імперыя  СССР
Род дзейнасці	навуковец
Навуковая сфера	хімія
Месца працы	Маскоўская сельскагаспадарчая акадэмія імя К. А. Ціміразева Новаалександрыйскі інстытут сельскай гаспадаркі і лесаводства[d] Харкаўскі нацыянальны аграрны ўніверсітэт імя В. В. Дакучаева Беларуская дзяржаўная сельскагаспадарчая акадэмія Інстытут хіміі АН БССР
Навуковая ступень	доктар хімічных навук (1889)
Навуковае званне	прафесар акадэмік Акадэміі навук Беларускай ССР
Альма-матар	Маскоўскі дзяржаўны тэхнічны ўніверсітэт імя М. Э. Баўмана
Узнагароды

Біяграфія

Нарадзіўся ў Санкт-Пецярбургу. Скончыў першую класічную гімназію і ў 1878 годзе паступіў на хімічнае аддзяленне Імператарскага Маскоўскага тэхнічнага вучылішча, якое скончыў у 1884 годзе. З 9 лістапада 1886 года асістэнт Пятроўска-Разумоўскай сельскагаспадарчай акадэміі (Маскоўская сельскагаспадарчая акадэмія імя К. А. Ціміразева). Абараніў дысертацыю на тэму «О химическом составе смол». У 1893—1914 гадах ардынарны прафесар Новаалександрыйскага інстытута сельскай гаспадаркі і лесаводства. З пачаткам Першай сусветнай вайны эвакуіраваўся разам з інстытутам у Харкаў і ў 1919 годзе па прапанове Савета Харкаўскага сельскагаспадарчага інстытута атрымаў званне заслужанага прафесара. У ліпені 1923 года У. В. Шкатэлаў пераязджае ў Мінск і пачынае працу на кафедры сельскагаспадарчай і лясной тэхналогіі Беларускага дзяржаўнага інстытута сельскай і лясной гаспадаркі. З 1925 года, пасля стварэння ў Горках Беларускай сельскагаспадарчай акадэміі сельскай і лясной гаспадаркі, працуе ў ёй. У 1930 годзе У. В. Шкатэлаў Прызначаны на пасаду дырэктара Навукова-даследчага інстытута хіміі Акадэміі навук БССР у Мінску. Потым пераязджае ў Гомель і ў 1934 годзе стварае і становіцца кіраўніком лесахімічнай групы Інстытута хіміі Акадэміі навук БССР. У 1938 годзе вяртаецца ў Мінск і кіруе лесахімічнай лабараторыяй Інстытута хіміі.

Памёр У. В. Шкатэлаў 7 кастрычніка 1940 года. Пахаваны на Вайсковых могілках у Мінску.

Навуковая дзейнасць

Аўтар навуковых прац па даследаванні хімічнага складу і будовы натуральных смаляных кіслот і шкіпінараў. Праводзіў першыя даследаванні па падсочцы хвоі ў розных рэгіёнах Расіі. Распрацаваў тэхналагічныя працэсы на першых у Беларусі каніфольна-шкіпінарных заводах (у Бабруйску і Барысаве).

Сярод апублікаваных прац:

• О химическом составе смол. — М., 1889.
• О составе русской смолы из pinus silvestris. // Журнал Русского физико-химического общества, 1888.
• О живице различных хвойных, ее составе и свойствах. // Записки Новоалександрийского института, 1897.
• О составе белорусской живицы и канифоли из Pinus silvestris и сравнение их со смоляными продуктами других хвойных и с иностранными, с которыми они идентичны / Бел. гос. акад. сел. хоз-ва. — Горки, БССР: Тип. Акад., 1927.
• О составе твердой части естественной смолы и канифоли — Мн.: Издательство АН БССР, 1939.

Літаратура

• Шкатэлаў Уладзімір Віктаравіч // Беларусь: энцыклапедычны даведнік / Рэдкал. Б. І. Сачанка (гал. рэд.) і інш.; Маст. М. В. Драко, А. М. Хількевіч. — Мн.: БелЭн, 1995. — С. 767. — 800 с. — 5 000 экз. — ISBN 985-11-0026-9.

Спасылкі

• База данных «История белорусской науки в лицах» Центральной научной библиотеки им. Я. Коласа НАН Беларуси (руск.) 
• Шкателов, Владимир Викторович // Энциклопедический словарь Брокгауза и Ефрона: В 86 томах (82 т. и 4 доп.) (руск.) . — СПб., 1890—1907.
• Сергей Сабадаш Патриарх // Проза.ру (руск.)