Уру (народ)
Уру (саманазва: Qhas Qut suñi, літаральна «азёрны народ») — індзейскі народ у Балівіі і Перу. Жывуць на штучных астравах і берагах возера Тытыкака. Агульная колькасць (2013 г.) — 4 600 чалавек[1].
| Уру (Qhas Qut suñi) | |
| |
| Агульная колькасць | 4600 |
|---|---|
| Рэгіёны пражывання | Паўднёвая Амерыка |
| Мова | уру |
| Рэлігія | анімізм, каталіцызм |
| Блізкія этнічныя групы | чыпая |
Мяркуецца, што уру — прамыя нашчадкі першых пасяленцаў Альтыплана, якія сяліліся вакол возера Тытыкака ўжо 3700 гадоў таму. Хаця уру Перу і Балівіі размаўляюць на аднолькавай мове, генетыкі выявілі, што яны паходзяць ад 2 розных ліній перасяленцаў. У той жа час уру генетычна адрозніваюцца ад суседдзяў кечуа і аймара. У II ст. да н. э. — X ст. н. э. землі вакол возера Тытыкака ўваходзілі ў межы развіцця цывілізацыі Тыўанака. Пазней сюды перасяляліся аймара і з XV ст. — кечуа. Мяркуюць, што да іх прыхода тэрыторыі, населеныя уру, былі шырэйшымі. Яшчэ ў XIX ст. асобныя паселішчы уру знаходзіліся ў аддаленні берагоў Тытыкакі.
Сучасныя уру — насельнікі штучных астравоў, які ствараюць з мясцовага трыснягу татора. З яго таксама вырабляюць лодкі. Уру ўжываюць у ежу карані татора, багатыя ёдам, займаюцца рыбалоўствам і паляваннем, трымаюць свінняў і качак. На берагах возера арганізуюць палеткі, дзе вырошчваюць бульбу і кукурузу. Могілкі для памерлых таксама знаходзяцца на беразе. У мінулым прыбярэжныя землі былі захоплены аймара і кечуа, якія выкарыстоўвалі зямельную маёмасць як фактар падначалення астраўнога народа. У нашы дні уру змагаюцца за перадачу зямлі іх абшчынам. Усё больш важную эканамічную роль адыгрывае турызм. Ён стымулюе захаванне традыцыйнага ладу жыцця і старажытных рамёстваў, у тым ліку пляцення, ткацтва, гафта.
Дзякуючы адноснай ізаляванасці культура уру амаль не была крэалізавана іспанцамі. У прыватнасці, захаваліся архаічныя формы здабычы рыбы з дапамогай свойскіх бакланаў. Галоўнай сацыяльнай адзінкай з’яўляецца вялікая пашыраная сям'я, што абумоўлена важнасцю ўзаемнай дапамогі і патрэбай стала рамантаваць штучныя астравы. Уру шырока вядомы каляровым гафтам на тканінах. У нашы дні ўсе дзеці наведваюць 2 школы, атрымоўваюць сучасную медыцынскую дапамогу.
Уру захоўваюць некаторыя анімістычныя ўяўленні. Лічыцца, што ў старажытнасці яны шанавалі бажаство Месяца. Большасць сучасных вернікаў — каталікі.
Зноскі
Спасылкі правіць
|
Уру (народ) на Вікісховішчы |
|---|