Чэрыкаўскі павет

Чэрыкаўскі павет — адміністрацыйна-тэрытарыяльная адзінка на Беларусі ў 1773—1924 гг. Цэнтр — г. Чэрыкаў.

Чэрыкаўскі павет
Краіна	Расійская імперыя
Уваходзіць у	Беларуская губерня (1796—1802) Магілёўская губерня (1802—1919) Гомельская губерня (1919—1924) БССР (1924—1924) Магілёўскае намесніцтва (1778—1796) Магілёўская губерня (1775—1778) Рагачоўская правінцыя (1773—1775)
Адміністрацыйны цэнтр	Чэрыкаў
Дата ўтварэння	13 (24) жніўня 1773
Дата скасавання	2 чэрвеня 1924
Насельніцтва	150 277 чал. (1897) 214 000 чал. (1914)
Плошча	4 648 км² (1914)

Часы Расійскай імперыі

Утвораны 13 жніўня 1773 г. у складзе Рагачоўскай правінцыі. З 3 красавіка 1777 г. у Магілёўскай, з 3 студзеня 1797 г. — у Беларускай губернях. У 1796 г. частка Чэрыкаўскага павета на поўдні перададзена ў Рагачоўскі павет, на усходзе да Чэрыкаўскага павета далучаны амаль увесь скасаваны Клімавіцкі павет. З 10 сакавіка 1802 г. у Магілёўскай губерні з аднаўленнем межаў 1777 г. Меліся 4 мястэчкі: Краснаполле (Маластоўка), Крычаў, Маляцічы, Студзянец.

Плошча і насельніцтва

Плошча 4084 кв. вярсты. Насельніцтва каля 150,3 тыс. чалавек (1897 г.), з іх 135,3 тыс. праваслаўных, 1,7 тыс. католікаў, 13 тыс. іудзеяў.

Адміністрацыйны падзел (1861 г.)

З 1861 г. падзяляўся на 16 валасцей:

• Беліцкую;
• Брацькавіцкую;
• Доўгавіцкую;
• Доўжанскую;
• Дубраўскую;
• Камаровіцкую;
• Краснапольскую;
• Крычаўскую;
• Лабанаўскую;
• Маляціцкую;
• Мхініцкую;
• Наваельнінскую;
• Палужскую;
• Саматэвіцкую;
• Старынскую;
• Студзянецкую.

Ураднікі павета

• Чэрыкаўскія павятовыя маршалкі

Савецкі час

З 26 красавіка 1919 г. Чэрыкаўскі павет у складзе Гомельскай губерні РСФСР, 14 лютага 1923 г. да яго далучана Прапойская воласць скасаванага Быхаўскага павета. У жніўні 1919 г. у Маляціцкай воласці выбухнула антысавецкае паўстанне, у якім удзельнічалі каля 300 чал.

У выніку ўзбуйнення (1923 г.) засталося 8 валасцей:

• Брацькавіцкая;
• Краснапольская;
• Крычаўская;
• Маляціцкая;
• Наваельнінская;
• Прапойская;
• Саматэвіцкая;
• Чэрыкаўская.

3 сакавіка 1924 г. Чэрыкаўскі павет перададзены БССР, 2 чэрвеня 1924 г. аб'яднаны з Клімавіцкім паветам пад назвай Калінінская акруга.