Шырневічы

Шырневічы, Шырновічы, Шырнавічы — колішняя вёска на тэрыторыі сучаснага Крупскага раёна.

Вёска Шырневічы Краіна Беларусь Вобласць Мінская Раён Крупскі Каардынаты 54°15′56,37″ пн. ш. 29°06′37,97″ у. д. Шырневічы на карце Беларусі ±

Размяшчалася на правым беразе Бабра за 6 км ніжэй цяперашніх Крупак. Станам на 2019 год захаваліся вясковыя могілкі.

Гісторыя

Пачаткова, прынамсі ў канцы XIV стагоддзя, Шырневічы — група даннікаў на заходняй ускраіне Друцкага княства, якая пазней долямі трапіла ў розныя ўдзелы друцкіх князёў, а затым перайшла да іх спадчыннікаў і пераемнікаў. Такім чынам пэўную долю Шырневічаў атрымалі князі Адзінцэвічы, на думку некаторых даслечыкаў яны маглі быць і галінай роду Друцкіх.

Да 1436 года даннікі Шырневічы належалі князю Аляксандру Адзінцэвічу, які па галоўнай сядзібе зваўся князем Рэпухаўскім, на баку вялікага князя Свідрыгайлы браў удзел у бітве пад Вількамірам (1435) і пасля паразы паехаў з сынам у Маскву. Вялікі князь Жыгімонт канфіскаваў маёнткі князя Адзінцэвіча і падараваў іх літоўскаму пану Юшку Гойцавічу.

Упершыню згадваюцца ў 1461 годзе, калі пан Юшка адказаў сваю «выслугу на вялікім князю Жыгімонце» — «двор» Рэпухаў з «дварцом» Ваўкавічы, «дварцом» Мілотынню, даннікамі Капеньчычамі, даннікамі на Белай і даннікамі Шырневічамі — жонцы Ганне Даўгірдаўне. Пані Ганна, пасля смерці пана Юшкі, выйшла замуж за пана Івана Іллініча і ў 1481 годзе падаравала яму спадчыну па першым мужу.

Пазней Шырневічы згадваюцца як частка Варанцэвіцкага маёнтка Ільінічаў, невядома, ці да гэтага маёнтка належала яшчэ адна доля даннікаў Шырневічаў, ці пан Іван Ільініч перапісаў на Варанцэвічы тых даннікаў, што атрымаў з Рэпухаўскім маёнткам, не выключаецца магчымасць разам першага і другога.

У 1559 годзе Шырневічы згадваюцца і як частка Варанцэвіцкай воласці, якая належала дзяржаўнаму Аршанскаму замку, склад яе быў стракаты — саміх Варанцэвіч у ёй не было, але былі паселішчы са складу маёнтка Падбярэззе ды іншых удзелаў былога Друцкага княства. Як гэтыя ўладанні трапілі да замка, не вядома. Магчыма, гэта яшчэ адна доля Шырневічаў з ранейшага ўдзелу кагосьці з князёў Друцкіх, які ў сярэдзіне XVI стагоддзя перайшоў на вялікага князя. У гэтай долі Шырневічаў было 5 службаў, што агулам налічвалі 19 дымоў.

Далей крыніцамі прасочваюцца толькі Шырневічы, звязаныя з Варанцэвіцкім маёнткам Іллінічаў ды іх наступнікаў.

Станам на 1775 год — 26 двароў.

Станам на 1910 год вёска Шырневічы і пасёлак Шырневічы знаходзіліся ў складзе Бобрскай воласці Сенненскага павета Магілёўскай губерні.

З 1924 года ў складзе Крупскага раёна.

У 1933 годзе пры стварэнні зенітна-артылерыйскага палігона Заходняй асобай ваеннай акругі жыхары Шырневіч былі выселены (разам з жыхарамі суседніх вёсак Слоўчы, Краснай Горкі, Селішча, Маласаяў).

Спасылкі

• Шырневічы на сайце Глобус Беларусі (руск.)