Энгельс Канстанцінавіч Дарашэвіч

Энгельс Канстанцінавіч Дарашэвіч (26 кастрычніка 1931, Мінск — 14 лютага 2020) — беларускі філосаф і культуролаг. Доктар філасофскіх навук (1984), прафесар (1992).

Энгельс Канстанцінавіч Дарашэвіч
Дата нараджэння	26 кастрычніка 1931(1931-10-26)
Месца нараджэння	Менск, БССР, СССР
Дата смерці	14 лютага 2020(2020-02-14) (88 гадоў)
Род дзейнасці	філосаф
Месца працы	Інстытут філасофіі НАН Беларусі Інстытут сацыялогіі НАН Беларусі Факультэт традыцыйнай беларускай культуры і сучаснага мастацтва БДУКМ
Навуковая ступень	доктар філасофскіх навук
Навуковае званне	прафесар
Альма-матар	БДУ
Прэміі

Біяграфія

Нарадзіўся 26 кастрычніка 1931 года ў Мінску ў сям’і служачых. У Другую сусветную вайну з маці быў у эвакуацыі, у тым ліку ў Сталінградзе, дзе жанчына працавала ваенным медыкам. Бацька Энгельса Канстанцінавіча загінуў, змагаючыся ў мінскім падполлі.

Вучыўся ў сярэдняй школе № 42 г. Мінска. Скончыў у 1953 годзе Беларускі дзяржаўны ўніверсітэт, у 1958 годзе — аспірантуру. У 1958 годзе абараніў кандыдацкую дысертацыю «Георгій Валянцінавіч Пляханаў пра французкі матэрыялізм XVIII ст.».

У 1985 годзе абараніў доктарскую дысертацыю «Філасофія эпохі Асветніцтва ў Беларусі».

У 1958—1990 гадах працаваў у Інстытуце філасофіі і права АН БССР: вядучы навуковы супрацоўнік, загадчык аддзела; у 1990—2002 гадах у Інстытуце сацыялогіі НАН Беларусі: загадчык аддзела, галоўны навуковы супрацоўнік. З 2002 года прафесар кафедры культуралогіі Беларускага дзяржаўнага ўніверсітэта культуры і мастацтваў, з 2009 — прафесар кафедры этналогіі і фальклору.

Навуковая дзейнасць

Навуковыя інтарэсы: гісторыя філасофіі і культуры Беларусі; іх генезіс, патэнцыял, тэндэнцыі развіцця ад хрысціянізацыі і першых княстваў беларусаў да XX стагоддзя; гісторыя эстэтычнай думкі эпохі Асветніцтва; персаналіі і заканамернасці Асветніцтва на беларускіх землях; сацыялогія культуры; праблемы культуралогіі; этнічная самасвядомасць; міжнацыянальныя адносіны; беларускі фальклор.

Спецыяліст па гісторыі беларускай філасофскай, эстэтычнай і навуковай думкі XVII—XVIII ст., даследчык нематэрыяльнай культурнай спадчыны Беларусі, які ўвёў айчынную культуру ва ўсходнееўрапейскі і еўразійскі навуковы абарот.

Адзін з заснавальнікаў беларускай культуралогіі, гісторыі і сацыялогіі навукі, дзякуючы якім беларуская гуманітарыстыка пазбавілася правінцыяналізму, што стварыла перадумовы для больш дакладнага самавызначэння і ідэнтыфікацыі беларусаў.

Узнагароды

Дзяржаўная прэмія Беларускай ССР (1984) і інш.

Бібліяграфія

• Философия эпохи Просвещения в Белоруссии : автореферат диссертации … доктора философских наук : 09.00.03 / Дорошевич Энгельс Константинович. — Минск, 1983.
• Г. В. Плеханов о французском материализме XVIII века : автореферат диссертации … кандидата философских наук / Э. К. Дорошевич. — Минск, 1958.

Літаратура

• ДАРАШЭВІЧ Энгельс Канстанцінавіч // Сучасныя беларускія даследчыкі гісторыі Вялікага Княства Літоўскага : біябібліяграфічны даведнік / С. П. Марозаў. — Гродна-Каўнас: ЮрСаПрынт, 2022. — 290 с. — ISBN 978-985-7257-57-7, 978-609-96340-1-2.
• Дарашэвіч Энгельс Канстанцінавіч // Беларуская энцыклапедыя: У 18 т. Т. 6: Дадаізм — Застава / Рэдкал.: Г. П. Пашкоў і інш. — Мн. : БелЭн, 1998. — Т. 6. — С. 52. — 10 000 экз. — ISBN 985-11-0035-8. — ISBN 985-11-0106-0 (т. 6).
• Дарашэвіч Энгельс Канстанцінавіч // Вялікае княства Літоўскае: Энцыклапедыя. У 3 т. / Рэдкал.: Г. П. Пашкоў (гал. рэд.) і інш.; маст. З. Э. Герасімовіч. — Мн.: Беларуская Энцыклапедыя, 2005. — Т. 1: Абаленскі — Кадэнцыя. — С. 579. — 688 с. — ISBN 985-11-0314-4 (т. 1), ISBN 985-11-0315-2.
• Дарашэвіч Энгельс Канстанцінавіч // Энцыклапедыя літаратуры і мастацтва Беларусі: У 5-і т. / Рэдкал.: І. П. Шамякін (гал. рэд.) і інш.. — Мн.: БелСЭ, 1985. — Т. 2. Габой — Карціна. — С. 272. — 702 с. — 9 500 экз.
• Дорошевич Энгельс Константинович // Республика Беларусь : энциклопедия : [в 7 т.]. — Минск, 2006. — Т. 3. — С. 426.
• Дорошевич Энгельс Константинович // Гуманитарии и обществоведы Национальной академии наук Беларуси. — Минск, 1997. — С. 123.