Сенае́ды (Psocoptera) — атрад насякомых з няпоўным ператварэннем.
Вядома каля 5500 сучасных відаў (5574 віду па стане на люты 2008), большасць з якіх жыве ў трапічных і субтрапічных раёнах. У пачатку XX стагоддзя было паказана, што сенаеды знаходзяцца ў парафілетычных адносінах з іншым традыцыйным атрадам насякомых — пухаедамі і вошамі (Phthiraptera).
Звычайная даўжыня цела — 0,6—7 мм (да 10 мм — Thyrsophorus metallicus).
Дзве пары празрыстых крылаў складзеныя стрэшкападобна, у некаторых відаў скарочаныя ці адсутнічаюць. Галава буйная, яе пярэдняя частка прыкметна ўздутая. Ротавы апарат відазмененанага грызучага тыпу, прыстасаваны для саскрабання і расцірання сухой цвёрдай ежы.
Ператварэнне няпоўнае. Пераважна яйцакладучыя, сустракаюцца жывародныя. Некаторыя сенаеды плятуць павуцінневыя гнёзды. Лічынкі і дарослыя казуркі - насельнікі іглічных і лісцяных дрэў, ляснога подсцілу, гнёздаў птушак, сысуноў і казурак, жылых пабудоў і запасаў прадуктаў. Вольнажывучыя могуць служыць прамежкавымі гаспадарамі гельмінтаў авечак. Сінантропныя віды пашкоджваюць харчовыя запасы, калекцыі насякомых, гербарыі, кнігі.
