Аксана Барысаўна Аракчэева

Аксана Барысаўна Аракчэева (нар. 24 сакавіка 1963(1963-03-24), Мінск) — беларуская мастачка, педагог, пісьменніца. Лаўрэат прэміі Васіля Віткі, дыпламантка ЮНЕСКА. Куратар перасоўнай галерэі «GalerieKaras».

Аксана Аракчэева
Аксана Аракчэева, вернісаж выставы ў музее Янкі Купалы, Мінск.
Імя пры нараджэнні	Аксана Барысаўна Аракчэева
Дата нараджэння	24 сакавіка 1963(1963-03-24) (61 год)
Месца нараджэння	Мінск, БССР, СССР
Грамадзянства	Беларусь
Бацька	Барыс Уладзіміравіч Аракчэеў
Род дзейнасці	мастачка, графік, ілюстратарка, настаўніца мастацтва
Вучоба	Мінскае мастацкае вучылішча імя А. К. Глебава (1982) Беларускі дзяржаўны тэатральна-мастацкі інстытут (1988)
Мастацкі кірунак	Станковая і кніжная графіка, жывапіс, анімацыя
Член у	Беларускі саюз мастакоў
Узнагароды	Літаратурная прэмія імя Васіля Віткі
Сайт	arakcha.by/…
Медыяфайлы на Вікісховішчы

Удзельніца шматлікіх мастацкіх выстаў. Куратар і арганізатар больш чым 50 выставак у Беларусі і Чэхіі. Супрацоўніца «Таварыства чэшска-беларускага сяброўства ў Празе».

Аўтар больш за ста жывапісных партрэтаў (Францыска Скарыны, Уладзіміра Караткевіча, Янкі Купалы, Тадэвуша Кандрусевіча і іншых). Працы Аксаны Аракчэевай знаходзяцца ў Нацыянальным мастацкім музеі, галерэях і прыватных калекцыях замежжа. Удзельнічала ў мастацкім афармленні больш за 70 кніжак, пераважна для дзяцей.

Працуе ў станковай і кніжнай графіцы, жывапісу ў жанрах нацюрморта, пейзажа, партрэта. Асноўныя творы: цыкл «Казкі лета», дыптых «Мой Мінск», «Гаспадыня Зіма», «Паненка Восень», трыпціх «Сланечнікі», палотны з цыклу «Нам засталася спадчына», цыкл «Мінскія вокны».

Біяграфія

Аксана Аракчэева нарадзілася ў Мінску ў 1963 годзе ў сям’і вядомага беларускага мастака і выкладчыка жывапісу Барыса Уладзіміравіча Аракчэева і Галіны Ягораўны Перасецкай (працавала загадчыцай касцюмернага цэха ў Оперным тэатры).

З пяці гадоў вучылася маляванню ў студыі заслужанага настаўніка БССР мастака-жывапісца Сяргея Каткова, а таксама ў скульптара Святланы Гарбуновай. Навучалася ў мінскай мастацкай школе № 1. У 1982 годзе скончыла Мінскае мастацкае вучылішча.

З 1982 па 1988 год навучалася ў Беларускім тэатральна-мастацкім інстытуце (аддзяленне станкавай графікі). Працу над дыпломнай работай курыраваў прафесар, заслужаны дзеяч мастацтва Уладзімір Пятровіч Савіч. Ілюстрацыі з дыпломнай працы былі набыты фондам Саюза мастакоў Беларусі, гэта былі малюнкі да казкі Змітрака Бядулі «Сярэбраная табакерка», напісаныя гуашшу.

З 1986 года прымае ўдзел у выставах. Працуе ў станкавой і кніжнай графіцы, жывапісу, анімацыі.

З 1994 года — член Беларускага саюза мастакоў.

З 2010 з’яўляецца куратарам выстаў у пасольстве Чэшскай Рэспублікі ў Рэспубліцы Беларусь, а таксама каардынатарам выставы беларускіх мастакоў «Душа Беларусі» ў Парламенце Чэхіі ў Празе.

Восенню 2016 года арганізавала ў гістарычным цэнтры Прагі, у Страгаўскім манастыры, вялікую выставу «Шляхам Скарыны да Прагi», прысвечаную 500-гадоваму юбілею беларускага кнігадрукавання. На выставе былі прадстаўлены творы чатырох беларускіх дынастый мастакоў і майстроў фота — Аракчэевых, Бархатковых, Бацюковых і Масленіковых.

Выкладала малюнак, жывапіс, кампазіцыю ў мінскай школе № 185 з архітэктурна-мастацкім ухілам.

Першым шлюбам была за Уланоўскім. Другі муж — музыкант-барабаншчык Уладзімір Бельскі. Сын ад другога шлюбу — Ягор, займаецца музыкай. Трэцім шлюбам (з 2017 года) — за Хельмутам Кіппхардтам (ням.: Kipphardt Helmut), родам з Гамбурга (Германія). Пасля трэцяга шлюбу Аксана Аракчэева жыве і працуе часам у родным Мінску, часам у Гамбургу, дзе пражывае яе муж.

Творчасць

Аксана Аракчэева ў сваёй майстэрні, сярод сваіх работ і са сваімі кнігамі.

Пісаць партрэты пачала з дзяцінства. Спачатку малявала бацькоў і сясцёр, потым пачала сяброў з двара. Першапачаткова планавала вывучыцца на мадэльера, але трапіўшы на графічнае аддзяленне, захапілася гэтай справай.

Вучылася ў такіх мастакоў, як Віктар Варламаў, Леанід Каленік, Генадзь Грак, Віктар Мікіта, Людміла Кальмаева, Павел Любамудраў, Уладзімір Савіч. Пасля завяршэння аддзялення графікі Беларускага тэатральна-мастацкага інстытута працавала ў розных выдавецтвах, стварала ілюстрацыі да кніг.

Аформіла каля 70 кніг, сярод якіх: «Сярэбраная табакерка» Змітрака Бядулі, «Басни» (бел.: «Байкі») Івана Крылова, «Резвушка — хохотушка…» (бел.: «Гарэзка-рагатушка») Ізы Заслонавай, «Прыгоды мышкі Пік-Пік» Людмілы Рублеўскай, «Брык і Шуся» Таццяны Сівец, «Звяры ў трамваі» Ніны Галіноўскай, казкі Алеся Карлюкевіча, «Мяне завуць Лахнэска» Алены Масла, «Дзяўчынка з Вішнёвага завулка», «Чароўны кошык» і «Сад з матылькамі» Тамары Бунта, «Закаханы трэцякласнік» Уладзіміра Ліпскага, «Байкі і казкі бабкі Параскі» Таццяны Атрошчанкі і іншыя. Супрацоўнічае з выдавецтвамі «Пачатковая школа», «АЗБУКВАРИК», «Мастацкая літаратура», «Вышэйшая школа», з часопісамі «Вясёлка», «Рюкзачок» і іншыя. Сама мастачка так апісвае сваю працу афармлення кніг:

«Калі працую над кнігай, то амаль жыву, патанаю ў ёй. Спачатку чытаю першы раз, раблю эскізы, потым перачытваю зноў і зноў. Працую ў кожную вольную хвіліну, нават у самалёце».

Таксама мае вопыт у мультыплікацыі — працавала над стварэннем малюнкаў да анімацыйнай стужкі «Прилетай, ветерок!» ((бел.: «Прылятай, ветрык!») 1992 год, «Беларусьфільм» для маскоўскай кінастудыі «12 А»).

У лістападзе 2009 года ў мінскім Літаратурным музеі М. Багдановіча адбылася першая выстава Аксаны Аракчэевай «Зачараваныя…» — галерэя партрэтаў асоб, якія ўнеслі значны ўклад ў духоўнае развіццё Беларусі. Да пачатку 2011 года Аксана Аракчэева намалявала і напісала на палатне больш за сотню партрэтаў. Галерэя выяў, створаных пэндзлем мастака, гэта людзі, якія зрабілі ўклад у духоўнае развіццё грамадства: мастакі, музыкі, урачы, святары, дыпламаты, дырэктары, супрацоўнікі музеяў і галерэй і іншыя. Сваю працу над стварэннем партрэтаў характарызуе наступным чынам:

«Я вучылася на графіка, таму і свае партрэты бачыла як партрэты-вобразы. Прычым некаторыя з іх далёкія, на першы погляд, ад вобразаў рэальных. Але я пішу на палатне характар, натуру, тое, што чалавек часам хавае ад навакольных. У выніку выяўляецца тое, што нават у жыцці для многіх застаецца „за кадрам“…».

Аксана Аракчэева падчас творчай сустрэчы з аформленымі ёй кнігамі і з уласнымі творамі.

Вясной 2010 года ў памяшканні Пасольства Чэшскай Рэспублікі ў Беларусі прайшла выстава «Паміж Мінскам і Прагай…», на якой былі прадстаўлены каля 20 графічных і жывапісных партрэтаў супрацоўнікаў пасольства і іншых дыпламатаў, а таксама беларускіх дзеячаў: Наталлі Шаранговіч, Дзяніса Барсукова, Жанны Лашкевіч, віцэ-міс «Мінск-2009» Дар’і Саладухі і іншых. Падчас адкрыцця выставы Пасол Чэхіі ў Беларусі Іржы Карас адзначыў, што для яго працы беларускай мастачкі Аксаны Аракчэевай сталі адкрыццём і ён выказаў надзею, што супрацоўніцтва ў сферы мастацтва паміж Беларуссю і Чэхіяй будзе паглыбляцца.

З 2010 года сумесна з чэшскім пасольствам у Рэспубліцы Беларусь Аксана Аракчэева правяла 46 выстаў у сталічных музеях, бібліятэках, у ДУ «Карцінная галерэя ім. Г. Х. Вашчанкі» (Гомель), Полацкай мастацкай галерэі, Парламенце Чэхіі. Вы­сту­пала ар­га­ні­за­та­рам вы­ста­ў бе­ла­рус­кіх мас­та­коў у Чэ­хіі, у га­ле­рэі ста­ра­даў­ня­га зам­ка ў го­ра­дзе Тршэбіч. Таксама ў горадзе Тршэбіч арганізуе выставы «Katolické gymnázium v Třebíči» (Galerie Chodba).

У лютым 2011 года ў мінскім Палацы мастацтва адбылася персанальная выстава Аксаны Аракчэевай «Зазірнуць у люстэрка душы». У красавіку 2013 года ў Палацы мастацтваў адкрыўся вернісаж Аксаны Аракчэевай «Бацькаў дар» — рэтраспектыўны паказ твораў жывапісу і графікі мастачкі.

У жніўні 2012 года ў Славакіі прайшла персанальная выстава мастачкі «Прывітанне З Мінска», у горадзе Спішска-Нова-Вес у мастацкай галерэі Спіша (славацк.: «Galéria umelcov Spiša»). У экспазіцыю ўвайшлі 20 карцін і больш за 70 ілюстрацый да беларускіх дзіцячых кніг, зробленыя мастачкай з 1989 па 2012 год. Таксама была прадстаўлена калекцыя карцін «Мінскія вокны». У лісце да дырэктара галерэі Люцыі Беніцкай міністр культуры Беларусі Павел Латушка выказаў падзяку за прадстаўленую магчымасць прэзентацыі беларускага мастацтва ў Славакіі. Акрамя гэтага, Аксана Аракчэева правяла ў Славакіі ў гэты ж час Міжнародны пленэр па жывапісе для дзяцей «Art in Paradise».

У 2013 годзе мастачка зрабіла серыю партрэтаў вядучых салістаў беларускага балета. Экспазіцыя атрымала назву «Авансцэна». Карціны экспанаваліся ў Нацыянальным акадэмічным Вялікім тэатры оперы і балета. Гэта партрэты народных артыстаў Беларусі Вольгі Гайко, Людмілы Кудраўцавай і Ігара Артамонава, заслужаных артыстаў Рэспублікі Беларусь Ірыны Яромкінай і Антона Краўчанка, уладальнікаў медаля Францыска Скарыны Дзяніса Клімука і Марыны Вежнавец. Партрэты рэгулярна выстаўляюць на ўсеагульны агляд у фае Вялікага тэатра. За ўшанаванне тэатральных дзеячаў сродкамі выяўленчага мастацтва ў 2015 годзе Аксана Аракчэева атрымала дыплом ЮНЕСКА. У сакавіку 2014 года экспазіцыя «Авансцэна» з партрэтамі вядучых артыстаў Вялікага тэатра Беларусі была прадстаўлена на вернісажы Аксаны Аракчэевай у Дзяржаўным музеі тэатральнай і музыкальнай культуры.

У лістападзе 2013 года адбылося адкрыццё выставы мастачкі Аксаны Аракчэевай «Бацькоўскі дар» у Хрустальнай зале РЦНК у Празе (Чэхія). Мерапрыемства было падрыхтавана і праведзена прадстаўніцтвам Рассупрацоўніцтва ў Чэхіі сумесна з Пасольствам Рэспублікі Беларусь у Чэхіі. На адкрыцці выставы прысутнічалі ў тым ліку супрацоўнікі МЗС Чэхіі, былы пасол Чэшскай Рэспублікі ў Рэспубліцы Беларусь Йіржы Карас, а таксама чэшскі графік і ілюстратар Адольф Борн.

У 2015 годзе стварыла галерэю вобразаў «Купалінкі» — партрэты кіраўніц Дзяржаўнага літаратурнага музея Янкі Купалы, сярод якіх: Уладзіслава Луцэвіч (жонка Янкі Купалы), Ядзвіга Раманоўская, Жанна Дапкюнас, Алена Ляшковіч; а таксама партрэты супрацоўніц музея. Серыя знаходзіцца ў фондах музея. Падчас адкрыцця выставы «Купалінкі» мастачцы Аксане Аракчэевай быў уручаны дыплом сябра музея «За папулярызацыю спадчыны Першага народнага паэта Беларусі Янкі Купалы і падтрымку дзейнасці музея».

Аксана Аракчэева ў сваёй майстэрні, за працай над афармленнем кнігі.

У 2017 годзе адкрыццём выставы ілюстрацый беларускай мастачкі Аксаны Аракчэевай да дзіцячых кніг «Мой казачны свет» у галерэі «Карас» у замку Тршэбіча распачаўся «Беларускі тыдзень» у Празе, прысвечаны святкаванню 500-годдзя беларускага кнігадрукавання.

У лістападзе 2019 года ў Прэзідэнцкай бібліятэцы Рэспублікі Беларусь адбылося адкрыццё выставы, прысвечанай памяці беларускага жывапісца Барыса Аракчэева, падчас якой адбылася прэзентацыя біяграфічнай кнігі «Бэз малюецца на шчасце» (выд. «Мастацкая літаратура»), якую склалі дачка мастака, Аксана Аракчэева і пісьменніца Алена Масла.

Аксана Аракчэева таксама з’яўляецца пісьменніцай, яна напісала і адначасова з тым аформіла кнігі пра свайго любімага сабачку: «Фанечка» (2020 год) і «Фанечка: мандарынавая гісторыя» (2021 год).

У 2023 годзе да 60-гадовага юбілею мастачкі выйшла кніга-каталог Аксаны Аракчэевай «Бацькаў дар» — альбом жывапісу і графікі, у які ўвайшлі рэпрадукцыі карцін са славутай серыі Аракчэевай «Мінскія вокны», шэраг жывапісных палотнаў, партрэты славутых гістарычных асоб (Францыск Скарына, Кастусь Каліноўскі) і сучаснікаў: артыстаў Нацыянальнага акадэмічнага Вялікага тэатра оперы і балета РБ, пісьменнікаў, артыстаў, святароў, дыпламатаў, выдаўцоў, супрацоўніц Дзяржаўнага літаратурнага музея Янкі Купалы і іншае. Прэзентацыя кнігі адбылася ў мінскім музеі Якуба Коласа. У лістападзе 2023 года ў Мінску адбылася імпрэза «Ты мне вясною прыснілася…», творчы вечар, прысвечаны 60-годдзю беларускай мастачкі, які фактычна стаў справаздачай творчага шляху Аксаны Аракчэевай, гісторыяй яе жыцця ў мастацкай творчасці — яе выставы ў Беларусі, у Чэхіі, у Славакіі.

Працы мастачкі Аксаны Аракчэевай знаходзяцца ў Нацыянальным мастацкім музеі, фондзе Саюза мастакоў Беларусі, музеі сучаснага выяўленчага мастацтва, Дзяржаўным літаратурным музеі Янкі Купалы, Літаратурным музеі М. Багдановіча, мастацкіх галерэях гарадоў Полацк, Гомель, Светлагорск, Крупкі, Баранавічы, а таксама ў галерэях і прыватных калекцыях замежных краін (Расія, Украіна, ЗША, Канада, Венесуэла, Ізраіль, Італія, Нідэрланды, Германія, Румынія, Сербія, Чэхія, Славакія, Польшча і інш.). Апроч таго яна займаецца арганізацыяй выстаў карцін свайго бацькі, мастака Барыса Аракчэева, а таксама займалася арганізацыямі выстаў такіх мастакоў, як Леанід Дударэнка, Фёдар Бараноўскі і іншыя.

Крытыка і ацэнка творчасці

Па словах дырэктара мастацкай галерэі «Універсітэт культуры» і дырэктара Нацыянальнага гістарычнага музея Беларусі Паўла Сапоцькі, творчая дынастыя Аракчэевых — гэта ўнікальная з’ява беларускай культуры. Як лічыць Павел Сапоцька, Аксана Аракчэева з'яўляецца не проста паслядоўніца свайго бацькі, але і папулярызатарам беларускага мастацтва. Дзякуючы яе намаганням праведзены дзясяткі выстаў беларускіх мастакоў не толькі ў Беларусі, але і ў Еўропе.

На думку рэдактара аддзела мастацтваў газеты «Літаратура i мастацтва» арт-крытыка Вікторыі Аскера, партрэты, напісаныя Аксанай Аракчэевай, нясуць пазітыўную энергетыку, у іх няма сумных вачэй альбо халодных твараў. Па яе словах, для Аракчэевай больш важна не раскрыць чалавека вонкава, а паказаць яго знутры, каб была заўважная яго глыбіня. Як мяркуе крытык, стаць знакамітай мастачкай і кніжнай ілюстратаркай Аксане Аракчэевай у шмат чым дапамаглі творчая атмасфера ў сям’і і асабістае імкненне. У сваю чаргу сама мастачка заўважае, што яна здолела адтачыць індывідуальны падыход да творчага працэсу і не стала копіяй свайго бацькі, мастака Барыса Аракчэева, ёй атрымалася пайсці сваім шляхам, і з бацькам яны абсалютна розныя па стылі і тэхніцы жывапісу творцы.

Аўтар сумеснага праекта штотыднёвіка «ЛіМ» і Нацыянальнай кніжнай палаты Беларусі «Кніжны свет» Сяргей Шычко лічыць, што сярод работ сучасных беларускіх кніжных графікаў, якія асабліва плённа працуюць над афармленнем выданняў для дзяцей, здабыткі мастачкі Аксаны Аракчэевай асабліва ўражваюць. Кнігі, прачытаныя яе мастакоўскім мысленнем, выходзяць у выдавецтвах «Беларуская Энцыклапедыя імя Петруся Броўкі», «Мастацкая літаратура», Выдавецкі дом «Звязда». Як адзначае сама мастачка, непасрэдны ўплыў на яе творчасць зрабіў чэшскі ілюстратар графік Адольф Борн.

Як лічыць беларуская пісьменніца Алена Масла, «у Аксаны ўдала атрымлівацца злавіць імгненне, трымаць яго на кончыку пэндзля і пераносіць гэтае імгненне на свае карціны». Ацэньваючы Аксану Аракчэеву, як пісьменніцу, Алена Масла адзначае, што: «Яшчэ адна грань яе таленту — адчуванне слова».

Узнагароды

На ўручэнні дыплома ЮНЕСКА.

• 2015 год — дыплом камісіі Рэспублікі Беларусь па справах ЮНЕСКА «За дзейнасць па ўшанаванні тэатральных дзеячаў сродкамі выяўленчага мастацтва».
• 2015 год — прэмія імя Васіля Віткі за афармленне твораў, змешчаных у часопісе «Вясёлка» на працягу 2015 года.
• 2016 год — медаль Васіля Віткі за мастацкую працу ад часопіса «Вясёлка».
• 2017 год — падзяка міністра культуры за высокі прафесіяналізм і асабісты ўклад у развіццё і папулярызацыю беларускага выяўленчага мастацтва.
• 2017 год — грамата міністэрства культуры Беларусі «за шматгадовую добрасумленную працу, выдатныя творчыя дасягненні і высокае прафесійнае майстэрства».
• 2017 год — дыплом за мастацкае афармленне ў намінацыі «Мастак кнігі» на Міжнародны кніжным фестывалі «Зялёная хваля» (Адэса, Украіна), за ілюстраванне казкі Алены Масла «Мяне завуць Лахнэска». Мерапрыемства праходзіла пад патранатам Украінскай асацыяцыі выдаўцоў і кнігараспаўсюджвальнікаў Адэскай гарадской рады.

Бібліяграфія

• Аксана Аракчэева. Барыс Аракчэеў. Бэз малюецца на шчасце / укладанне А. Аракчэева, А. Масла. — Мн.: Мастацкая літаратура, 2019. — (ЖЗЛБ).
• Аксана Аракчэева. Фанечка: праўдзівая гісторыя ад Olivia Klodt. — Мн.: Чатыры чвэрці, 2020. — 24 с.
• Аксана Аракчэева. Фанечка: мандарынавая гісторыя. — Мн.: Адукацыя і выхаванне, 2021.
• Аксана Аракчэева. Бацькаў дар [Выяўленчы матэрыял]: жывапіс / графіка. — Мн.: Альтиора Форте, 2023. — 137 с.

Ілюстрацыі да кніг

Спіс дзіцячых кніжак, праілюстраваных Аксанай Аракчэеевай

1. Змітрок Бядуля «Сярэбраная табакерка», 1988 (дыпломная праца)
2. Иван Крылов «Басни» (бел.: «Байкі»), 1989, выд. «Юнацтва»
3. «Анталогія беларускай літаратуры» (сумесная праца), 1990, выд. «Юнацтва»
4. «Резвушка-Хохотушка и сестра её Плакса-Квакса» (бел.: «Гарэзка-Рагатушка і сястра яе Плакса-Квакса»), 1991
5. «Рукавичка» (бел.: «Рукавічка»), 1991
6. «Казкі дзеда Яраслава», выд. «Беларусь»
7. Иза Заслонова «Однажды» (бел.: «Аднойчы»)
8. Иза Заслонова «Ловись рыбка большая и маленькая» (бел.: «Лавіся рыбка вялікая і маленькая»)
9. Иза Заслонова «Каждый охотник желает знать…» (бел.: «Кожны паляўнічы жадае ведаць…»)
10. Иза Заслонова «Иван — крестьянский сын, Пашка и Чудо-юдо» (бел.: «Іван-сялянскі сын, Пашка і Цуда-юда»)
11. Иза Заслонова «Пашка и королева Жемчужница» (бел.: «Пашка і каралева Жамчужніца»)
12. Падручнікі (сумесная праца) англ. мова, выд. «Вышэйшая школа»
13. Падручнікі (сумесная праца) англ. мова, выд. «Вышэйшая школа»
14. Падручнікі (сумесная праца) англ. мова, выд. «Вышэйшая школа»
15. Падручнікі ням. мова, выд. «Вышэйшая школа»
16. Падручнікі фр. мова, выд. «Вышэйшая школа»
17. «Слон купил велосипед» (бел.: «Слон набыў ровар»), 2011, выд. «АЗБУКВАРИК»
18. «Я расту», 2012, выд. «АЗБУКВАРИК»
19. «Какие бывают подарки» (бел.: «Якія бываюць падарункі»), 2012, выд. «АЗБУКВАРИК»
20. Наталья Игнатенко «История про Варю и Дубовёнка» (бел.: «Гісторыя пра Вару і Дубавёнка»), 2011, «Пачатковая школа»
21. Яронимас Лауцюс «Твой путь удачи» (бел.: «Твой шлях поспеху»), 2010, «Пачатковая школа»
22. Наталья Игнатенко «Сказка про Тимку и Кузьку» (бел.: «Казка пра Цімку і Кузьку»), 2014, «Пачатковая школа»
23. Алла Шарко «Гномик Спасайка и его друзья» (бел.: «Гномік Ратуйка і яго сябры»), 2015, «Пачатковая школа»
24. В. Кудлачёв, И. Фоменкова «Советы феи вежливости» (бел.: «Парады феі ветлівасці»), 2015, «Пачатковая школа»
25. Андрей Сметанин «Обычный детский сад» (бел.: «Звычайны дзіцячы сад»), «Пачатковая школа»
26. Марына Шупо «Птушыная азбука», 2018, «Пачатковая школа»
27. Алена Масла «Балотныя прыгоды», 2019, «Пачатковая школа»
28. Алесь Карлюкевіч «Як Шубуршун па Свіслачы падарожнічаў», «Беларуская Энцыклапедыя імя П.Броўкі»
29. Алесь Карлюкевіч «Як зайка Бяляк мядзведзя Таптыгіна выратаваў», «Беларуская Энцыклапедыя імя П.Броўкі»
30. Алесь Карлюкевіч «Прыгоды Максімкі на Бацькаўшчыне і ў розных краінах», «Беларуская Энцыклапедыя імя П.Броўкі»
31. Уладзімір Ліпскі, Раіса Баравікова «Пра Бусю, які жыве на Беларусі», 2016, «Харвест»
32. Таццяна Сівец «Брык і Шуся шукаюць лета», 2012, «Звязда»
33. Таццяна Сівец «Куды прапала малпа Маня?», 2013, «Звязда»
34. Янина Жабко «Самая родная», 2013, «Звязда»
35. Геннадий Авласенко «Как зверята правила безопасности на воде изучали» (бел.: «Як звераняты правілы бяспекі на вадзе вывучалі»), 2014, «Звязда»
36. Геннадий Авласенко «Как зверята Никитке правила безопасности в лесу объясняли» (бел.: «Як звераняты Мікітцы правілы бяспекі ў лесе тлумачылі»), 2014, «Звязда»
37. Виктор Кудлачёв «Прилетают ночью сны» (бел.: «Прылятаюць ноччу сны»), 2014, «Звязда»
38. Дмитрий Юртаев «Ни секунды тишины» (бел.: «Ні секунды цішыні»), 2018 (перавыданне 2019), «Звязда»
39. Таццяна Атрошанка «Байкі ды казкі бабкі Параскі», 2020, «Звязда»
40. Людміла Рублеўская «Прыгоды мышкі Пік-Пік», «Мастацкая літаратура» (выд. 2008, 2011, 2021)
41. Дзмітрый Юртаеў «Казкі ката Грамапападомуса», 2022, «Звязда»
42. Генадзь Аўласенка «Таямніцы назваў», 2022, «Звязда»
43. Галіна Пшонік «Штукарствы месяцавага зайчыка», 2022, «Звязда»
44. Віктар Шніп «Кастусь і Міёна», 2022, «Звязда»
45. Ягор Конеў «Дамавічкі Шушык і Жуля», 2022, «Звязда»
46. Генадзь Аўласенка «Як сем братоў чорта перахітрылі», 2023, «Звязда»
47. Мікола Чарняўскі «Дзе ўзяць красоўкі для слана», 2023, «Звязда»
48. Мікола Чарняўскі «Ліса-калядоўчыца», 2023, «Звязда»
49. Галіна Пшонік «Ты — мне, я — табе», 2023, «Звязда»
50. Ніна Галіноўская «Звяры ў трамваі», 2013, «Мастацкая літаратура»
51. Алесь Карлюкевіч «Як васількі на сваю крыўду забыліся», 2015, «Мастацкая літаратура»
52. Тамара Бунта «Дзяўчынка з Вішнёвага завулку», 2016, «Мастацкая літаратура»
53. Тамара Бунта «Чароўны кошык», 2018, «Мастацкая літаратура»
54. Васіль Дранько-Майсюк «Таямніцы нашага садка», 2019, «Мастацкая літаратура»
55. Уладзімір Ліпскі «Закаханы трэцякласнік», 2019, «Мастацкая літаратура»
56. Тамара Бунта «Сад з матылькамі», 2020, «Мастацкая літаратура»
57. Лешак Шарэпка «Прыгоды Коціка-Грукоціка», 2014, «Услуга»
58. Leszek Szerepka «Przygody Kotka Łomotka» (бел.: «Прыгоды Кацяняці Ламоткі»), 2014, «Услуга»
59. Иза Заслонова «Все в четвёртое измерение» (бел.: «Усе ў чацвёртае вымярэнне»), 2016, «Услуга»
60. Иза Заслонова «Пузырище, пузыри и пузырята»(бел.: «Бурбалішча, бурбалкі і бурбаляты»), 2016, «Услуга»
61. Иза Заслонова «Резвушка-Хохотушка и сестра её Плакса-Кваска» (бел.: «Гарэзка-Рагатушка і сястра яе Плакса-Квакса»), 2016, «Услуга»
62. Марина Шуппо «Летом…» (бел.: «Летам…»), 2017, «Услуга»
63. Иза Заслонова «Ловя, Мягкий знак или перевёртки» (бел.: «Ловя, мяккі знак або перавёрткі»), 2017, «Чатыры чвэрці»
64. Иза Заслонова «Рассказки» (бел.: «Апавядання»), 2017, «Чатыры чвэрці»
65. Аксана Аракчэева «Фанечка. Праўдзівая гісторыя Olivia Klodt», 2020, «Чатыры чвэрці»
66. Алена Масла «Мяне завуць Лахнэска», 2016, «Адукацыя і выхаванне»
67. Аксана Аракчэева «Фанечка. Мандарынавая гісторыя», 2021, «Адукацыя і выхаванне»
68. Тамара Бунта «Далонькі з пушынкамі», 2024, «Адукацыя і выхаванне»

Літаратура

На англійскай мове

• Yekaterina Medvedskaya Penetrating glance at children’s fairy-tales // The Minsk Times : газета. — December 15, 2011. — № 47. — С. 10. Архівавана з першакрыніцы 30 кастрычніка 2023.

На беларускай мове

• Уланоўская А. Вернісаж «Маладосці» // Маладосць : часопіс. — СПБ, 1991. — № 12. — С. 64―69.
• Крэпак Б.А. Аракчэева Аксана Барысаўна // Беларускі саюз мастакоў, 1938—1998 (Энцыклапедычны даведнік) / Аўт.-склад.: Б.А.Крэпак і інш.. — Мн.: Кавалер Паблішерс, 1998. — С. 27. — 663 с.
• Каляда А.А. Уланоўская Аксана Барысаўна // Выпускнікі Беларускай дзяржаўнай акадэміі мастацтваў (1949―2004 гады): Навуковае выданне / Навуковы рэдактар М.Р. Баразна. — Мн.: Беларуская дзяржаўная акадэмія мастацтваў, 2005. — С. 369. — 591 с.
• Фатыхава Г.А. Кветкі, партрэты, гарадскі пейзаж... // Беларусь. Belarus : часопіс. — Мн.: Мінінфарм Беларусі, СБ. Беларусь сегодня, 2007. — № 11. — С. 54―55.
• Фатыхава Г.А. Традыцыі і сучаснасць: жывапіс / аўтар тэк. і ўклад. Г. А. Фатыхава. — Мн.: Друк-С, 2009. — С. 10. — 88 с. — 500 экз. — ISBN 978-985-6867-07-4.
• Данілевіч Д.І. Партрэты замест “...Windows” // Культура : газета. — 16 кастрычніка 2010. — В. 962. — № 42. Архівавана з першакрыніцы 28 кастрычніка 2023.
• Паўлючэнка В. У сонечным крузе Аксаны Аракчэевай // Літаратура і мастацтва : газета. — Мн.: РВУ «Звязда», 2012. — № 12. — С. 16. Архівавана з першакрыніцы 24 сакавіка 2016.
• Берлеж М. Падарожжы Аксаны Аракчэевай // Літаратура і мастацтва : газета. — Мн.: РВУ «Звязда», 12 верасня 2014. — В. 4785. — № 36. — С. 3. Архівавана з першакрыніцы 24 сакавіка 2016.
• Шычко С. У складанага ёсць сінонім – вясёлае // Літаратура і мастацтва : газета. — Мн.: РВУ «Звязда», 2014-09-26. — № 38. — С. 9. Архівавана з першакрыніцы 3 кастрычніка 2023.
• Сурскі З. Аксана Аракчэева // Тутэйшы дызайн. Асобы. Рэчы: даведнік / Складальнік і аўтар уступнага артыкулу Зміцер Сурскі. — Пад агульнай рэдакцыяй Л. Кіселёвай. — Мн.: Беларускі саюз дызайнераў, 2016. — С. 27. — 548 с. — 2 000 экз. — ISBN 978-985-6534-26-6.
• Аскера В. Твар як неразгаданая таямніца // Звязда : газета. — Мн.: РВУ «Звязда», 17 верасня 2016. — В. 28290. — № 180. — С. 8.
• Сяліцкая-Ткачова К.С. Аракчэева Аксана Барысаўна // Янка Купала. Энцыклапедыя. — Мн.: Бел. Энцыклапедыя імя П. Броўкі, 2017. — Т. 1. А—З. — С. 48—49. — 400 с. — 1 500 экз. — ISBN 978-985-11-1042-7.
• Ёсць куток на зямлі… Мядзельшчына ў замалёўках Аксаны Аракчэевай // Белорусская военная газета «Во славу Родины!» : газета. — Мн.: Мінабароны РБ, 18 кастрычніка 2018. — В. 195. — С. 7.
• Масла А.С. Аракчэева-Кіпхарт Аксана Барысаўна // Уладзімір Караткевіч / рэдкалегія: В. У. Ваніна (галоўны рэдактар) і інш.. — Мн.: Бел. Энцыклапедыя імя П. Броўкі, 2020. — С. 18. — 432 с. — 1 000 экз. — ISBN 978-985-11-1257-5.
• Грушэцкі А.Л. Ты мне вясною прыснілася… // Наша слова : газета. — Ліда: ТБМ, 15 лістапада 2023. — В. 98. — № 46. — С. 3. Архівавана з першакрыніцы 15 лістапада 2023.

На рускай мове

• Ануфриев Г. Городские цветы Аксаны Аракчеевой // 7 дней : газета. — Мн.: БелТА, 2003-02-15. — № 7.
• А из нашего окна // Where Minsk (городской журнал) : часопіс. — Май, 2007. — С. 33—35.
• Заславская М. «Соборная площадь» династии Аракчеевых // Минский курьер : газета. — 3 сентября 2008. — В. 1551. — № 181. — С. 12.
• Изобрела перпетуум-мобиле // Минский курьер : газета. — 2009-12-31. — В. 1839. — № 234.
• Оксана Борисовна Аракчеева // Мастацкая адукацыя і культура : часопіс. — Адукацыя і выхаванне, 2010. — № 3. — С. 2.
• Заславская М. Мечта многих девушек стать моделью // Крупскі веснік : газета. — 17 красавіка 2010. — В. 1551. — № 181. — С. 12.
• Аскеро В. Только смелым покоряется Олимп // Минский курьер : газета. — 5 октября 2010. — В. 2019. — № 180.
• Шубич А. Под знаком овна // Наш край : газета. — 31 марта 2011. — С. 5. Архівавана з першакрыніцы 30 кастрычніка 2023.
• Якубова А. Наше вам с кисточкой // Минский курьер : газета. — 4 апреля 2012. — В. 2217. — № 39. — С. 13.
• Алдухова Ю. Главное ― не лениться жить! // Женский журнал : часопіс. — 2012. — № 7. — С. 12―15.
• Корневская А. На холсте пишу то, что иногда прячут от окружающих // Сельчанка (приложение к газете «Белорусская нива» : газета. — 1 декабря 2012. — В. 2217. — № 10. — С. 2—3. Архівавана з першакрыніцы 30 кастрычніка 2023.
• Николаевская О. Ах, вернисаж // Партер : часопіс. — Мн.: Нацыянальны акадэмічны Вялікі тэатр оперы і балета, 2014. — В. 38. — № 3. — С. 17.
• Аскеро В. Оксана Аракчеева: «Гордость нашей семьи — быть разными» // Город женщин : журнал. — 2017. — В. 27. — № 5. — С. 16—19.

На чэшскай мове

• Antonín Zvěřina Díla představuje běloruská umělkyně(чэшск.) // Třebíčské noviny : газета. — Třebíč: Parola s.r.o., 2022-10. — № 28. — С. 20.
• Arnošt Pacol Oksana Arakčejeva už namalovala pohled na Hamburk, Karlovy Vary i Příštpo(чэшск.) // Horácké noviny : газета. — Třebíč: Yashica s.r.o., 2023-09-29. — № 39. — С. 6.
• Antonín Zvěřina V gymnáziu vystavuje běloruská umělkyně(чэшск.) // Třebíčské noviny : газета. — Třebíč: Parola s.r.o., 2023-10. — № 29. — С. 3.

Спасылкі

• Аксана Аракчэева на сайце дынастыі мастакоў Аракчэевых
• Аксана Аракчэева на сайце мастацкая галерэя «БелАрт»
• Аксана Аракчэева Архівавана 18 лістапада 2016. на сайце «Беларускага Саюза дызайнераў»