Кірыл Іванавіч Прашчаеў

Кірыл Іванавіч Прашчаеў (нар. 31 кастрычніка 1973, г. Адэса) — доктар медыцынскіх навук, прафесар. Заснавальнік і дырэктар навукова-даследчага медыцынскага цэнтра «Геранталогія» (Масква, Расійская Федэрацыя). Першы грамадзянін Рэспублікі Беларусь у яе гісторыі, які абараніў доктарскую дысертацыю па спецыяльнасці «геранталогія і герыятрыя».

Кірыл Іванавіч Прашчаеў
Дата нараджэння	31 кастрычніка 1973(1973-10-31) (50 гадоў)
Месца нараджэння	Адэса, Адэская вобласць, УССР, СССР
Грамадзянства	СССР  Беларусь
Род дзейнасці	навуковец
Месца працы	Віцебскі дзяржаўны медыцынскі ўніверсітэт Полацкі дзяржаўны ўніверсітэт імя Ефрасінні Полацкай Белгародскі дзяржаўны нацыянальны даследчы ўніверсітэт
Навуковая ступень	доктар медыцынскіх навук
Навуковае званне	прафесар
Альма-матар	Віцебскі медыцынскі інстытут (1996)

Біяграфія

Скончыў Віцебскі медыцынскі інстытут (1996), дактарантуру пры Санкт-Пецярбургскім інстытуце біярэгуляцыі і геранталогіі (2005). У 1996—1997 гадах працаваў у Наваполацкай цэнтральнай гарадской бальніцы на пасадзе ўрача-інтэрна, у 1997—2000 гадах у Віцебскім медыцынскім інстытуце на пасадзе асістэнта кафедры сацыяльнай гігіены і арганізацыі аховы здароўя і адначасова ў Віцебскім абласным тэрытарыяльным медыцынскім аб’яднанні «Кардыялогія» на пасадзе ўрача прыёмнага аддзялення. У 2000—2005 гадах — намеснік галоўнага ўрача па лячэбнай рабоце Полацкай гарадской бальніцы, з 2005 па 2007 год — галоўны ўрач паліклінікі ААТ «Палімір» у Наваполацку і адначасова дацэнт Полацкага дзяржаўнага ўніверсітэта.

На працягу 5 год (з 2007 па 2012) на пасадзе прафесара кафедры ўнутраных хвароб № 2 у Белгародскім дзяржаўным універсітэце, дзе стварыў адну з найбуйнейшых на постсавецкай прасторы навуковую школу ў галіне герыятрыі, асноўным накірункам якой з’яўляецца феномен палімарбінасці пры паталогіі сталага ўзросту. Адначасова — прафесар кафедры тэрапіі і паталогіі пажылога ўзросту Інстытута павышэння кваліфікацыі Федэральнага медыка-біялагічнага агенцтва Расіі ў Маскве

Навуковая дзейнасць

Галоўны рэдактар навукова-практычнага часопіса «Геранталогія», член рэдакцыйнай калегіі часопіса «Поспехі геранталогіі». Распрацоўшчык тэорыі этнамедыцыны (на беларускім фальклорным матэрыяле), мае навуковыя працы па гісторыі медыцыны Беларусі.

З’яўляецца аўтарам вялікай колькасці навуковых і вучэбных прац у галіне геранталогіі, герыятрыі і антыўзроставай медыцыны. Найбольш вядомыя — «140 тэзісаў аб артэрыяльнай гіпертэнзіі» (Мінск, 2004), «Выбраныя лекцыі па герыятрыі» (Санкт-Пецярбург, 2007), «Прафілактычная нейраімунаэндакрыналогія» (Санкт-Пецярбург, 2008), «Тэрапеўтычнае асяроддзе ў дамах-інтэрнатах для пажылых людзей і інвалідаў» (Масква, 2013), «Прафілактыка эйджызму ў стацыянарных сацыяльных установах» (Масква, 2016).

Пад кіраўніцтвам К. І. Прашчаева абаронена 2 доктарскія і 12 кандыдацкіх дысертацый.

Узнагароды

Лаўрэат Ганаровага дыплома выставы-кірмашу Саюзнай Дзяржавы Расіі і Беларусі за дасягнутыя вынікі па распрацоўцы новых медыцынскіх праграм з выкарыстаннем інавацыйных медыцынскіх тэхналогій (Масква, 2011). Узнагароджаны ордэнам «За дасягненні ў навуцы» Міжнароднай акадэміі навук экалогіі і бяспекі жыццядзейнасці (Санкт-Пецярбург, 2011).

Спасылкі

• Кирилл Иванович Прощаев // Автономная некоммерческая организация "Научно-исследовательский медицинский центр «ГЕРОНТОЛОГИЯ» (руск.)
• Навум Гальпяровіч З-пад крыла полацкай Сафіі // Літаратура і мастацтва, № 8 (5014) 22 лютага 2019 г.
• Святлана Адамовіч Геранталогія па-беларуску. Кірыл Прашчаеў // Інфармацыйны партал медработнікаў Беларусі «Медыцынскі веснік»
• Прощаев Кирилл Иванович (руск.) // Нацыянальны навукова-тэхнічны партал Рэспублікі Беларусь