Ітэса: Розніца паміж версіямі

У Кеніі у нашы дні пераважаюць малыя нуклеарныя [[сям'я|сем'і]], ва Угандзе, дзе захоўваецца важнасць сямейных сельскіх гаспадарак — пашыраныя. Апошнія уключаюць у сябе сям'ю бацькі і некалькі сямей яго сыноў. Кожная сям'я займае асобную хаціну. Фармальна на чале пашыранай сям'і стаіць бацька, а маці кіруе жаночай часткай. У рэчаіснасці, рашэнні па большасці пытанняў прымаюцца калектыўна. Калі згоды ў сям'і няма, гэта можа выклікаць працяглыя спрэчкі, што доўжацца гадамі і ў выніку могуць прывесці да падзелу супольнай сямейнай гаспадаркі. Найчасцей спрэчкі ўзнікаюць паміж жанчынамі, асабліва дачкамі і нявесткамі. [[Шлюб]]у папярэднічаюць перагаворы паміж сваякамі жаніха і нявесты. Род жаніха выплочвае сям'і нявесты выкуп. Раней за нявесту разлічваліся каровамі, у наш час — часцей [[грошы|грашыма]].

У ітэса захаваліся родавыя арганізацыі ''атэкер''. Лічыцца, што першапачаткова было 9 родаў, пазней ад іх адшчапіліся іншыя. Буйныя роды падзяляюцца на драбнейшыя. Сваяцтва ў родзе перадавалася толькі па мужчынскай лініі, [[шлюб]]ы знутры роду забараняліся. На чале рода стаяў правадыр ''акалон'' і рада старэйшын ''айрабіс аўранет''. Роды рэгулявалі спрэчкі, дамаўляліся з іншымі родамі. Аднак у наш час ''атэкер'' — гэта болей [[культура|культурнае]], чым [[палітыка|палітычнае]] аб'яднанне. Паступова зыходзіць у нябыт такі традыцыйны [[сацыяльны інстытут]] як ''атурыё'' — узроставыя аб'яднанні. Яны ахоплівалі мужчын, якія супольна праходзілі рытуал [[ініцыяцыя|ініцыяцыі]]. Да пэўнага ўзросту юнакі складалі грамадскі пласт без асобых правоў, але з абавязкам несці ахову і ваяваць. Прадстаўнікі ''атурыё'' розных родаў маглі гуртавацца ў часовую [[армія|армію]] ''аджор'' на чале ваеннага правадыра ''арувок''.