Паводкі ў Пакістане (2022)

Паводкі ў Пакістане — прыродная катастрофа, якая здарылася ў жніўні 2022 года.

Перадумовы

Мусонныя дажджы, якія суправаджаюцца паводкамі, — звыклая для жыхароў Паўднёвай Азіі прыродная з’ява. Практычна штогод яны прыводзяць да разбурэнняў і гібелі людзей. Аднак у 2022 годзе бедства набыло катастрафічныя маштабы, закрануўшы ўсе рэгіёны Пакістана. Мусонны сезон тут звычайна працягваецца з другой паловы чэрвеня па верасень. Асаблівасць 2022 года — звышдажджлівы жнівень. У гэтым месяцы ў Пакістане выпала больш за 166 мм ападкаў пры сярэднім значэнні для гэтага перыяду 48 мм.

Вынікі

Наймацней пацярпелі паўднёвыя правінцыі Белуджыстан і Сінд, на тэрыторыі якіх зафіксавана больш за палову ўсіх пацверджаных ахвяраў стыхіі. У Белуджыстане станам на 26 жніўня загінулі ня менш як 260 чалавек, рэгіён апынуўся фактычна ў інфармацыйнай і камунікацыйнай блакадзе. Паветраныя, аўтамабільныя і чыгуначныя зносіны прыпыніліся, разбураны або пашкоджаны дзясяткі тысяч дамоў, загінула больш за паўмільёна галоў жывёлы. У правінцыі Сінд колькасць пацверджаных ахвяр паводак дасягнула 320 чалавек.

25 жніўня ўрад Пакістана абвясціў «агульнанацыянальнае надзвычайнае становішча» ў краіне. Міністр у пытаннях змены клімату Шэры Рэхман назвала паводкі «гуманітарнай катастрофай эпічных маштабаў», у выніку якой тысячы людзей засталіся без ежы і прытулку. 26 жніўня прэм’ер-міністр Пакістана Шахбаз Шарыф заявіў, што ад паводкі пацярпелі 33 мільёны чалавек (каля 15 % жыхароў краіны).