Велнес

Ўэ́лнэс (англ.: Wellness , ад fitness і well-being — «добрае самаадчуванне») — канцэпцыя здаровага ладу жыцця, што грунтуецца на спалучэнні фізічнага і ментальнага здароўя, здаровага харчавання, разумных фізічных нагрузак і адмовы ад шкодных звычак.

Апісанне

Галоўнае заданне ўэлнэсу — унікненне і прафілактыка хвароб, а таксама прыкмет старэння, як вонкавых, гэтак і ўнутраных. Ўэлнэс — гэта філасофія дабрабыту чалавека ўва ўсіх сферах яго быцця: духоўнай, сацыяльнай і фізічнай. Той, хто жыве згодна з філасофіяй ўэлнэсу — удалы, поўны энергіі, аптымістычны і бадзёры незалежна ад веку. Ён надае ўвагу стану свайго цела, прынцыпам здаровага харчавання, умерана ўжывае фізічныя нагрузкі.

Галоўныя прынцыпы філасофіі ўэлнэс:

• рух;
• разумовая актыўнасць;
• паслабленне і гармонія;
• прыгажосць і догляд за целам;
• збалансаванае харчаванне.

Гісторыя

У 1959 годзе амерыканскі лекар Хальберт Л. Дан (Halbert Dunn) увёў у практыку панятак «ўэлнэс» і першым сфармуляваў галоўныя прынцыпы здаровага ладу жыцця. У 1960-я гады ўэлнэс набыў вялікую папулярнасць спачатку ў прафесійных колах, а потым і ў шырокіх колах амерыканскага грамадства дзякуючы шматлікім публікацыям Хальберта Дана, Джона Трэвіса, Дональда Ардэла і Герхарта Хэтлера.

Слова «ўэлнэс» увайшло ў беларускую мову нядаўна і сустракаецца ў розных варыянтах напісання (вэлнес, уэлнес, вэлнэс, уэлнэс), аднак напісанне ўэлнэс найбольш блізка перадае вымаўленне гэтага слова (|ˈwelnəs|).

Ўэлнэс і фітнэс

Ўэлнэс залучае ў сябе панятак фітнэсу, бо з'яўляецца словам шырэйшага плана. Пад ўэлнэсам разумеюць комплекснае выкарыстанне методык аздараўлення, што ўлучаюць дыеталогію, рэабілітацыйныя праграмы, псіхалагічнае аздараўленне, функцыйны трэнінг, СПА-працэдуры і г.д. Такое спалучэнне ўмеранай фізічнай актыўнасці, расслабляльных працэдур і здаровага харчавання дае аздараўленчы эфект. Услед за гэтым адбываецца і паляпшэнне эмацыйнай раўнавагі.

Ўэлнэс-абсталяванне

Ўэлнэс-абсталяванне дзеляць на дзве групы: прызначанае для актыўных трэнераванняў (тонусныя сталы, вакуумныя трэнажоры, іпатрэнажоры, баланс-платформы, вібраплатформы) і прызначанае для пасіўных працэдур (прэсатэрапія, магнітатэрапія, тэрматэрапія інфрачырвоным выпрамяненнем, масажныя ложкі). Адметныя рысы ўэлнэс-абсталявання — комплекснасць, шматфункцыйнасць, прастата ва ўжыванні і выкарыстанне апошніх навуковых распрацовак. Ўэлнэс-абсталяванне дазваляе палепшыць выгляд і агульны стан арганізма без цяжкіх фізічных нагрузак і жорсткіх дыет.

Цытаты

Ўэлнэс — гэта грошы, выдаткаваныя на тое, каб пачувацца здаравейшым, нават калі вы не „хворыя“ па звычайных медычных параметрах. Сёння галоўная патрэба большасці людзей не ў грашах, а ў здароўі. Пол Пілзнер, эканаміст і аналітык, эканамічны дарадца прэзідэнта ЗША

Ўэлнэс — гэты стан добрага фізічнага і ментальнага здароўя як вынік правільнага харчавання, разумнай фізічнай актыўнасці і карысных звычак. The American Heritage Dictionary of the English Language

Гл. таксама

• Здаровы лад жыцця
• Спорт

Спасылкі

• На Вікісховішчы ёсць медыяфайлы па тэме Велнес