Будынкі Беларускага аўтамабільнага завода

Будынкі Беларускага аўтамабільнага завода ў г. Жодзіна ўзведзены ў 1958 годзе, у 1976 годзе пабудаваны новыя вытворчыя, адміністрацыйна-бытавыя і інжынерныя карпусы. Тэрыторыя завода функцыянальна заніравана з улікам асаблівасцей тэхналогіі, сістэмы адміністрацыйна-бытавога абслугоўвання і транспарту, санітарных і пажарных патрабаванняў. Зоны планіровачна аб’яднаны транспартнымі і пешаходнымі сувязямі. Асноўную вытворчую зону фарміруюць карпусы цэхаў — сучасных прамысловых будынкаў з прагрэсіўнымі аб’ёмна-планіровачнымі і канструкцыйнымі вырашэннямі. Асноўныя цэхі — вялікія вытворчыя аб’ёмы з натуральным асвятленнем і кандыцыяніраваным паветрам. Вентыляцыйныя ўстаноўкі вынесены ў спецыяльныя галерэі на дахі карпусоў. Працяглыя гарызантальныя плоскасці вытворчых карпусоў раўнамерна падзелены 4-павярховымі бытавымі прыбудовамі, што стварае своеасаблівую і выразную кампазіцыю галоўных фасадаў, перад якімі размешчана зона адпачынку.

Перадзаводская зона — буйны комплекс адміністрацыйных, лабараторных і грамадскіх будынкаў, прамежкавае звяно паміж вытворчымі і жылымі тэрыторыямі. Яе галоўнымі элементамі з’яўляюцца карпусы канструктарска-даследчай базы і заводакіраўніцтва, якія вылучаюцца цікавай і выразнай кампазіцыяй. У аб’ёмна-планіровачнай арганізацыі заводскага комплексу выкарыстаны прагрэсіўныя вырашэнні, што дало магчымасць стварыць выразную архітэктуру і камфортныя ўмовы працы.

Літаратура

• I. I. Боўт. Беларускага аўтамабільнага завода будынкі // Энцыклапедыя літаратуры і мастацтва Беларусі: У 5-і т. / Рэдкал.: І. П. Шамякін (гал. рэд.) і інш.. — Мн.: БелСЭ, 1984. — Т. 1. А капэла — Габелен. — 727 с. — 10 000 экз.