Дзяўчына ў чорным (фільм, 1967)

«Дзяўчына ў чорным» (эст. Tütarlaps mustas) — экранізацыя аднайменнай аповесці эстонскай пісьменніцы Лілі Промет, чорна-белы кінафільм. Здымкі фільма праходзілі ў 1966 годзе, дата першага выхаду на экран — 3 лютага 1967 года (у Эстонскай ССР).

Дзяўчына ў чорным
эст.: Tütarlaps mustas
Жанр	драматычны фільм
Рэжысёр	Вельё Кяспер
Сцэнарыст	Lilli Promet[d]
У галоўных ролях	Юозас Будрайціс
Кінакампанія	Талінфільм
Працягласць	93 хв.
Краіна	СССР
Мовы	эстонская мова і руская
Год	1967
IMDb	ID 0346916

«Дзяўчына ў чорным» быў адным з нямногіх фільмаў эстонскага кіно савецкага перыяду, у якім знайшла адлюстраванне тэма рэлігіі.

Сюжэт

Лірычная і візуальна прывабная гісторыя кахання, паказаная ў фільме, дакранаецца тэм чалавечай адзіноты і адносін з рэлігіяй. Адну з галоўных роляў сыграў будучая зорка літоўскага кіно — малады Юозас Будрайціс.

Дзеянне фільма адбываецца ў першай палове 1960-х гадоў у прыморскай эстонскай вёсцы, дзе жылі рыбакі і рабочыя рыбнага цэха. Глыбока веруючая дзяўчына Саале, з ног да галавы ў чорным адзенні і з маленькай валізкай у руках, прыехала туды з горада да сваёй цёткі Кадзі, якая жыла ў драўлянай хаце на самай ускраіне вёскі. З дому потым дзяўчына заўсёды выходзіла толькі ў чорным адзенні і пазбягала зносін з жыхарамі вёскі. Адзіным скарбам Саале быў шкляны шар з дзіўнымі крышталямі ўнутры — памяць пра маці, пасля смерці якой дзяўчына стала зусім самотнай. Толькі ў гэтым шары былі заключаны для яе самыя яркія фарбы свету. На долю Саале выпалі і ганенні, і подласць, таму яна ўжо не чакала ад людзей нічога добрага. Але, на дзіва, малады рыбак Танель, шчыры юнак з чыстай і добрай душой, з задавальненнем пачаў шпацыраваць з ёй па пляжы, спачатку нават амаль у поўным маўчанні, і зусім без грубага асуджэння і насмешак над верай Саале ў бога. Далікатнае стаўленне Танеля да Саале, яго жыццялюбства, адкрытасць і спробы вывесці дзяўчыну з тупіку адзіноты прынеслі поспех. Дзень ад дня душа Саале адтайвала, адкрываючы ёй радасць і фарбы навакольнага жыцця.

У ролях

• Герлінда Капельман — Саале
• Юозас Будрайціс — Танель.
• Элен Лійгер — Хельменціна
• Лізл Лійса Ліндау — Кадзі
• Эвальд Хермакюла — Марці
• Вію Хярм — Паўла
• Юры Ярвет — Ёнас

Узнагароды

Прэмія «Лепшая аператарская праца» на Фестывалі фільмаў Балтыйскіх рэспублік, Беларусі і Малдовы ў 1967 годзе.