Лібаўскі гарадок
Лібаўскі гарадок — колішняя мясцовасць у Гомелі, частка гістарычнага раёна Залінія. Узнік пасля эвакуацыі ў Гомель у 1915 г. Лібаўскіх майстэрняў з людзьмі і абсталяваннем. Уяўляў сабой забудову барачнага кшталту. Пачынаўся, па розных звестках, з шасці ці чатырнаццаці баракаў[1][2]. Знаходзіўся на паўночным захадзе вуліц Нямецкай і Радзькінскай (Чычэрына)[3]. Пазначаны пад сваёй назвай на плане Гомеля 1930-х гг.[3]
Станам на 1926 г. агульная колькасць забудаваных уладанняў складала 52. З 47 наяўных жылых памяшканняў усе значыліся занятымі. Уся забудова ўлічвалася як узведзеная з 1917 г. Тут пражывала 203 чалавекі (90 мужчын і 113 жанчын), пераважную большасць з якіх складалі беларусы (168). Паводле сацыяльнага становішча галовы сем’яў адносіліся да рабочых (33) і службоўцаў (20). Пэўная частка жыхароў трымала свойскую жывёлу: 2 каровы, 10 свінняў, 11 козаў ці авечак. Вадаправоднае забеспячэнне адсутнічала[4].
Зноскі
- ↑ Рогалев, А. Ф. Топонимический словарь Гомеля и Гомельского района [Текст] / А. Ф. Рогалев. — Гомель : Барк, 2012. — С. 160.
- ↑ Старовойтов, М. И. Социально-экономическое положение белорусско-российского пограничья в 1914-1918 годах // Первая мировая война: события и люди: сборник научных статей / Учреждение образования "Гомельский государственный университет им. Франциска Скорины", Государственное научное учреждение "Институт истории НАН Беларуси", Российский центр науки и культуры в Гомеле. — Гомель : ГГУ, 2018. — С. 47.
- ↑ а б План города Гомеля и Новобелицы, 1930-е годы.
- ↑ Гомель и городские поселения Гомельщины: Предварит. итоги переписи 1926 г. и некоторые данные текущ. отчетов и обследований. — Речица, 1927. — С. 18-19.
.jpg){kind=link}