Сусветная прэмія саўндтрэкаў

«Сусве́тная прэ́мія саўндтрэ́каў» (англ.: World Soundtrack Awards, WSA) — кінапрэмія, якая прысуджаецца за музыку, напісаную для фільмаў. Прэмія была створана ў 2001 годзе Сусветнай акадэміяй саўндтрэкаў (англ.: World Soundtrack Academy) і прысуджаецца штогод у сярэдзіне кастрычніка ў Генце (Бельгія) падчас Генцкага міжнароднага кінафестывалю[en]. «Сусветную прэмію саўндтрэкаў» часта называюць самай прэстыжнай узнагародай кінамузыкі ў свеце[1].

Сусветная прэмія саўндтрэкаў
англ.: World Soundtrack Awards, WSA
Тып кінапрэмія, музычная прэмія[d] і група ўзнагарод[d]
Заснаванне 2001
Краіна  Бельгія
Месца
Сайт worldsoundtrackawards.com

«Сусветная прэмія саўндтрэкаў» прысуджаецца ў некалькіх катэгорыях, тры з якіх лічацца найбольш важнымі: «Кінакампазітар года», «Найлепшы саўндтрэк» і «Найлепшая арыгінальная песня». Сярод іншых узнагарод ёсць прэмія «Адкрыццё года», «Прэмія за прыжыццёвыя дасягненні», «Прэмія глядацкіх сімпатый», прэмія «Найлепшы малады еўрапейскі кампазітар» (з 2009 года). Іншыя ўзнагароды прысуджаліся на спецыяльнай ці нерэгулярнай аснове, напрыклад, прэмія «Найлепшы малады бельгійскі кампазітар» (прысуджалася ў 2004, 2005 і 2008 гадах) або спецыяльны прыз (прысуджаўся толькі ў 2004 годзе).

Найбольшую колькасць узнагарод «Сусветнай прэміі саўндтрэкаў» на сённяшні дзень мае французскі кампазітар Аляксандр Дэспла, які пяць разоў быў прызнаны найлепшым кампазітарам года (2007, 2009, 2010, 2011 і 2014) і тройчы атрымліваў узнагароду за найлепшы саўндтрэк (2009, 2010 і 2014)[2]. Амерыканец Джон Уільямс быў узнагароджаны чатыры разы ў трох розных катэгорыях[3]. Амерыканец Рэндзі Ньюман быў тры разы ўдастоены ўзнагароды ў намінацыі «Найлепшая арыгінальная песня»[4].

Зноскі правіць

  1. About Film Fest Gent (англ.). Сайт «filmfestival.be». Праверана 19 кастрычніка 2019.
  2. Alexandre Desplat — Awards (англ.). Сайт «Internet Movie Database». Праверана 19 кастрычніка 2019.
  3. John Williams — Awards (англ.). Сайт «Internet Movie Database». Праверана 19 кастрычніка 2019.
  4. Randy Newman — Awards (англ.). Сайт «Internet Movie Database». Праверана 19 кастрычніка 2019.

Спасылкі правіць